भांगरभूंय | प्रतिनिधी
कलबुर्गी, खबरां संस्था: केंद्र सरकारान कर्नाटकाक ३,४९९ कोटी रुपयांच्या दुकळ निधीक मान्यताय दिल्या आनी तातूंतल्यान फकत ३,४५४ कोटी रुपयांची निधी जारी केल्या अशें मुख्यमंत्री सिद्धरामय्या हांणी शेनवारा प्रसार माध्यमां कडेन उलयतना सांगलें. निधीची उरिल्ली रक्कम बेगोबेग फारीक करपाची मागणी तांणी प्रधानमंत्री नरेंद्र मोदी हांकां केल्या.
केंद्रान मंजूर केल्ली रक्कम राज्य सरकाराच्या मागणेच्या एक- चतुर्थाशूय ना अशें सिद्धरामय्या हांणी म्हणलें. तशेंच केंद्र सरकराक शिटकावणी दिल्ले खातीर आनी राज्य सरकाराक दुकळ मजत उपलब्ध करून दिल्ले खातीर तांणी सर्वोच्च न्यायालयाचे उपकार मानले. कर्नाटकाचे जनतेचो अधिकार मेळोवपा खातीर आपूण फेब्रुवारी म्हयन्यांत दिल्लीक निदर्शनां केल्लीं हाचोय उगडास तांणी करून दिलो.
कर्नाटकाचे चिंतेन केंद्र सरकारन दुकळ मदत निधी दिवंक नाशिल्ल्यान राज्य सरकारान सर्वोच्च न्यायालयांत गेल्या उपरांत पयशे दिवचे पडले, अशी टिका सिद्धरामय्या हांणी केली. हातूंत भाजप फुडारी वा केंद्र सरकारान कसलीच भुमिका करूंक ना अशें तांणी सांगलें. तांणी म्हणलें, ‘‘आमचे याचिकेचेर सुनावणी घेवपी सर्वोच्च न्यायालयाची खात्री पटिल्ली, की केंद्र सरकार राजकी कारणांक लागून कर्नाटकाचेर अन्याय करता.’’ कर्नाटकाक आतां मजत निधी दिवंक ना जाल्यार राज्यांतली जनता तांकां प्रचारा खातीर येवंक दिवची ना, असो भंय भाजपाक दिसला असोय दावो सिद्धरामय्या हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
