भांगरभूंय | प्रतिनिधी
राजस्थान रॉयल्सान इंडीयन प्रिमीयर लिगेंतली आपली प्ले ऑफांतली सुवात लागींलागीं निश्चीत केल्या. लखनौ सुपर जायण्ट्सा आड ताणें 7 विकेटींनी जैत जोडलें. ह्या जैता सयत ताचे 16 गूण जाल्यात. लोकेश राहुल आनी दीपक हुडा हांचे अर्द शेंकड्याचे खेळीक संजू सॅमसन आनी ध्रुव जुरेल हाणें खर जाप दिली.
राहुल आनी दीपक हांच्या अर्द शेंकड्यां नेटार लखनौ सुपर जायण्ट्सान निर्धारीत 20 ओव्हरींनी 5 विकेटी व्हगडावन 196 धांवड्यो केल्यो. ट्रॅण्ट बोल्टान पयले ओव्हरींत क्विंटन डी कॉक (8) हाका बोल्ड केलो. ते उपरांत संदीप शर्मान दुसरे ओव्हरींत मार्कस स्टॉयनीसाक (0) बोल्ड करून लखनौक 11 धांवड्यांचेर दुसरो धपको दिलो. पूण, मुखेली राहुल आनी दीपक हे जोडयेन फकत डाव सांबाळूंक ना जाल्यार पंगडाक आव्हानात्मक धांवसंख्या उबारून दिली. अखेरेक ही जोडी आर आश्विनान 13वे ओव्हरींत फोडली. ताणें दीपक हुडाक बाद केलो. दीपकान 31 बॉलांनी सात चवक्यांचे मजतीन 50 धांवड्यो केल्यो. अशे तरेन राहुला वांगडी ताची 62 बॉलांनी 115 धांवड्यांची भागिदारी सोंपली.
राहुलान 48 बॉलांनी आठ चवके आनी दोन सक्यांचे मजतीन 76 धांवड्यो केल्यो. आयुष बदोनीन 18, कृणाल पांड्यान 15 आनी निकोलस पुरनान 11 धांवड्यांचें योगदान दिलें.
मोखीचो फाटलाव करपी राजस्थानाक यशस्वी जयस्वाल आनी जॉस बटलर हाणें बरी सुरवात करून दिली. तांणी पांच ओव्हरींनी 50 धांवड्यो केल्यो. यश दयालान सवे ओव्हरींत लखनौक येस मेळोवन दिलें. ताणें बटलराक बाद केलो. बटलरान 18 बॉलांनी चार चवके आनी एका सक्याचे मजतीन 34 धांवड्यो केल्यो. फुडले ओव्हरींत स्टॉयनीसाक व्हड येस फावो जालें. ताणें यशस्वीक (24) बाद केलो. रियानाक (14) अमित मिश्रान बाद केलो. ते उपरांत ध्रुव आनी संजू हाणें संयमान बॅटींग करून अर्द शेंकड्याची भागिदारी पुर्ण केली आनी राजस्थानाची गाडी रुळाचेर हाडली.
संजून 15वे ओव्हरींत गियर बदल्लें आनी रवी बिश्नोईचे एके ओव्हरींत 16 धांवड्यो केल्यो. राजस्थानाक निमाण्या चार ओव्हरींनी 37 धांवड्यांची गरज आशिल्ली. सॅमसनान 28 बॉलांनी अर्द शेंकडो पुर्ण केलो. ध्रुवान 31 बॉलांनी अर्द शेंकडो पुर्ण केलो. दोगांयनी 121 धांवड्यांची भागिदारी करून राजस्थानाक सोंपें जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
