भांगरभूंय | प्रतिनिधी
पणजीः नामनेचे रंगकर्मी तशेंच कला म्हाविद्यालयाचे आदले प्राध्यापक राजीव शिंदे बुधवारा सकाळीं दोनापावलाच्या खाजगी हॉस्पिटलांत अंतरले. फाटले कांय दीस ते दुयेंत आशिल्ले.
शिंदे हांणी खूबश्या कोंकणी, मराठी नाटकांचें लेखन, दिग्दर्शन केलां. तशेंच कांय नाटकांनी तांणी अभिनय लेगीत केल्लो. नामनेचे मराठी सिने तशेंच नाट्य अभिनेते प्रशांत दामले हांच्या ‘गेला माधव कुणीकडे’ नाटकाचें दिग्दर्शन केल्लें. ह्या नाटकाचे 2 हजारां वयर प्रयोग जाल्यात आनी ताचे प्रयोग अजून लेगीत जातात. ‘थोडासा लॉजीक, थोडासा मॅजीक’ ह्या नाटक बरोवन तांणी दिग्दर्शीत केल्लें. ह्या नाटका खातीर तांकां उत्कृश्ट दिग्दर्शक, उत्कृश्ट लेखक अशे पुरस्कार फावो जाल्ले. ‘थोडो लॉजीक, थोडो मॅजीक’ नांवान तें गुजराती भाशेंतूय माचयेर आयिल्लें. ह्या नाटकांत नामनेचे सिने आनी टिव्ही अभिनेते टिक्कू तालसानिया हांणी मुख्य भुमिका केल्ली. ह्या नाटकान 150 दिसांनी 200 प्रयोग केल्ले. कला अकादमीच्या रंगमेळ कंपनी खातीर तांणी दिग्दर्शीत केल्ल्या ‘कावळ्यांची शाळा’ ह्या नाटकाचे पुराय गोंयांत प्रयोग जाल्ले.
पेशान प्राध्यापक आशिल्ले शिंदे हे चित्रपटाच्या मोगाक लागून कथा लेखक, पटकथा लेखक आनी दिग्दर्शक जाले. गोंयांत दर्जेदार चित्रपट निर्मितीची बुन्याद घालप्यां मदले ते एक. ताचे इश्ट राजीव पेडणेंकार हांचो ‘के सरा सरा’ची कथा, पटकथा आनी दिग्दर्शन केल्लें. ‘देखणी दुराय’ ह्या चित्रपटाचेंय तांणी दिग्दर्शन केल्लें.
आंगांत खूब प्रतिभा आसून लेगीत प्राध्यापक पेशाक लागून मुंबयच्या चित्रपट मळा वयल्यान आयिल्ले खूबशे व्हड प्रस्ताव तांणी न्हयकारले.
‘देखणी दुराय’ चित्रपटान जिखले साबार राष्ट्रीय पुरस्कार
राजीव शिंदे हांणी खूबशी कोंकणी नाटकां दिग्दर्शीत केली आनी त्या सगळ्यांक राज्य पुरस्कार फावो जाले. 1997 त तांणी ‘देखणी दुराय’ हो पयलो कोंकणी चित्रपट दिग्दर्शीत केलो. ह्या पयल्याच कोंकणी चित्रपटान सर्वोत्कृश्ट दिग्दर्शन, सर्वोत्कृश्ट अभिनेतो, सर्वोत्श्ट अभिनेत्री ह्या पुरस्कारा सयत साबार राष्ट्रीय पुरस्कार मेळयले. राष्ट्रीय चॅनलाचेर सर्वोत्कृश्ट प्रादेशीक चित्रपट म्हूण दाखयिल्लो तो पयलो कोंकणी चित्रपट आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
