भांगरभूंय | प्रतिनिधी
मडगांव, प्रतिनिधी : कार्मोणा मारिया गॅलरी लागसार इसाक राऊल ह्या दुबावितान आदले दुस्मानकाये वयल्यान रिषभ नायक हाचेर हल्लो केलो. जखमी रिषभ हाका गोेमॅकोंत उपचारा खातीर दाखल केला. राऊल लिपपाचो यत्न करतालो तेन्ना ताका कोलवा पुलिसांनी अटक केली. ताका पांच दिसांची पुलीस बंदखण दिल्या.
मेळिल्ले म्हायती प्रमाण, इसाक राऊल (२२, रा. आंबेली) आनी रिषभ नायक (२२, रा. चौकी, कार्मोणा) हांचे मदीं आदले दुस्मानकायेंतल्यान हें घडलें. रिषभ हाचो इश्ट जुल्डो डिकॉस्टा हांणी हे विशीं कोलवा पुलिशेंत कागाळ नोंद केल्या. शेनवारा दनपरां सुमार १२.३० वरांचेर कार्मोण्या राऊल हाणें रिषभा कडेन आदल्या झगड्यां वयल्यान वाद घालपाक सुरवात केली. ह्या वेळार तिडकल्ल्या राऊलान बोल्सांतल्यान सुरो काडून रिषभाचेर हल्लो केलो. राउल हाचो वार चुकोवपा खातीर रिषभान आपलो हात फुडें केलो तेन्ना ताच्या हाताचीं चार बोटां तुटलीं. उपरांत रिषभाच्या फाटीरूय वार केलो आनी ताका जखमी करून दुबावीत थंयच्यान पळ्ळो.
कोलवा पुलिसांना हाची म्हायती मेळटांच दुबाविताचेर खून केल्ल्याचो यत्न केल्ल्या प्रकरणांत गुन्यांव नोंद केलो. उपरांत दुबावीत राऊल हाका धरपाक पंगड धाडलो. दुबावीत रातभर लिपून रावलो. उपरांत सकाळी पळून वचपाचे तयारेंत आसतना कोलवा पुलिसांनी ताका अटक केली.
न्यायालयांत हाजीर केलो तेन्ना ताका पांच दिसांची बंदखण आयकयली. जखमी रिषभ नायक हाचेर हॉस्पिटलांत उपचार सुरु आसात. ह्या प्रकरणांत कोलवा पुलीस निरीक्षक सुनील पडवळकार हांच्या मार्गदर्शना खाला फुडलो तपास चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
