भांगरभूंय | प्रतिनिधी
दरेक राजकी फुडारी जेन्ना इलेसांवाक आपल्या पक्षाचे उमेदवार उबे करतात, तेन्ना आपलो पक्ष इलेसांव जिखल्यार बेस बरें, निवळ आनी ‘पारदर्शक’ राजकारभार प्रजेक दितले म्हण आश्वासनां दिता. एकदम सरकार घडयिल्लें म्हणटकच ‘पारदर्शक’ राजकारभार दिवपाक जी प्रजेक भास दिल्या ती सारके विसरता. आमी ताका लागून, जायती उदरगत केल्या आसतना, पर्यान, फुडल्या इलेसांवांक राज्य करपी पक्ष वेंचणूक हारता वा लोक त्या पक्षाक हारयता.
बरो राजकारभार
आयच्या काळार बरो राजकारभार म्हणल्यार फकत उदरगत करप न्हय. दुसऱ्या उतरांनी फकत रस्ते, पूल, इमारती आदीं बांदल्यो म्हण जायना. आयच्या काळार बरें राजकारभार म्हणल्यार उदरगत करचे करून प्रजे लागीं बरे संबंद दवरप. बरो राजकारभार म्हणल्यार फकत गिरेस्त आनी धंदेकारांचेंच बरेंपण पळोवप न्हय पूण आम आदमी हाची परामर्स करप. हें आमच्या राजकारभारांत घडटा काय?
आम आदमी
‘आम आदमी’ लोकशायेंत सरकार घडपाची आनी जाय जाल्यार फुडल्या इलेसांवाक तोच सरकार मोडपाची व्हड शक्ती जावन आसा. हें जाणा आसतना पर्यान ‘आम आदमी’ क ह्या राजकारभारांत कितलें म्हत्व आसा तें पळोवया. ऑफिसांत गेल्यार पयले सुवातेर ताका कोणूच मान आनी रेस्पेद दिना. कसलेंय काम आसल्यार तें आयज जावंक ना फाल्यां यो म्हण सांगतात. ‘आम आदमी’ चें चुरचुरे कित्याक मेजा पोंदच्यान दुडू दिल्या शिवाय ताचें कसलेंच काम जायना. खरेपणी आमचो ‘आम आदमी’ जाका सरकार घडपाची नी मोडपाची ताकत आसा. ‘जाम आदमी’ जाला कसो दिसता.
सरकारी नोकर
आमच्या सरकारी ऑफिसांनी सरकारी ऑफिसर आसात. ते आपूण प्रजेचे सेवे पासत आसात म्हूण मानून घेनात. त्या खातीर ‘आम आदमी’ची आयज अशी दुर्दशा जाल्या. सरकारी ऑफिसर प्रजा टॅक्स फारीक करता. ताचेर जगता पूण टॅक्स फरीक करपी ‘आम आदमी’ मात कसलोच रेस्पेत दिना. आमचें राजकारभार सुधारतलो जाल्यार पयले नी वयले सुवातेर सगळ्या सरकारी कामगारांक ते विशीं प्रशिक्षण दिवपाची ताकतीक गरज आसा. राजकारभार ‘पारदर्शक’ जातलें जाल्यार ह सरकारी नोकर ‘पारदर्शक’ आसपाची गरज आसा.
जागृताय
‘आम आदमी’ जाका राजकी फुडारी इलेसांवांच्या वेळार कोनश्या कोनश्यांनी सोदूंक भोंवता ताका राजकारभाराची इल्ली पूण म्हायती दिवपाची ताकतीक गरज आसा. ‘आम आदमी’वा शिकिल्लो ना तर शिकोवंक नाशिल्लो आसूं येता. तो कसलोय आसूं. ताका समजता त्या भाशेंत सरकाराच्या येवजण्यांची म्हायती पावपाक जाय. प्रजे भितर ही जागृताय हाडपाक जाय. आनी हो प्रचार करपाक आयज रेडियो, टि.व्ही. इंटरनेट पत्रां, आदीं माध्यमां आसात. अशें केल्यार प्रजे भितर जागृताय वाडटली. सरकार हें करता काय?
नविदाद
आपलो राजकारभार लोकांचे आवडीचो करतलो जाल्यार सरकारान कांय नविदादी आपल्या राजकारभारांत भितर काडच्यो पडटल्यो. हाचे वरवीं लोकांची कामां सडसडीत जातलीं आनी त्याच बराबर लोकांक आनी सरकारा भितर संबंध अदीक घट्ट जातलो. आयज आमी 21 व्या शेंकड्यांत जियेतात ‘टॅक्नालजी’ खूब फुडें पावल्या. ‘ई- मेला’ वरवीं एका खिणा भितर, चड देसपेज नासतना, म्हायती खंयसरुंय पावंक शकता. आमच्या सरकारान ‘ई- मेला’-चो वापर करूंक सुरवात करप खूब गरजेचें आसा. ‘ई- मेला’वरवीं संबंधीत लोकांचे ‘प्रपोजल’ हांची कारवाय केल्यार खूब फायद्याचें जातलें. सरकारी ऑफिसांनी वेळा-वेळार लोकांचीं कामा करपाची एक नवें वातावरण तयार जातलें. आनी अशें घडप खूब म्हत्वाचें आसा.
टेलफोन
आयज आमचे ‘टेलफोन’ खूब सुदारल्यात. टेलफोना वरवीं लोकांच्यो कागाळी आयकून घेवप, ताची नोंद करप नी ताचेर कारवाय करप ह पध्दत आमच्या राजकाभारांत भितर हाडली जाल्यार प्रजेक खूब बऱ्याक पडटलें आनी सरकाराकूय खरेंच प्रमाणीकपणीं लोकांचीं सेवा करता म्हण दिसून येतलें. खरेंपणीं सरकार खरेंच ‘आम आदमी’क बरेंपण हाडूंक सोदता म्हण दिसतलें.
सोंपयतना…
आमच्या सरकारी ऑफिसांनी सगळ्या वातावरण बदल करपाची गरज आसा. सरकारी कामदा-यांक पयले सुवातेर मुखामळार हांसो कसो खेळोवपाचें तें शिकोवपाची गरज आसा आयच्या आधुनीक काळार ई-मेला वरवीं आनी ‘टेलेफान’ हांचो वापर करून आपलीं कामां करून घेवपाक प्रजेक सवलत मेळिल्लीं जाल्यार सरकाराक ‘आम आदमी’चो खरेंच हुस्को आनी म्हण कळटलें. आनी त्याच बराबर सरकार आनी प्रजे मदलो संबंध अखंड जातलो. दुसऱ्या शब्दांनी सरकारांत ‘पारदर्शक’ हाडपाची सुरवात जातली.
तोमाझीन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
