भांगरभूंय | प्रतिनिधी
– उत्तर गोंयांत आपले जैत निश्चीतः खलप
-सामान्यांची लडाय दिल्ली मेरेन: विरियातो
पणजी/मडगांवः लोकसभा वेंचणुके खातीर उत्तर गोंयच्यान अॅड. रमाकांत खलप आनी दक्षीण गोंयच्यान कॅ. विरियातो फर्नांडीस हांणी काल रामनमीच्या म्हुर्तार उमेदवारी अर्ज दाखल केले. उत्तर गोंय जिल्होधिकारी स्नेहा गिते हांणी तांचो उमेदवारी अर्ज स्विकारलो. जाल्यार दक्षीण गोंयांत जिल्होधिकारी अश्विन चंद्रू ए. हांचे कडेन कॅ. विरियातो फर्नांडीस हांणी उमेदवारी अर्ज दाखल केलो.
ह्या वेळार पक्ष फुडारी युरी आलेमांव, काँग्रेस प्रदेशाध्यक्ष अमीत पाटकार, हळदोणेंचे आमदार कार्लुस फेरेरा आनी आम आदमी पक्षाचे गोंय समन्वयक अमीत पालेकार हजर आशिल्ले. तशेंच दक्षीण गोंयांत उमेदवारी अर्ज दाखल करतना विरियातो हांचे वांगडा विरोधी पक्ष फुडारी युरी आलेमांव, गोवा फॉरवर्ड अध्यक्ष विजय सरदेसाय, आमदार कॅ. व्हेंझी व्हिएगस हाजीर आशिल्ले. ह्या वेळार इंडी आघाडीचे फुडारी आनी कार्यकर्तेय व्हड संख्येन हाजीर आशिल्ले.
तशेंच राज्यांतलीं रानां, न्हंयो, दर्यादेग वाठार, शेतजमनी आनी पर्यावरणाच्या संरक्षणा खातीर कॅ. विरियातो फुडें सरून लेगीत तांचेर सरकारान गुन्यांव नोंद केला. वेंचणूक आयोगाच्या निर्देशां प्रमाण तांचे वयलो गुन्यांव भौशीक केला. दक्षीण गोंयच्या लोकांक हाचो अभिमान आसतलो. कारण हो गुन्यांव तांणी लोकां खातीर आपल्या आंगार घेतला. म्हणून दक्षीण गोंयचे लोक तांचे वांगडा रावतले, अशें काँग्रेस प्रदेशाध्यक्ष अमीत पाटकार हांणी सांगलें.
इंडी आघाडीचे आनी काँग्रेसीचे फुडारी ह्या सगळ्यांनी मेळून रमाकांत खलप हांच्या फुलांहार घालून परबीं भेटयली. उत्तर गोंयांतल्या खलप हांचे जैत निश्चीत आसा, अशें तांणी म्ह्या वेळार म्हणलें.
फाटलीं 25 वर्सा उत्तर गोंयचो आवाज लोकसभेंत पावलो ना देखून हे फावट काँग्रेसीन अापणाक तिकेट दिल्या. स्वता सोनिया गांधी हांणी तिकेटी विशींची भुमिका स्पष्ट करून म्हजी योग्य उमेदवार म्हण निवड केल्या, अशें खलप हांणी सांगलें.
इंडी आघाडीचो उत्तर गोंयचो उमेदवार 50 हजार मताधिक्क्यान वेंचून येतलो, असो विश्वास खलप हांणी उक्तायला. काँग्रेसीक दक्षीण गोंया परस चड प्रतिसाद उत्तर गोंयात रमाकांत खलप हांकां मेळ्ळ्या. उत्तर गोंयांत भाजपाचें वातावरण बरे ना अशी कबुली भाजपाच्या मंत्र्यान दिल्या. हाचे वयल्यान स्पष्ट जाता, उत्तर गोंयचे लोक इंडी आघाडी खाला काँग्रेसीच्या उमेदवाराक वेंचून हाडटले. गोंय प्रदेशाध्यक्ष अमीत पाटकार हांणी सांगलें.
गोंयकारांक बरो उमेदवार काँग्रेस पक्ष दितले हे उतर आमी आयज पुराय केला. गोंयात रावण राज चलता. आयज भाजपान चल्लयिली हुकूमशाय, दादागिरी, भ्रश्टाचार, बेरोजगारी आनी म्हादयचो सौदो ह्या विशयांक लागून आमचे दोनूय खासदार वेंचून येतले हातूंत मातूय दुबाव ना. गोंयचो आवाज हो देशाचे आवाज जावन रावतलो, अशे विरोधी पक्ष फुडारी युरी आलेमांव हांणी सांगलें.
