भांगरभूंय | प्रतिनिधी
विरियातो, काँग्रेसीचेर फोग काडपाची शक्यतायः गोंयकारांचें भाशणा कडेन कान
भांगरभूंय । प्रतिनिधी
पणजीः काँग्रेसीचे दक्षिण गोंयचे उमेदवार कॅ. विरियातो फर्नांडीस हांणी भारतीय संविधाना विशां केल्ल्या विधाना उपरांत भाजप आनी काँग्रेस हांचे मदीं द्वंद्व चल्लां. हे फाटभुंयेर भाजपाच्या दोनूय उमेदवारांच्या प्रचारा खातीर प्रधानमंत्री नरेंद्र मोदी हांची शेनवारा दक्षीम गोंयांत सांकवाळे जाहीर सभा जातली. हे सभेंत मोदी विरियातो आनी काँग्रेसीचेर खर टिका करपाची शक्यताय आसा. ताका लागून सगळ्या गोंयकारांचें कान तांच्या भाशणा कडेन आसतले.
शेनवारा सांजेच्या 5 वरांचेर सांकवाळे बिर्ला मंदिरा मुखा वयल्या मैदानार प्रधानमंत्री मोदी हांची सभा जातली. प्रदेश भाजपान हे सभेची जय्यत तयारी केल्या. 50 हजारां परस अदीक लोकांक सभेचे सुवातेर हाडपाचें नियोजन भाजपान केलां. आदले तशेंच सध्याचे मंत्री, आमदारांनी फाटल्या चार दिसांच्यान हे सभे खातीर दीसरात एक केल्यात. आपापल्या मतदारसंघांतल्यान चडांत चड लोकांक सभेक हाडपा खातीर तांचे यत्न चल्ल्यात.
भाजपान उत्तर गोंयची उमेदवारी सेगीत सवे खेपे केंद्रीय मंत्री श्रीपाद नायक हांकां दिल्या. जाल्यार दक्षीण गोंयची उमेदवारी पयलेच खेपे पल्लवी धेंपो हांच्या रुपान महिलेक दिल्या. 2019 चे लोकसभा वेंचणुकेंत दक्षीण गोंय मतदारसंघ भाजपाच्या हातांतल्यान गेल्लो. ताका लागून प्रधानमंत्री मोदी सयत भाजपाच्या केंद्रांतल्या तशेंच हेर ज्येश्ठ फुडाऱ्यांनी सुरवाती सावनूच दक्षीण गोंयाचेर पुराय लक्ष केंद्रीत केल्लें. भाजपाच्या थळाव्या आनी केंद्रीय फुडाऱ्यांनी दक्षीण गोंयची उमेदवार धेंपो हांच्या प्रचाराचेर चड भर दिला.
काँग्रेसी वतीन दक्षीण गोंयांत रिंगणांत आशिल्ले कॅ. विरियातो फर्नांडीस हांणी कांय दिसां आदीं दक्षीण गोंयांतले एके सभेंत उलयतना म्हणिल्लें, केंद्रान भारतीय संविधान गोंयकारांचेर थापलां. हें आपणे काँग्रेस फुडारी राहूल गांधी हांकां सांगलें आनी तांणीय तें मान्य केल्ल्याचें तांणी म्हणिल्लें.
ह्या विधाना वयल्यान मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे हांचे सयत भाजपाचे सगळेच थळावे फुडारी, मंत्री, आमदार, विरियातो फर्नांडीस आनी काँग्रेसीचे फाटीक लागले. त्या वेळार छत्तीसगडांत सभेंत उलयतना प्रधानमंत्री मोदी हांणी लेगीत विरियातो हांच्या विधाना वयल्यान काँग्रेसीचेर टिका केल्ली. लोकसभा वेंचणुकेंतल्या काँग्रेस उमेदवारान संविधान विरोधी विधान करून संविधाना वांगडाच डॉ. बाबासाहेब आंबेडकर हांचो अपमान केला. देशांत फूट घालपाची काँग्रेसीची ही नवी चाल आसा, असो आरोप तांणी केल्लो. ताका लागून ह्या प्रकरणाचे पडसाद गोंया सयत देशभरांत उमटिल्ले.
मजगतीं, विरियातो हांच्या विधाना वयल्यान सुरू जाल्लो वाद अजून लेगीत सोंपूंक ना. अशे स्थितींत शेनवारा मोदी हांची सभा विरियातो हांच्याच म्हालांत जातली. हे सभेंत मोदी कितें उलयतले, हाचे कडेन गोंयकारांचे कान लागल्यात.
स्टार प्रचाराकांच्या सभांक जातली सुरवात
लोकसभा वेंचणुकेंतले मुखेल पक्ष आशिल्ले भाजप आनी काँग्रेस ह्या दोनूय पक्षांनी गोंया खातीरच्या स्टार प्रचारकांचीं नांवां जाहीर केल्यांत. पूण मतदानाक फक्त 10 दीस उरल्यात, तरी लेगीत एकाय स्टार प्रचारकाची सभा जावंक ना. प्रधानमंत्री नरेंद्र मोदी हांचे सभे पासून भाजपाच्या सगळ्याच स्टार प्रचारकांच्या सभांक सुरवात जातली, अशी म्हायती भाजपाच्या ज्येश्ठ फुडाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
