भांगरभूंय | प्रतिनिधी
अॅड. रमाकांत खलपः 1999 त आपूण मंत्री नाशिल्ल्याचें स्पश्ट
भांगरभूंय । प्रतिनिधी
पणजीः भाजपाचे उत्तर गोंय मतदारसंघाचे उमेदवार तशेंच केंद्रीय मंत्री श्रीपाद नायक हांकां स्मृतीभ्रंश जाला. 1999 चे लोकसभा वेंचणुकेंत आपूण हारलो, त्या वेळार आपूण मंत्री नाशिल्लो. ते आदीं 1996 ते 1998 ह्या काळांत आपूण मंत्रीपदार आशिल्लों, अशें काँग्रेसीचे उत्तर गोंय मतदारसंघाचे उमेदवार अॅड. रमाकांत खलप हांणी सोमारा स्पश्ट केलें.
प्रुडंट खबरां चॅनला वयले ‘हेडऑन’ कार्यावळींत अॅड. खलप उलयताले.
श्रीपाद नायक प्रचारा वेळार मतदारांक चुकीची म्हायती दिता. आपूण मंत्री आसतना तांणी पलो पराभव केलो, अशें ते सांगतात. पूण 1999 चे लोकसभा वेंचणुकेंत आपूण हारलों, त्या वेळार आपूण मंत्री नाशिल्लोंच. 1999 त नवो चेरो म्हूण उत्तर गोंयांतल्लयान तांकां वेंचून दिलो. ते उपरांतच्या चार वेंचणुकांनी काँग्रेसीन कांय कारणांक लागून जाय तशे उमेदवार तांचे आड रिंगणांत देंवोवंक नात. तशेंच काँग्रेसीची कामगिरी लेगीत कांय प्रमाणांत उणी जाल्ली. ताका लागून उत्तर गोंयांतल्या लोकांनी परतून परतून तांचेर विस्वास दवरलो. पूण 25 वर्सांत खासदार, केंद्रीय मंत्री म्हूण श्रीपाद नायक हांणी उत्तर गोंयांतल्या लोकांक न्याय दिवंक ना. ते केंद्रीय पर्यटनमंत्री आसतनाय पर्यटन धोरण नाशिल्ल्यान गोंयांतल्या फामाद कळंगूट दर्यादेगेची वाट लागली. कर्नाटकान गोंयची जीवनदायिनी आशिल्ली म्हादय घुंवडावपाचें कारस्थान रचलें, तरी लेगीत श्रीपाद नायक हांणी लोकसभेंत ताचेर केन्नाच भाश्य करूंक नात. गोंयांतल्या हेर प्रस्नांचेर लोकसभेंत आवाज काडपाक ते सामकेच अपेशी थारल्यात. तेच खातीर आतां प्रचारा वेळार तांकां लोकांचे तिडकीक फुडो करचो पडटा, अशें अॅड. खलप हांणी सांगलें. कांय कारणांक लागून आपल्याक उमेदवारी उसरां मेळ्ळी, पूण फाटल्या कांय म्हयन्यां सावन आपूण उत्तर गोंयांतल्या लोकांच्या संपर्कांत आसा. ताका लागून आतां वेळ उणो आसलो तरीय आपूण घराघरांनी वचून प्रचार करतलों, अशेंय अॅड. खलप हांणी सांगलें.
श्रीपाद भाऊंक खलपाचें आव्हान
खासदार तशेंच केंद्रीय मंत्री म्हूण आपणे 18 म्हयने लोकसभेंत केल्ली कामगिरी आनी श्रीपाद नायक हांणी फाटल्या 25 वर्सांत केल्ली कामगिरी हांची तुळा आतां लोक करपाक लागल्यात. श्रीपापद नायक हांणी आपले कडेन चर्चेक येवन 25 वर्सांत तांणी कसली उदरगत केली तें लोकांक सांगचें, अशें आव्हान अॅड. रमाकांत खलप हांणी दिलां.
सुवार्थी काँग्रेस आमदारांचो भाजपांत प्रवेशः विरियातो
16 जानेवारी 2024 ह्या दिसा मडगांवां जो जनमत कौल दीस आयोजीत केल्लो, तेन्नाच्यानूच आपणे वैयक्तीक तरेन प्रचार सुरू केल्लो. उरिल्ल्या दिसांनी पुराय दक्षीण गोंयचो कोनशान कोनसो भोंवतलों. काँग्रेसीच्या खूबश्या आमदारांनी सुवार्था खातीर भाजपांत प्रवेश केला. सध्या आमचे कडेन तिनूच आमदार आसात. तशेंच विरोधी पक्षांच्या कांय आमदारां सयत गोंयांतले लोकूय आमचे वांगडा आसात. ताका लागून हे खेपे दोनूय सुवातो काँग्रेसूच जिखतलो, अशें काँग्रेसीचो दक्षीण गोंय उमेदवार विरियातो फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.