भाजपा वांगडा भोंवपी कार्यकर्त्यांकूय सिलिंडर, वाडिल्ल्या पेट्रोलाचो विशय सतायता. उदकाचीं, लायटीचीं बिलां तींय हिसपा भायर वाडल्यात. राज्यांतले सगळे पक्ष एक जाल्ल्यान भाजपा भियेलां. ताका लागून खुबशे राष्ट्रीय फुडारी गोंयांत येवपाचे आसात. लोकांनी भाजपाच्या धमक्यांक भियेवपाची गरज ना, मतदाना वरवीक लोकशक्तीची तांक दाखयात.
अर्ज सादर करचे पयलीं कॅ. विरियातो हांणी फातोड्डेंच्या दामोदर देवस्थानांत आनी कपेलांत वचून आशिर्वाद घेतले. उपरांत काँग्रेस कार्यालया लागसार काँग्रेसी सयत इंडी आघाडीचे फुडारी कार्यकर्त्यां कडेन उलोवणी केली. राज्यांतल्या रेल्वे दोट्टी करणाक विरोध करपाक लडटना हो खटलो तांचे आड आशिल्ल्यान, हाचो आमकां अभिमान आसा. गोंय राखपा खातीर झगडपी कॅ. विरियातो हांचेर राज्य सरकारान खटलो दाखल केला. लोकां खातीर झगडपी उमेदवार आघाडीन दिला हाचो अभिमान आसा, अशें पाटकार हांणी म्हणलें.
सरकारान रामराज्य हाडचे बदला राज्यांत रावणराज्य हाडलां. गोंय सांबाळपा खातीर राज्यांतलें काँग्रेस, गोवा फॉरवर्ड, शिवसेना, आप, तृणमूल काँग्रेस आनी राष्ट्रवादी काँग्रेस अशे सगळे पक्ष एकठांय आयल्यात. आमकां इव्हेंट मॅनेजमेंट वा पयशे चड खर्च करपाक मेळचे ना. मात आमकां लोकांचो तेंको आसा. ही वेंचणूक मनी पॉवरा आड पिपल्स पॉवर अशी आसा. हो जोश असोच कायमचो रावतलो अशें युरी आलेमांव हांणी सांगलें.
बेरोजगारी ही देशांत सगळ्यांत चड आसा. पल्लवी धेंपो हांणीय लोकांनी बेरोजगारी, बायलां सक्षमीकरणा विशीं प्रस्न केल्ल्याचें सांगून राज्य सरकार नोकर्यो दिवपाक अपेशी थारिल्ल्याचें स्पश्ट केलां. राज्य सरकारान नोकर्यो विकिल्ल्यान थळाव्यांक रोजगार मेळना. आतां बदला खातीर आनी लोकहिता खातीर गोंयचीराखण करपाक झगडपी उमेदवाराच्या फाटल्यान उबे रावन लोकांनी तांकां फाटबळ दिवचें, अशें विजय सरदेसाय हांणी सांगलें. आरी ओरिजिनल रामभक्त आशिल्ल्यान रामनमी दिसा उमेदवारी अर्ज दाखल करतात.
सरकार गोंय सांबाळपाक झगडपी कार्यकर्ते, संस्था, लोकांचेर गुन्यांव नोंद करता. मायनींग बंद करतना खुबश्या जाणांक उक्ताडार सोडले, शेतकारांक फटयले, तरणाट्यांक रोजगार ना, बायलांचेर अत्त्याचार जातात. ही उमेदवारी फकत म्हजी न्हय, जाल्यार सरकाराक लागून त्रासांत सांपडिल्ल्या सगळ्या सामान्य लोकांची जावन आसा. ही लडाय गोंयच्यान दिल्ली मेरेन व्हरतले, अशें मत कॅ. विरियातो हांणी उक्तायलें.
—————
इंडी आघाडीचे उमेदवार रमाकांत खलप हांणी उत्तर गोंयांतल्यान 50 हजार मताधिक्क्यान वेंचून येवपाचो विस्वास उक्तायला. काँग्रेसीक दक्षीण गोंया परस चड प्रतिसाद उत्तर गोंयात मेळटा. उत्तर गोंयांत भाजपाचें वातावरण बरे ना अशी कबुली भाजपाच्या मंत्र्यान दिल्या. हाचे वयल्यान स्पष्ट जाता, उत्तर गोंयचे लोक इंडी आघाडी खाला काँग्रेसीच्या उमेदवाराक वेंचून हाडटले, अशें रमाकांत खलप हांणी सांगलें.
———–
सरकार गोंय सांबाळपाक झगडपी कार्यकर्ते, संस्था, लोकांचेर गुन्यांव नोंद करता. मायनींग बंद करतना खुबश्या जाणांक उक्ताडार सोडले, शेतकारांक फटयले, तरणाट्यांक रोजगार ना, बायलांचेर अत्त्याचार जातात. ही उमेदवारी फकत म्हजी न्हय, जाल्यार सरकाराक लागून त्रासांत सांपडिल्ल्या सगळ्या सामान्य लोकांची जावन आसा. ही लडाय गोंयच्यान दिल्ली मेरेन व्हरतले, अशें मत कॅ. विरियातो हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
