इनव्हर्टर बसोवपाक परवानगी सक्तीची

भांगरभूंय | प्रतिनिधी

दिवचल दुर्घटणे उपरांत वीज खात्याची खर भुमिका

भांगरभूंय । प्रतिनिधी

पणजीः हे मुखार जनरेटर, इनव्हर्टर बसोवपाक वीज खात्या कडल्यान परवानगी घेवप सक्तीची आसतली. परवानगे बगर ते बसयले आनी जिवीत वा वित्त हानी जाली जाल्यार ताका पुराय तरेन वीज गिरायक जापसालदार आसतले. अश्या गिरायकांचेर दिवाणी वा फौजदारी खटलो घालतले, अशी शिटकावणी वीज खात्यान दिल्या. शुक्रारा खात्यान वीज निर्मीती करपी विवीध उपकरणां संबंदांत सुचोवणी जारी केल्या.

कांय दिसां आदीं व्हाळशी- दिवचले वीज खांब्यार दुरुस्ती खातीर चडिल्ले लायनमन मनोज जांबावलीकार हांकां विजेचो शॉक लागिल्ल्यान मरण आयिल्लें. ह्या वाठारांतल्या एका आस्थापनाच्या इनव्हर्टराचें कनेक्शन योग्य नाशिल्ल्यान तातूंतल्यान रिव्हर्स सप्लाय आयिल्लो. ते खातीर जांबावलीकार हांकां विजेचो शॉक लागून मरण आयिल्लें. हे फाटभुंयेर खात्यान ह्यो सुचोवण्यो जारी केल्यात. हे आदीं खात्यान 2019 त लेगीत ह्यो सुचोवण्यो जारी केल्ल्यो. ते प्रमाण वीज गिरायकांक जनरेटर बसोवचे आदीं खात्याची परवानगी घेवप गरजेचें आसा. तांकां वीज निर्मिती करपी उपकरणां जोडचे आदीं तांची तांत्रीक आनी हेर म्हायती खात्याक दिवप लेगीत गरजेचें आसा. खात्या कडल्यान लेखी परवानगी मेळ्ळे उपरांतूच अशी उपकरणां वापरपाक मेळटलीं. उपकरणांतली वीज खंयचेच परिस्थितींत खात्याच्या वितरणांत रिव्हर्स पद्दतीन येवची न्हय हे खातीर कांय उपकरणां आसप गरजेचें आसा.

वीज ग्रीड कोडाक पाळो दिवप गरजेचें

जनरेटर, इनव्हर्टर वा सौर उर्जेचें उपकरण बसयतना ताका स्वयंचलीत 4 पोल चेंजर आनी डबल लॉक स्वीच हीं उपकरणां आसप गरजेचें आसा. हीं उपकरणां आसल्यार जनरेटर, इनव्हर्टराक लागून तयार जाल्ली वीज खात्याच्या सरयांनी परतून येना. वीज कन्क्शनाची तांक थारयतना जनरेटर, इनव्हर्टराची तांक लक्षांत घेवचे नात. समांतर कनेक्शन करतना वीज ग्रीड कोडाक पाळो दिवप गरजेचें आसा, अशें सुचोवणेंत स्पश्ट केलां.

तांत्रीक म्हायती दिवप गरजेची

ज्या गिरयकांनी जनरेटर, इनव्हर्टरा खातीर परवानगी घेवंक ना, तांणी आपली उपकरणां तत्काळ बंद करची. अशी उपकरणां खात्याच्या खंयचेय मुख्य सरयेक जोडिल्ली आसची न्हय. परवानगी घेवपा खातीर गिरायकाक वीज खात्याक ताची तांत्रीक म्हायती कळोवची पडटली. खात्याच्या अधिकाऱ्यांनी तपासणी केले उपरांत अश्या उपकरणांक परवानगी दितले.