भांगरभूंय | प्रतिनिधी
फोंडें, प्रतिनिधी: दिसान दीस अपघातांचो आंकडो वाडतूच आसा. तशेंच अपघातांत मरण येवपाच्योय घडणुको कानार पडटात. काल रातच्या सुमार २ वरांचेर केरी- फोंड्यां दुचाकीन लायटीच्या खांब्याक धपको दिल्ल्यान रचत सतरकार (अडकोण, बाणस्तारी) ह्या नव्याच भरती जाल्ल्या कॉन्स्टेबलाक मरण आयलें.
हे विशीं मेळिल्ले म्हायती प्रमाण, वाळपय पीटीएस हांगां सोमारा जाल्ल्या दिक्षांत सुवाळ्याक रचत सतरकार हांकां कॉन्स्टेबल पदार नियुक्त केल्लो. मात ताका आजूनय पोस्टींग दिवंक नाशिल्ली. तो काल रातच्या वेळार मडगांवच्यान व्हॉलीबॉल टुर्नामेंट सोंपोवन आपले मावशेच्या घरा (केरी- सावयवेरें) हांगा वतालो. रातचो रस्त्याचो अदमास येवंक नाशिल्ल्यान तांणी रस्त्या कुशीक आशिल्ल्या लायटीच्या खांब्याक धपको दिलो. हातूंत ताका मरण आयलें. ताची कूड पोस्टमार्टमा खातीर धाडल्या.
हे विशीं म्हाड्डोळ पुलीस स्टेशनाचेे निरीक्षक योगेश सावंत हांच्या मार्गदर्शना खाला उपनिरीक्षक रश्मी भाईडकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
