भांगरभूंय | प्रतिनिधी
केजरीवाल अटक प्रकरणांत पणजेंत उपोशण
पणजी: लोकसभा वेंचणुकेंत हार मुखार दिसत आशिल्ल्यानूच केंद्रांतलें भाजप सरकार विरोधी पक्षांच्या फुडाऱ्यांक सोंपोवंक सोदता. ‘ईडी’, सीबीआय सारक्या सरकारी यंत्रणांचो वापर करून विरोधी पक्षांच्या ज्येश्ठ फुडाऱ्यांक अटक करतात अशी टिका काँग्रेस प्रदेशाध्यक्ष अमीत पाटकार हांणी आयतारा केली.
सोरो घोटाळो प्रकरणांत ईडीन आम आदमी पक्षाचे (आप) राष्ट्रीय संयोजक तशेंच दिल्लीचे मुख्यमंत्री अरविंद केजरीवाल हांकां अटक केलया. हाचे आड इंडि आघाडीच्या फुडाऱ्यांनी आयतारा पणजेंतल्या आझाद मैदानार उपोशण केलें. त्या वेळार पाटकार पत्रकारां कडेन उलयताले.
आपचे राज्य निमंत्रक अमीत पालेकार, आमदार व्हेंझी व्हिएगश, क्रूज सिल्वा हांचे सयत काँग्रेस आमदार, लोकसभा वेंचणुकेंतले दोनूय उमेदवार आनी हेर पदाधिकारी हाजीर आशिल्ले.
ह्या वेळची लोकसभा वेंचणूक खंयचेय परिस्थितींत जिखचे नात हाची खात्री भाजपाक जाल्या. ताका लागून प्रधानमंत्री नरेंद्र मोदी विवीध पक्षांच्या मुखेल फुडार्यांक विवीध प्रकरणांत आडकावन तांकां सोंपोवपाचो यत्न करतात. ताचोच भाग म्हूण लोकसभा वेंचणुकेच्या तोंडार इंडि आघाडीत वांटेकार जाल्ले झारखंडचे आदले मुख्यमंत्री हेमंत सोरेन हांचे सयत दिल्लीचे मुख्यमंत्री अरविंद केजरीवाल हांकां अटक केली.
हाचे आदींय सोरो घोटाळ्याचो दावो करून दिल्लीतल्या आपच्या खूबशा फुडाऱ्यांचेर कारवाय केली. फक्त धोरण बदल्लें म्हूण केंद्र सरकारान आपाच्या फुडाऱ्यांचेर कारवाय केली. पूण गोंयांतल्या भाजपाच्या खूबशा फुडाऱ्यांचो भ्रश्टाचारच्या प्रकरणांती आस्पाव आसा. तांचेर ईडी कडल्यान कारवाय कित्याक जायना असो प्रस्नूय पाटकार हांणी उपस्थीत केलो.
केजरीवाल हांचे विचार व्हरतले मुखार: पालेकार
केंद्र सरकारान लोकसभा वेंचणूक दोळ्यां मुखार दवरून अरविंद केजरीवाल हांकां अटक केल्या. पूण आमी केजरीवालांचे विचार मुखार व्हरतले अशें अमीत पालेकार हांणी म्हणलें. केजरीवाल हांकां अटक जाले उपरांत गोंया सयत देशभरांत लाखांनी केजरीवाल तायर जाल्ल्याचें तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
