भांगरभूंय | प्रतिनिधी
पणजी, प्रतिनिधी: मतदानाची तारीख जशी लागीं पावता तसो प्रचाराकूय नेट येता. प्रधानमंत्री नरेंद्र मोदी हांच्या भौशीक बसके उपरांत भाजपा कार्यकर्त्यां मदीं उमेदीची भावना निर्माण जाल्या. आदले, आतांचे मंत्री, आमदार आनी सगळ्या पक्षांचे फुडारी प्रचारांत वांटो घेतात. मात लुईझीन आनी चर्चिल हे आदले दोगूय मुख्यमंत्री वेंचणूक वा प्रचारा पसून मात्शे पयसूच आसात. ही अजाप करपा सारकी गजाल जावन आसा.
लुईझीन फालेरो आनी चर्चिल आलेमाव हांणी राज्याचे मुख्यमंत्री म्हणून काम पळयलां. चर्चिल दोन फावटीं लोकसभेंत वेंचून आयल्या, जाल्यार लुईझीन हे राज्यसभेचे खासदार आशिल्ले. नावेली विधानसभा मतदारसंघांत लुईझिनाचो जाल्यार चर्चिलाचो बाणावले मतदारसंघांत शेक आसा. फाटले विधानसभा वेंचणुकेंत चर्चिल हारले मात तांचे बाणावले आनी नावेली मतदारसंघांत कार्यकर्ते आसात. आदीं एक वेंचणूक हारल्या उपरांत फुडले वेंचणुकेंत तांणी जैत मेळयलां. म्हत्वाचें म्हणल्यार दक्षिणेक सगळ्यांत चड मतदार आशिल्ल्या सासश्टी म्हालांतले हे दोगूय फुडारी. तरी लेगीत दोगांयनी लोकसभेचे वेंचणुके पसून पयस रावप पसंत केलां.
लोकसभा वेंचणुके विशीं उलयतना लुईझीन फालेरो म्हणटा, हांव आतां राजकारणांतल्यान निवृत्त जालां. आतां बरोवपाचेर चड लक्ष केंद्रीत केलां. उमेदवार तशेंच राजकी पक्षांचे फुडारी फाबळा खातीर आपल्याक मेळिल्ले. आमत आपणें लोकसभा वेंचणुके पसून पयसूच रावपाचें थारायलां.
लुईझिना वरीं चर्चिल राजकारणांतल्यान निवृत्त जावंक ना. हांव म्हज्या कार्यकर्त्यां सयत आनी लोकां वांगडा आसतलों. ह्या वेळार खंयच्याच पक्षान वा उमेदवारान म्हाका अजून खंयचेच भौशीक बसकेक वा प्रचाराक आपोवंक ना. ह्या वेळार हांव खंयच्याच उमेदवाराचो जाहीरपणान प्रचार करचो ना. म्हाका पुराय दक्षिण गोंयांत कार्यकर्ते आनी मतदार आसात अशें चर्चिल आलेमाव हांणी सांगलें.
चडशे अल्पसंख्यांक (क्रिस्तांव) उमेदवार दक्षीण गोंयांत जैतिवंत जाल्यात. हे परिस्थितींत लुईझिन आनी चर्चिल हे दिग्गज ख्रिस्ती फुडारी नाशिल्ल्यान कोणाक लाव जातलो, हे विशीं राज्यांत उत्सुक्ताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
