वीरमाता संंयोगिता… ह्या गजरांत जातालो एकमेव महिला खासदाराचो प्रचार

भांगरभूंय | प्रतिनिधी

-काँग्रेस संंभाव्य उमेदवार अॅड. रमाकांंत खलप सांंबाळटाले प्रचाराची धुरा

पणजी: गोंयच्या एकमेव महिला खासदार सर्गेस्त संयोगिता राणे हांंचो प्रचार वीरमाता संंयोगिता… अशा गजरात जातालो. महिला उमेदवार आशिल्ल्यान सगळ्यांंक तिचे विशीं बरीच उमळशीक आशिल्ली. तेन्नाच्यो मगो अध्यक्ष शशिकलाताई काकोडकार हांंणीच तांंकां उमेदवारी दिल्ली. आतां उत्तर गोंयांत काँग्रेस उमेदवारी खातीर इत्सूक आशिल्ले अॅड. रमाकांंत खलप हेच तिच्या प्रचाराची धुरा सांंबाळटाले.

भाजपान पल्लवी धेंंपे हांंकां लोकसभेची उमेदवारी जाहीर केल्ल्यान महिला खासदारा विशीं चर्चा जावपाक लागल्या. हे फाटभुंयेर एका तेंपा वयले मगोचे फुडारी आनी आतां काँग्रेस उमेदवारी खातीर इत्सूक आशिल्ले अॅड. रमाकांंत खलप हांंणी 1980 वर्साच्या लोकसभा वेंंचणुकीच्यो यादी सांंगल्यो. सर्गेस्त संंयोगिता राणे हांंचो पूत सैन्य दळांत आशिल्लो. बांगलादेश झुजा वेळार ताका वीरमरण आयिलें. हो मुद्दो घेवन तिचो उल्लेख वीरमाता संंयोगिता, असो जातालो. वीरमाता संयोगिता हो गजर प्रभावी थारलो, अशेंं अॅड. रमाकांंत खलप हांंणी म्हायती दितना सांंगलें.

भारतीय जनता पक्षान दक्षीण गोंयांत पल्लवी धेंपे हांकां उमेदवारी दिवन एक प्रकारचो नवो पायंडो घाला. हो पायंडो इतिहास घडोवन हाडपाक शकता. दक्षीण गोंय मतदारसंघांत आयजमेरेन महिला खासदार जावंक ना. त्यो वेंचून आयल्यो जाल्यार दक्षीण गोंयच्यो पयल्यो आनी राज्यांतल्यो त्यो दुसऱ्यो महिला लोकसभा खासदार थारतल्यो. भारतीय जनता पक्षाचो विचार केलो जाल्यार पयलेच खेपे पक्षान लोकसभे खातीर महिलेक उमेदवारी दिल्या.

महाराष्ट्रवादी गोमंतक पक्षा वतीन संयोगिता राणे ही महिला उमेदवार 1980 वर्सा उत्तर गोंयांतल्यान वेंचून आयिल्ली. उत्तर आनी दक्षीण गोंय मेळून आतां मेरेन 18 जाण खासदार जाल्यात. केंद्रीय मंत्री श्रीपाद नायक, एदुआर्द फालेरो, फ्रान्सीस सार्दीन , चर्चील आलेमांव, एराज्मो सिक्वेरा हे एका परस चड खेपे वेंचून आयल्यात.

आतां मेरेनचे उत्तर गोंयचे खासदार

1. पिटर अल्वारीस (मगो, 1962)

2. जनार्दन शिंक्रे (अपक्ष, 1967)

3. पुरूषोत्तम काकोडकार (काँग्रेस, 1971)

4. अमृत कांसार (मगो, 1977)

5. संयोगिता राणे (मगो, 1980)

6. शांताराम नायक (काँग्रेस, 1984)

7. गोपाळराव मयेंकार (मगो, 1989)

8. हरिश झांट्ये (काँग्रेस, 1991)

9. अॅड. रमाकांत खलप (मगो, 1996)

10. रवी नायक (काँग्रेस, 1998)

11. श्रीपाद नायक (भाजप, 1999, 2004, 2009, 2014, 2019)

आतां मेरेनचे दक्षीण गोंयचे खासदार

1. मुकुंद शिंक्रें (मगो, 1962)

2. एराज्यो सिक्वेरा (युगो, 1967, 1971)

3. एदुआर्द फालेरो (काँग्रेस, 1977, 1980, 1984, 1989, 1991)

4. चर्चील आलेमांव (युगोडेपा (1996) आनी काँग्रेस (2004)

5. फ्रान्सीस सार्दीन (काँग्रेस, 1998, 2007, 2009 आनी 2019)

6. रमाकांत आंगले (भाजप, 1999)

7. अॅड. नरेंद्र सावयकार (भाजप, 2014)