भांगरभूंय | प्रतिनिधी
– 68 टक्के थकबाकीदार उद्देगीक गिरायक
पणजीः राज्यांतल्या 1 लाख 30 हजार 87 वीज गिरायकांनी वट्ट 181 कोटी रुपयाची वीज बिलांची रक्कम फारीक करूंक नात. ही थकबाकी 27 मार्च अखेर मेरेनची आसा. हातूंत घरगुती, वेवसायीक, कृशी, उद्देगीक अशा विवीध प्रकारच्या गिरायकांचो आस्पाव आसा. सगल्यांत चड थकबाकी उद्देगीक वीज जोडण्यो घेतिल्ल्या गिरायकां कडल्यान येवपाची आसा. खात्याचे अधिक्षक अभियंता मयूर हेदे हांणी ही म्हायती दिली.
वट्ट थकबाकींतल्यान घरगुती गिरायकां कडल्यान वीज खात्याक 24 कोटी 66 लाख रुपया (13.62 टक्के) थकबाकी येवपाची आसा. जाल्यार कृशी जोडणी गिरायका कडल्यान 1 कोटी 86 लाख रुपया (1 टक्के), वेवसायीक जोडणी आसपी गिरायका कडल्यान 30 कोटी 82 लाख रुपया (17.02 टक्के) थकबाकी येवपाची आसा. ते उपरांत दिवचल 32.87 कोटी) आनी सांगें (23.08 कोटी) रुपया थकबाकी येवपाची आसा. धारबांदोडें म्हालांतल्यान सगल्यांत उणी म्हणल्यार 2 कोटी 17 लाख रुपया थकबाकी येवपाची आसा.
काणकोण म्हालांतल्यान 3.34 कोटी, सत्तरींतल्यान 4.05 कोटी, मुरगांवांतल्यान 5.23 कोटी, केपेंतल्यान 8.25 कोटी जाल्यार पेडणें म्हालांतल्यान 10.07 कोटी रुपया थकबाकी येवपाची आसा. सगल्या म्हालांत उद्देगीक वीज जोडणी आशिल्ल्या गिरायकां कडल्यान बिलां फारीक करिनासपाचें प्रमाण चड आसा. घरगुती जोडण्यांचो विचार केल्यार 24 कोटी 66 लाख रुपयांतल्यान सगल्यांत चड 6.08 कोटी रुपया थकबाकी बार्देश म्हालांतल्यान येवपाची आसा.
हाचे पयलीं खात्यान थकीत बिलां फारीक करपाक दोन खेपे ‘वन टायम सेटलमेंट’ येवजण सुरू केल्ली. ते वरवीं थकबाकीदारांक जोडणीच्या प्रकारा प्रमाण वीज बिलां तशेंच हत्प्यान भरपाची सुविधा उपलब्ध करून दिल्ली. कांय दिसां पयलीं खात्यान थकबाकीदारां विरोधांत व्हड मोहीम सुर केल्या. ते प्रमाण थकीत बिलां फारीक करूंक नात तांच्यो वीज जोडणी तत्काळ तोडटले अशें खात्यान स्पश्ट केल्ले.
————
साश्टींत सगल्यांत चड वीज गिरायक
राज्यांतल्या वट्ट गिरायकां मदीं साश्ट म्हालांत 1 लाख 44 हजार 366 वीज गिरायक आसात. ह्या म्हालांत सगल्यांत चड 1 लाख 17 हजार 874 वीज गिरायक आसात. उद्देगीक आनी वेवसायीक वीज जोडण्यो लेगीत चड आसात. जाल्यार फोंडें म्हालांत सगल्यांत उणें 2,263 कृशी वीज जोडण्यो आसात.
————–
-वट्ट 6 लाख 89 हजार 352 सक्रीय गिरायक.
– 5 लाख 59 हजार 50 घरगुती गिरायक
– 1 लाख 11 हजार 269 वेवसायीक जोडण्यो
-12 हजार 855 कृशी जोडण्यो
-6117 उद्देगीक जोडण्यो
-हेर प्रकारच्यो 61 जोडण्यो
————-
म्हाल/ थकबाकीदार/थकबाकीची रक्कम (कोटी रुपयांत)
फोंडें 14,971/ 35.61
दिवचल 9,222/ 32.87
सांगेंः 1,656/ 23.08
तिसवाडी/16,628/ 19.88
बार्देश/21,604/18.54
साश्ट/ 24,779/17.93
पेंडणे/12,451/10.07
केपें/ 7,530/ 8.25
मुरगांव/ 10,872/5.23
सत्तरी/4,497 /4.05
काणकोण 4,211/3.34
धारबांदोडें/ 1,696/ 2.17
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
