भांगरभूंय | प्रतिनिधी
प्रधानमंत्री नरेंद्र मोदीः मतांच्या तुश्टीकरणाची काँग्रेसीची चाल, तर भाजपाची संतुश्टीकरणाची मोख
भांगरभूंय । प्रतिनिधी
पणजीः लोकांची सपनां होच म्हजो संकल्प आसा. तेच खातीर आपूण दीसरात काम करतां. काँग्रेसीच्या गोंयांतल्या उमेदवारान संविधाना संबंदांत केल्ल्या विधानांतल्यान काँग्रेसीचो छुपा अजेंडा उक्तो जाला. फक्त मतांच्या तुश्टीकरणा खातीर काँग्रेस ही चाल खेळटा, असो आरोप प्रधानमंत्री नरेंद्र मोदी हांणी केलो. भाजप सरकाराक तुश्टीकरण न्हय, जाल्यार लोकांचें संतुश्टीकरण करपाचें आसा, अशें तांणी स्पश्ट केलें.
लोकसभा वेंचणुकेंतल्या गोंयच्या भाजप उमेदवारांच्या प्रचारा खातीर शेनवारा सांकवाळे आयोजीत केल्ले जाहीर सभेंत प्रधानमंत्री उलयताले. मुख्यमंत्री डॉ. प्रमोद सावंत, भाजप प्रदेशाध्यक्ष तशेंच राज्यसभा खासदार सदानंद शेट तानावडे, केंद्रीय मंत्री तशेंच उत्तर गोंयचे उमेदवार श्रीपाद नायक, दक्षीण गोंयची उमेदवार पल्लवी धेंपो हांचे सयत मंत्री, भाजप आमदार ह्या वेळार हाजीर आशिल्ले. हे सभेक 50 हजारां परस अदीक लोकांची हाजेरी आशिल्ली.
काँग्रेसीचे दक्षीण गोंयचे उमेदवार विरियातो फर्नांडीस हांणी कांय दिसां आदीं एके सभेंत उलयतना, केंद्रान भारतीय संविधान गोंयाचेर थापलां, अशें विधान केल्लें. ह्या विधाना वयल्यान प्रधानमंत्री मोदी हांणी छत्तीसगडांतले सभेंत काँग्रेसीचेर खर टिका केल्ली. ते उपरांत गोंयांतले सभेंत ते कितें उलयतले हाचेर सगळे कान दिवन राविल्ले. अखेर मोदी हांणी सांकवाळचे सभेंत लेगीत ह्या विधाना वयल्यान काँग्रेसीचेर टिकेचो शिंवर केलो.
काँग्रेस भारतीयां मदीं नकारात्मकता पातळयता. फक्त व्होटबँक सांबाळपा खातीर तुश्टीकरणाची चाल काँग्रेसीन आंखल्या. तेच खातीर काँग्रेसीच्या फुडाऱ्यां कडल्यान तशे तरेचीं विधानां करतात. पूण देशांतल्या लोकांक काँग्रेसीची ही चाल खबर आसा. ताका लागून लोकूच लोकसभा वेंचणुकेंत इंडिया आघाडेक धडो शिकयतले, अशें मोदी हांणी सांगलें.
मजगतीं, गोंय, देशा खातीर आपल्याक खूब कितें करपाचें आसा. फाटल्या 10 वर्सांच्या काळांत केंद्र सरकारान गोंयांत मुळाव्या साधनसुविधां सयत पर्यटनाक घटसाण दिल्या. ई टुरिस्ट व्हिसाचो सगळ्यांत चड लाव आयज गोंयाकूच मेळटा. गोंयचे उदरगतीचो रथ फुडल्या काळांत लेगीत मुखार व्हरचे खातीर भाजपाच्या दोनूय उमेदवारांक वेंचून दियात, असोय उलो मोदी हांणी मारलो.
