भांगरभूंय | प्रतिनिधी
येजमान दिल्ली कॅपिटल्सान सेगीत दुसरे मॅचींत जैत जोडलें. काल जाल्ले पयले इंडीयन प्रिमीयर लिगेंत (आयपीएल) मॅचींत ताणें मुंबय इंडियन्साक 10 धांवड्यांनी हारयलो. हे मॅचींत लेगीत 500 परस चड धांवड्यो जाल्यो. 257 धांवड्यो करून लेगीत दिल्ली कॅपिटल्साक जैत जोडपाक बरोच नेट लावचो पडलो. ह्या जैता सयत दिल्लीन गुणतकट्यांतली पांचवी सुवात मेळयली. मुंबय इंडियन्सान 258 धांवड्यांचे मोखीचो फाटलाव करतना खर संघर्श केलो. पूण, ताका 9 विकेटी व्हगडावन 247 धांवड्यां मेरेन मजल मारप शक्य जालें.
दिल्ली कॅपिटल्साच्या जैतांत जॅक फ्रेजर मक्गर्क हिरो थारलो. पावर प्लेंत ताणें मुंबय इंडियन्साक बॅकफुटाचेर धुकल्लो. फ्रेजरान पयलेच ओव्हरींत तीन चवके आनी एक सको मारून आपलो हेतू स्पश्ट केल्ले. जसप्रीत बुमरान घाल्ले दुसरे ओव्हरींत ताणें दोन चवके आनी एक सको मारलो. फकत 15 बॉलांनी अर्द शेंकडो मारून ताणें आपल्याच विक्रमाची बरोबरी केली. आठवे ओव्हरींत बाद जावचे पयलीं ताणें फकत 27 बॉलांनी 84 धांवड्यो केल्ल्यो. हातूंत 11 चवके आनी स सक्यांचो आस्पाव आशिल्लो. फ्रेजरान पावरप्लेंत 78 धांवड्यो केल्ल्यो. पयल्या स ओव्हरींनी खंयच्याय बॅट्समनान केल्लो हो तिसऱ्या क्रमांकाचो सर्वोच्च स्कोर आसा.
दिल्ली कॅपिटल्सान जरी 257 धांवड्यो स्कोर उबारिल्लो. पूण, मुंबय इंडियन्साक बरी सुरवात मेळिल्ली जाल्यार दिल्लीक लेगीत हारीचें तोंड पळोवपाची पाळी येवपाक शकताली. पूण, पावरप्लेंत फास्ट बॉलरांनी तशें जावपाक दिवंक ना. पयल्या स ओव्हरींनी दिल्ली कॅपिटल्साक बरे स्थितींत हाडलो.
ईशान किशन, रोहीत शर्मा आनी सुर्यकुमार यादव हांच्या रुपान मुंबय इंडियन्साच्यो तीन म्हत्वाच्यो विकेटी दिल्लीक पावरप्लेंतूच मेळ्ळ्यो.
ईशान किशन आनी रोहीत शर्मा हांच्या कडल्यान मुंबय इंडियन्साक आक्रमक जापेची आस्त आशिल्ली. पूण, खलील अहमदान चवथे ओव्हरींत रोहीताक (8) बाद केलो. मुकेश कुमारान आपले पयले ओव्हरींत अचूक टप्प्याचेर बॉल घालून ईशानाक (20) बाद केलो. इम्पॅक्ट प्लेयर सुर्यकुमार यादव (20) हाका लेगीत खलीलान फिशालकायेन बाद करून तंबूंत धाडलो.
मुखेल हार्दीक पांड्याचेर सगली भिस्त आशिल्ली. ताणें कुलदीप यादवाचे एके ओव्हरींत तीन चवके आनी एक सको मारून 19 धांवड्यो केल्यो. हार्दीकान चवथे विकेटी खातीर तिलक वर्मा वांगडा 39 बॉलांनी 71 धांवड्यो केल्यो. हार्दीक बऱ्या फॉर्मांत दिसतालो. पूण, इम्पॅक्ट प्लेयर रसिख सलामान दिल्लीक म्हत्वाची विकेट मेळोवन दिली. हार्दीक 24 बॉलांनी चार चवके आनी तीन सक्यांचे मजतीन 46 धांवड्यांचेर बाद जालो. रसिखान तेच ओव्हरींत नेहाल वढेराक (4) बाद करून मुंबय इंडियन्साचो अर्दो पंगड 140 धांवड्यांचेर तंबूंत धाडलो.
36 बॉलांनी 106 धांवड्यांची गरज मुंबयक आशिल्ली. तिलकान 15वे ओव्हरींत कुलदीपचे बॉलिंगेचेर 21 धांवड्यो केल्यो. तिलकान 25 बॉलांनी अर्द शेंकडो पुर्ण केलो.
रसिखान 17वे ओव्हरींत फकत 7 धांवड्यो दिवन मुंबयचेर चेपण हाडलें. मुंबयक 18 बॉलांनी 64 धांवड्यांची गरज आशिल्ली. टीम डॅव्हिडान 18वे ओव्हरींत दोन सके आनी एक चवको मारलो. पूण, मुकेशान बॉलिंगेंत बदल केलो आनी ऋषभ पंत लेगीत विकेटीच्या लागसार येवन उबो रावलो. ताका लागून डॅव्हिका क्रिजींत रावपाचें चेपण आयलें आनी चवथ्या बॉलाचेर तो एलबीडब्ल्यू बाद जालो. डॅव्हिडान 17 बॉलांनी दोन चवके आनी तीन सक्यांचे मजतीन 37 धांवड्यो करून बाद जालो आनी तिलक सयत ताची 29 बॉलांनी 70 धांवड्यांची भागिदारी फुटली. पूण, तिलक अखेरचो बॉल शिमे भायर धाडलो आनी 12 बॉलांनी 41 अशी मॅच हाडली. रसिखान ताचे चवथे आनी डावांतले 19वे ओव्हरींत मुंबयच्या मोहम्मद नबीक (7) बाद करून मॅचीतली उमळशीक वाडयली.
अखेरचे ओव्हरींत मुंबयक 25 धांवड्यांची गरज आशिल्ली आनी तिलक स्ट्रायकाचेर आशिल्लो. पयल्या बॉलाचेर दोन धांवड्यो करपाच्या यत्नांत तिलक धांवबाद जालो. ताणें 32 बॉलांनी चार चवके आनी चार सक्यां सयत 63 धांवड्यांचेर बाद जालो. मुंबय इंडियन्साक 9 बाद 247 धांवड्यो करप शक्य जाल्यो आनी दिल्लीन 10 धांवड्यांनी जैत जोडलें.
10 मॅचींतल्यान 10 गूण घेवन दिल्ली कॅपिटल्सान प्ले ऑफांत सुवात मेळोवपाची आपली आस्त कायम राखल्या. ह्या जैतान ताका थाकाय मेळ्ळ्या आसतले. दुसरे वटेन 9तल्यो स मॅची हारिल्ल्यान मुंबय इंडियन्साचो फुडलो मार्ग कठीण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
