भांगरभूंय | प्रतिनिधी
उज्ज्वल निकम हांचो गोंया कडेन लागींचो संबंद, खलप हांचेय सोयरे
भांगरभूंय । प्रतिनिधी
पणजीः आतंकवादी अजमल कसाबाक फांसार दिवपी नामनेचो वकील उज्ज्वल निकम हांकां भाजपान लोकसभा वेंचणुकेंत मुंबय उत्तर मध्य ह्या मतदारसंघांतल्यान उमेदवारी दिल्या. उज्ज्वल निकम हे उत्तर गोंयचे काँग्रेस उमेदवार अॅड. रमाकांत खलप हांच्या व्हडल्या भावाचो पूत महेश खलप हांचे मांव. तशेंच उज्ज्वल निकम हे आदले खासदार तशेंच काँग्रेसीचे ज्येश्ठ फुडारी शांताराम नायक हांचे मेवणे लेगीत आसात. शांताराम नायक हांची घरकान्न तशेंच महिला काँग्रेसीची प्रदेशाध्यक्ष बिना नायक हांचे ते भाव. कुटुंबीक कार्यावळी निमतान उज्ज्वल निकम गोंयांत येतात. भाजप- काँग्रेस ह्या मुखेल पक्षांनी हे खेपे महाराष्ट्र, गोंयांत सोयऱ्यांक उमेदवारी दिल्ल्यान राजकी मळार चर्चा चालू जाल्या.
मुंबयच्या 1993 चो बॉम्बस्फोट आनी 26/11 च्या आतंकवादी हल्ल्यांच्या खटल्यांक लागून उज्ज्वल निकम देशभरांत उजवाडाक आयिल्ले. देशांतल्या म्हत्वपूर्ण खटल्यांनी तांणी सरकारी वकील म्हूण येसस्वी कामगिरी केल्या. हाचीच दखल घेवन भाजपान तांकां मुंबयच्या उत्तर मध्य मतदारसंघांतल्यान उमेदवारी जाहीर केल्या. उज्ज्वल निकम हांचे गोंया कडेन लागींचे संबंद आसात. काँग्रेस उमेदवार अॅड. खलप हांच्या व्हडल्या भावाचो पूत महेश हाचो निकम हे मांव. ते खातीर महाराष्ट्र आनी गोंयांत दोन लागींचे सोयरे काँग्रेस आनी भाजपाचे उमेदवारीचेर लोकसभा वेंचणूक लडयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
