उदरगती खातीर हाडिल्लो पयसो राज्य सरकारइव्हेंट मॅनेजमेटाचेर खर्च करता: युरी आलेमाव

भांगरभूंय | प्रतिनिधी

वास्को, प्रतिनिधी: केंद्र सरकार दाबोळी विमानतळ बंद करपाच्या मार्गार आसा. ताका लागून राज्य सरकारूय फाटबळ दिता. उदरगती खातीर हाडिल्लो पयसो राज्य सरकार इव्हेंट मॅनेजमेटाचेर खर्च करता असो आरोप विरोधी पक्ष फुडारी युरी आलेमाव हांणी केलो.
काँग्रेस पक्षाची जाहीर प्रचार सभा मुरगांव पालिका इमारती सामकार आयोजीत केल्ली तेन्ना युरी आलेमांव उलयताले. ह्या वेळार उमेदवार कॅप्टन विरोयतो फर्नांडीस, आदले मंत्री जुझे फिलिप डिसोझा, आमदार विजय सरदेसाय, कॉंग्रेस प्रदेशाध्यक्ष अमित पाटकार, आदले नगराध्यक्ष उलारिको रॉड्रिग्स, दक्षीण गोंय कॉंग्रेस अध्यक्ष सावियो डिसिल्वा, आदले उपनगराध्यक्ष काशीनाथ यादव, गोंय प्रदेश कॉंग्रेस हेर मागास वर्गीय अध्यक्ष नितीन चोपडेंकार, गोंय कॉंग्रेस अल्पसंख्याक अध्यक्ष नियाजी शेख, आदले सरपंच राहूल डिकॉस्टा, चिखलेचे पंच फ्रान्सिस्को नुनीस, आपचे ऍड. सुनील लॉरेन, ओलंसियो सिमोईस, आदली नगराध्यक्ष तारा केरकार, चिखलीचे आदले सरपंच सेबेस्ताव परेरा आनी हेर हाजीर आशिल्ले.
उमेदवार फर्नांडीस हांणी केंद्र आनी राज्य सरकाराचेर टिका केली, मोदी सरकारान नोटबंदी करून व्हडल्या उद्देगपतींक आनीक गिरेस्त केले असो दावो तांणी केलो. तांणी मुरगांव बंदरांतल्या कोळसो प्रदुशणाक वाव दिलो. कोविडाक लागून नागरिकांक जितलें मरण येवंक ना तितलें कोळसो प्रदुशणाक लागून आयलां. हांवें देशा खातीर २६ वर्सां काम केलें. खासदार जाल्यार गोंयच्या दरेका नागरिकांचे प्रस्न सोडोवपा खातीर फुडाकार घेतलो अशें तांणी स्पश्ट केलें. सागरमाला खाला गोंयच्यो दर्यादेगो केंद्र सरकाराक दिवचों ना. दाबोळी विमानतळाचो प्रस्न लोकसभेंत हाजीर करून दक्षीण गोंयचे जनतेक न्याय दिवपाचें आस्वासन तांणी दिलें.
भाजप संविधाना वांगडा लोकशाय सोंपोवपा खातीर ४०० पारची घोशणा करता. भाजप लोकशायेचो म्हत्वाचो घटक मतदानाचो हक्क सामान्य जनते कडल्यान काडून घेवपाचो यत्न करता असो दावो आमदार सरदेसाय हांणी केलो. मुरगांव बंदरांतल्या बॉक्सायटचो प्रस्न हाजीर करून थळाव्या आमदाराचेर तांणी टिका केली.
अमित पाटकार हांणी देश सेवा करपी खरो राष्ट्रभक्त आसता. हाचें उदाहरण म्हळ्यार कॅप्टन विरियतो फर्नांडीस जावन आसा, अशें सांगलें.
राज्य भाजप सरकारान मुरगांव बंदरांतल्या कोळसो प्रदूशणाची काळजी घेवपाक मुरगांवच्या आमदाराक नेमला. भाजप सरकार फकत आस्वासनां दिवपाक फुडाकार घेता. हें सरकार सगळ्या पांवड्याचेर अपेशी थारलां, अशें जुझे फिलीप डिसोझा हांणी सांगलें.