दक्षीण गोंय भाजप जिखतलो काय काँग्रेस राखतलो?

भांगरभूंय | प्रतिनिधी

पणजीः दक्षीण गोंयांत 2014 चे लोकसभा वेंचणुकेंत भाजपाक काँग्रेसी कडल्यान दाबोळी, कुठ्ठाळी, फातोड्डें आनी मडगांव हे गड फोडपाक येस आयिल्लें, पूण 2019 चे लोकसभा वेंचणुकेंत तांकां ते गड राखपाक अपेस आयिल्लें. फक्त दाबोळी मतदारसंघ सोडून हेर तिनूय मतदारसंघ परतून काँग्रेसी कडेन गेले.

आतां 2024 चे लोकसभा वेंचणुकेंत भाजपान दक्षीण गोंय मतदारसंघांत पल्लवी धेंपो ही नवी उमेदवार दिल्ल्यान तशेंच काँग्रेसीचे उमेदवार कॅ. विरियातो फर्नांडीस हे दाबोळी मतदारसंघांतले आशिल्ल्यान राजकी समिकरणां कशीं बदलतलीं तें पळोवचें पडटलें.

दक्षीण गोंयांत 2009 चे लोकसभा वेंचणुकेंत काँग्रेसीचे उमेदवार फ्रान्सीस सार्दीन हांकां दाबोली मतदारसंघांतल्यान 4659 मतां जाल्यार भाजपाचे उमेदवार नरेंद्र सावयकार हांकां 4345 मतां पडिल्लीं. काँग्रेसीक 314 मतांची आघाडी मेळिल्ली. जाल्यार कुठ्ठाळी मतदारसंघांत काँग्रेसीन 6584 मतां जाल्यार भाजपान 4016 मतां मेळयिल्लीं. 2532 मतांची आघाडी काँग्रेसीक मेळिल्ली. फातोड्डें मतदारसंघांत काँग्रेसीन 6109 मतां जाल्यार भाजपाक 5736 मतां पडिल्लीं. त्या वेळार 373 मतांची आघाडी काँग्रेसीन घेतिल्ली. तशेंच मडगांव मतदारसंघांत काँग्रेसीन 8247 मतां जाल्यार भाजपान 6790 मतां घेतिल्लीं. 1457 मतांची आघाडी काँग्रेसीक मेळिल्ली.

2014 चे वेंचणुकेंत भाजपाचें आनी मोदी हांचें ल्हार आयिल्लें. ते खातीर तें चित्र बदलिल्लें. दक्षीण गोंयांतल्या दाबोळी मतदारसंघांत भाजपाचे उमेदवार नरेंद्र सावयकार हांकां 8556 मतां जाल्यार काँग्रेसीचे उमेदवार आलेक्स रेजिनाल्ड हांकां 5261 मतां पडिल्लीं. 3291 मतांची आघाडी भाजपान घेतिल्ली. कुठ्ठाळी मतदारसंघांत भाजपाक 9607 आनी काँग्रेसीक 8981 मतां मेळिल्लीं. 626 मतांची आघाडी भाजपान घेतिल्ली. फातोड्डें मतदारसंघांत भाजपान 9715 आनी काँग्रेसीन 9277 मतां घेतिल्लीं. भाजपान 438 मतांची आघाडी मेळयिल्ली. जाल्यार मडगांव मतदारसंघांत भाजपान 10,198 आनी काँग्रेसीन 9070 मतां मेळयिल्लीं. 1128 मतांची आघाडी भाजपान घेतिल्ली. पूण परतून 2019 चे लोकसभा वेंचणुकेंत चित्र परतून बदल्लें.

दक्षीण गोंयचे कुठ्ठाळी, फातोड्डें आनी मडगांव हे गड काँग्रेसीन परतून जिखले. फक्त दाबोळी मतदारसंघ राखपाक भाजपाक येस आयलें. दाबोळी मतदारसंघांत भाजपाचे उमेदवार नरेंद्र सावयकार हांकां 9782 मतां जाल्यार काँग्रेसीचे उमेदवार फ्रान्सीस सार्दीन हांकां 6003 मतां पडिल्लीं. 3779 मतांची आघाडी भाजपाक मेळिल्ली. कुठ्ठाळींत काँग्रेसीक 9875 आनी भाजपाक 9791 मतां पडिल्लीं. 84 मतांची भाजपान आघाडी घेतिल्ली. फातोड्डें मतदारसंघांत काँग्रेसीक 10,696 जाल्यार भाजपाक 10058 मतां पडिल्लीं. काँग्रेसीन 638 मतांची आघाडी घेतिल्ली. मडगांवां काँग्रेसीन 11,082 मतां जाल्यार बाजपाक 9046 मतां मेळिल्ली. 2036 मतांची आघाडी काँग्रेसीक मेळिल्ली.