भांगरभूंय | प्रतिनिधी
-5 न्याय, 25 गॅरंटीचे न्यायपत्र, एमएसपी कायदो आनी जातीनिहाय जनगणनेचें आस्वासन
नवी दिल्लीः लोकसभा वेंचणुके खातीर काँग्रेसीन शुक्रारा 48 पानांचो जाहीरनामो प्रसिद्ध केलो. दिल्लींत मुख्यालयांत सोनिया, राहूल, खर्गे आनी घोशणापत्र समितीचे अध्यक्ष पी. चिदंबरम हांणी 5 न्याय आनी 25 गॅरंटीची घोशणा केल्या.
जाहीरनाम्यांत मजुरी वाडोवन दिसाक 400 रुपया करप, गरीब कुटुंबांतल्या बायलांक वर्साक 1 लाख रुपया दिवप, एमएसपी खातीर कायदो करप आनी जातीनिहाय जनगणना करप हांचो उल्लेख आसा.
काँग्रेसीन आपल्या जाहीरनाम्यांत तरणाटे, बायलां, मजूर आनी शेतकार हांचेर लक्ष केंद्रींत कलां. ह्या सगल्या विभागां खातीर विवीध प्रकारच्या येवजण्यांचें आस्वासन दिलां.
आपलो जाहीरनामो वर्क, वेल्थ आनी वेल्फेअर हाचेर आदारीत आशिल्ल्याचे पक्षान नमूद केलां. वर्क म्हणल्यार रोजगार, वेल्थ म्हणल्यार उत्पन्न आनी वेल्फेअर म्हणल्यार सरकारी येवजण्यांचो लाव दिवप आसा. -वन नेशन वन इलेक्शनाक विरोध. लोकसभा आनी विधानसभा वेंचणुको वेळारूच जातल्यो.
——————
काँग्रेसीच्यो म्हत्वाच्यो घोशणा
-मतदान ईव्हीएम वरवीं जातलें, पूण व्हीव्हीपीएटी स्लिप जुळयतले.
-10 शेड्युलांत सुदारणा करपाचें आस्वासन. ह्या खाला पक्षांतर जाल्यार विधानसभा वा संसदेचें वांगडीपद आपसूकच रद्द वा राज्य विधानमंडळांच्या देखरेखी खाला हाडटले.
-काँग्रेस देशव्यापी अर्थीक-सामाजीक जातनिहाय जनगणना करतली. ह्या माध्यमांतल्यान काँग्रेस जाती, पोटजाती आनी तांची अर्थीक -सामाजीक स्थिती जाणून घेतली. कसल्याच भेदभावा खेरीत सगल्यो जाती आनी समुदायांच्या लोकां खातीर शिक्षण आनी नाेकऱ्यांत अर्थीक नदरेन दुर्बल घटकां खातीर 10 टक्के आरक्षण लागू करतले.
-काँग्रेस अनुसूचीत जाती, जमाती, हेर मागासवर्ग आनी गरीब सामान्य प्रवर्गा खातीर आरक्षणा वयलीं 50 टक्के मर्यादा काडून उलयतली. अनुसूचीत जाती, जमाती आनी मागासवर्गीया खातीर राखीव आशिल्ली सगलीं रिती पदां काँग्रेस एका वर्सां भितर भरतले.
-ज्येश्ठ नागरीक, विधवा आनी दिव्यांगां खातीर केंद्र सरकारचे पेन्शनाचें योगदान दर म्हयन्याक फक्त 200-500 रुपया आसा. काँग्रेस पेन्शनाची रक्कम म्हयन्याक 1 हजार रुपया वाडयतली.
– 2025 पसून केंद्र सरकारच्यो अर्द्या (50 टक्के) नोकऱ्यो बायलां खातीर राखीव दवरतले.
-न्यायाधीश, सरकाराचे सचिव, उच्च दर्जाचे पुलीस अधिकारी अानी मंडळ संचालक हे सारक्या वरिश्ठ पदांचेर चडांत चड बायलांची नेमणूक करतले. स्वामिनाथन आयोगाच्या शिफारशी प्रमाण सरकारान जाहीर केल्ल्या किमान आधारभूत किमतीक कायदेशीर गॅरंटी दितले.
-कृशी खर्च आनी किंमत आयोग ही एक वैधानीक संस्था तयार करतले.
-काँग्रेस लोकांक भिरांतमुक्त करपाचें वचन दिता. प्रसारमाध्यमांच्या पूर्ण स्वातंत्र्या सयत भाशण आनी अभिव्यक्ती स्वातंत्र दिवपाचें आस्वासन काँग्रेसीन दिलां.
-काँग्रेस मानहानीच्या गुन्यांवाक गुन्यांवकारी थारावपाचे आनी निलंबन सोंपोवपाचें आस्वासन दितां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