गोंयकारां खातीर मोदी हांच्यो सात गॅरंटी
म्हजे जिणेक गोंयांतल्यानूच ‘टर्नींग पॉयंट’
म्हजे जिणेक गोंयांतल्यांतनूच टर्नींग पॉयंट मेळ्ळो. म्हाका प्रधानमंत्रीपदाचो उमेदवार करपाचो निर्णय भाजपान गोंयांतूच घेतिल्लो. म्हजें भाग्य गोंयांतूच बरयतात. एक भारत- श्रेश्ठ भारताचें गोंय ही जिवी देख. गोंयांत जितलीं व्हड देवळां आसात, तितल्योच सोबीत चर्ची आसात. तेच खातीर संवसारभरांतले पर्यटक गोंया कडेन आकर्शीत जातात, अशें प्रधानमंत्री नरेंद्र मोदी हांणी सांगलें.
मुख्यमंत्र्यांची तुस्त- तोखणाय
सबका साथ- सबका विकास हे घोशणे प्रमाण केंद्र आनी गोंयांतलें भाजप सरकार काम करता. कसलेच तरेचो भेदभाव करिनासतना सरकारी येवजण्यांचो सगळ्यांक लाव दिवप हेंच भाजप सरकाराचें ध्येय आशिल्लें. ते प्रमाण मुख्यमंत्री डॉ. प्रमोद सावंत हांच्या फुडारपणा खालच्या सरकारान गोंयांतल्या 100 टक्के घरांक शौचालय, वीज, उदक, गॅस सिलिंडरांची पुरवण दिवन समाजीक न्याय म्हणल्यार कितें, तें सगळ्यांक दाखयलां. गोंय आयज सगळेच बाबतींत हेर राज्यां मुखार रोल मॉडेल आसा, अशें सांगून प्रधानमंत्री नरेंद्र मोदी हांणी मुख्यमंत्री डॉ. प्रमोद सावंत हांणी तुस्त तोखणाय केली.
लसीकरणांत गोंयाक प्राधान्य
गोंयांतल्या लोकांचे बेगिनात बेगीन लसीकरण जालें जाल्यार पर्यटक भियेनासतना गोंयांत येतले. ताचो फायदो गोंयच्या पर्यटना सयत ताचेर चलपी वेवसाय, उद्देगांक मेळटलो, ह्याच उद्देसान केंद्रांतल्या भाजप सरकारान कोवीड लसीकरणांत गोंयाक पयलीं संद दिली. गोंयांत फक्त दोनूय खासदार आसात, पूण आमी केन्नाच वेंचणुकांचो विचार करूंक ना. उदरगत आनी लोकांचे भलायकेक आमी प्राधान्य दिलें, अशें प्रधानमंत्री मोदी हांणी सांगलें.
काँग्रेसीन लोकांची माफी मागपाकूच जाय
काँग्रेसीन गोंया सयत देशभरांतल्या लोकां मदीं ईव्हीएम मशिना संबंदांत दुबाव निर्माण करपाक सुरवात केल्ली. ते संबंदांत काँग्रेस फुडारी सर्वोच्च न्यायालयांत लेगीत गेल्ले. पूण सर्वोच्च न्यायालयान ईव्हीएम मशिना वरवीं जावपी मतदान पारदर्शक आशिल्ल्याचें स्पश्ट केलां. ते खातीर देशभरांतल्या लोकां मदीं दुबाव पातळावपी काँग्रेसीन भारतियांची माफी मागपाकूच जाय, अशेंय प्रधानमंत्री मोदी हांणी सांगलें.
विरियातो, खलप हांकां घरा धाडातः मुख्यमंत्री
भारतरत्न डॉ. बाबासाहेब आंबेडकर हांचे राज्यघटनेचो अपमान करपी कॅ. विरियातो फर्नांडीस आनी बँक लुटपी अॅड. रमाकांत खलप हांकां गोंयकार घरा बसयतले, अशें सांगून मुख्यमंत्री डॉ. प्रमोद सावंत हांणी काँग्रेसीचेर खर टिका केली. दाबोळी विमानतळ हे मुखार लेगीत चालू उरतलो, ही आमची गॅरंटी अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
