भांगरभूंय | प्रतिनिधी
नवी दिल्ली, खबरां संस्था ः कोरोना काळांतले परिस्थितीचो फायदो घेवन घराघरांनी भितर सरिल्ल्या ओटीटी (ओव्हर द टॉप) ह्या नव्या माध्यमांनी अर्थीक येणावळी बाबतीत बरीच व्हड आघाडी घेतल्या. सध्या संवसारीक पांवड्यार लोकप्रीय आशिल्ल्या तीन ते चार मुखेल ओटीटी कंपन्यांनी ह्या बाजारांत तिगून उरपा खातीर खर पावलां उबारल्यांत. नेटफ्लिक्स हें ह्या मुखेल ओटीटी कंपन्यां मदलें कायमचें म्हारग अशें नांव जावन आसा. नेटफ्लिक्सा वयलो आशय पळोवपा खातीर आयजूय सगळ्यांत चड पयशे मेजचे पडटात. ताका लागून ह्या बाजारांतले सर्तींत आशयाचे बाबतींत सगळे तरेचे गूण आशिल्ली ही ओटीटी वाहिनी आजूनय प्रेक्षकांचो आंकडो आनी उत्पन्नाच्या गुणां खातीर धडपड करता. हे फाटभूंयेर हालींच नेटफ्लीक्सान आपलो तीन वर्सांचो आनी पयल्या तीन म्हयन्यांचो अर्थीक अहवाल जाहीर केला. पयल्या तीन म्हयन्यांत नेटफ्लिक्सच्या सशुल्क वापरकर्त्यां मदीं विक्रमी वाड जाल्ल्याची नोंद ह्या अहवालांत केल्या. २०२४चे सुरवातेकूच नेटफ्लिक्सच्या सशुल्क वापरकर्त्यांच्या आंकड्यान २५ कोटींचो टप्पो पार केला. फाटल्या वर्सा परस ९० लाख लोक नव्यान नेटफ्लिक्सा कडेन जोडले.
नेटफ्लिक्स भारताच्या फायद्यांत ७५ टक्क्यांनी वाड
फाटल्या वर्सा नेटफ्लिक्स इंडियाची अर्थीक उलाढाल २,२१४ कोटी रुपया आशिल्ली. २०२२ वर्सा हीच उलाढाल १,८३७ कोटी रुपया आशिल्ली. ह्या उत्पन्नांत वर्साच्या काळांत २४.१ टक्क्यांनी वाड जाल्या. २०२२ वर्साचे तुळेंत नेटफ्लिक्स इंडियाचो फायदो २०२३ वर्सा ७५ टक्क्यांनी वाडला. नेटफ्लिक्स इंडियाचो फाटल्या वर्सा ३५.३ कोटी रुपया फायदो जालो. म्हळ्यार, भारतीय बाजारांत पावल दवरपा खातीर नेटफ्लिक्सान हांगा म्हयन्याळे आनी वर्सुकी शुल्क कापलां. फारीक केल्ल्या वापरप्यांच्या वाडपी आंकड्यांतूय होच परिणाम दिसून आयलो. हेर देशां प्रमाण भारतांत पासवर्ड शेअरिंग प्रणालीचेर अशे तरेन आळो हाडपाचे यत्न जाले की, एका खात्याचेर फकत एका मनशाक नेटफ्लिक्स पळोवंक मेळटलें. देखून एके वटेन भारतांत नेटफ्लिक्स वापरप्यांचो आंकडो वाडला. तशेंच नेटफ्लिक्स इंडियाची येणावळ वाडल्या. तरी नेटफ्लिक्साक युट्युब आनी इंटरनॅट आदारीत चॅनल, तशेंच भारतांतल्या अमेझॉन प्राइम आनी डिस्नी हॉटस्टार सारकिल्या मुखेल ओटीटी कंपनीं कडेन सर्त करची पडटली.
भारतीय बाजारांत तिसर्या क्रमांकाचेर
भारतीय ओटीटी बाजारांत नेटफ्लिक्स अजूनय तिसर्या क्रमांकाचेर आसा. आंतरराष्ट्रीय सिनेमा, वेब मालिका तशेंच हिंदी सयत हेर भाशांनी आशय, आयपीएल सारक्या मुखेल खेळां मॅचींचें दूरचित्रण प्रसारण हाका लागून भारतांतल्या वट्ट ओटीटी येणावळींत डिस्नी हॉटस्टाराचो सगळ्यांत चड वांटो आसा. येणावळींत डिस्नी हॉटस्टाराचो वाटो वट्ट २५.६५ टक्के आसा. ताचे सकयल आंतरराष्ट्रीय सामुग्री वांगडाच हिंदी सयत वेगवेगळ्या भारतीय भाशांतल्या सिनेमा आनी वेब मालिकेचेर लक्ष केंद्रीत करपी अमेझॉन प्राइमाचो २१.२७ टक्के वांटो आसा. हे तुळेंत नेटफ्लिक्स इंडियाचो वाटो फक्त १२.५९ टक्के आसा. नेटफ्लिक्साक भारतीय बाजारांत व्हड येणावळीची संद आसा आनी भारतीय सामुग्री दिवपाच्या यत्नांत फाटल्या कांय म्हयन्यांत नेटफ्लिक्सान व्हड वेवसायीक हिंदी फिल्मां, ‘हीरामंडी’ सारकिल्या व्हड बजेटाच्या वेब मालिका सारकी सामुग्री उपलब्ध करून दिल्या. सध्या भारतांत नेटफ्लिक्साचे ६५ लाख पेड वापरपी आसात. देखून नेटफ्लिक्स इंडियाचे फुडले यत्न कोटीं परस चड हो आंकडो मेळोवपाचे दिकेन आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
