भांगरभूंय | प्रतिनिधी
चौगां आड गुन्यांव नोंद, दोगांक अटकः 80 किलोमिटर दुबावितांचो फाटलाव
भांगरभूंय । प्रतिनिधी
म्हापशें: आंगड म्हापश्यां ‘रोड रेज’ वयल्यान एका पुलिसाक मारपेट केली. ताच्या हेर तिगां इश्टांक गांळी संवल्यो आनी धमकी दिल्ल्या प्रकरणांत म्हापशें पुलिसांनी चौगांचेर गुन्यांव नोंद केलो जाल्यार दोगांक अटक केली. हे घडणुके उपरांत दुबावितांनी मोटारींतल्यान फिल्मी स्टायलीन हळदोणें वाठारांत सुमार 80 किलोमिटर मेरेन पुलिसांक धांवडायले.
अटक केल्ल्या दुबावितां मदीं जोवीत कुतिन्हो (हळदोणें) आनी एलरीच फर्नांडीस (नास्नोळें) हांचो आस्पाव आसा. पवन तिरके आनी राज हे दोग दुबावीत फरार आसात. ही घडणूक बुधवारा मध्यानरातीर 1.45 वराच्या सुमाराक घडली.
पुलिसां कडल्यान मेळिल्ले म्हायती प्रमाण दुबावीत पवन तिरके (मोटार चालक) हो दुबावीत जोवीत कुतिन्हो हाच्या वांगडा स्कोडा मोटारींतल्यान (जीए 03 एच 0569) म्हापशेंच्यान हळदोणेंचे दिशेन वतालो. जाल्यार मल्लेश जोडी (मोटारचालक) बलेनो (जीए 03 झॅड 7133) मोटारींतल्यान ताचे इश्ट महेश दळवी (फिर्यादी), तेजस गुरव, शरद भातकांडे हांचे वांगडा उरफाटे दिशेन येतालो. मल्लेश, महेश आनी शरद हे तीग पुलीस कर्मचारी आसात.
आंगडच्या अलंकार थिएटरा लागसारच्या कळंगूटकार नर्सींग होमा मुखार रस्त्याचेर स्कॉडा मोटारीचो धपको बलेनो मोटारीक बसलो आनी ल्हानसो अपघात जालो. ह्या अपघाता उपरांत पवन तिरके आनी मल्लेश जोडी हांची बाचाबाची आनी झटापट जाली. ते उपरांत पवन तिरके हाणें फोन करून आपल्या हेर इश्टांक थंय आपयले. थंय दुबावीत राज, एलरीच फर्नांडीस आनी हेर कांय जाण आयले. उपरांत तांणी मल्लेश जोडी हाका खुबूच बडयलो. तशेंच ताच्या इश्टांक लेगीत गंभीर परिणामांची धमकी दिली. हातूंत मल्लेशाच्या तोंडाक गंभीर दुखापक जाल्या. तशेंच दुबावितांनी आपल्या मोटारींतल्यो सोऱ्याचो बाटल्यो पुलिशेचे गाडयेंत घालून ताचो व्हिडियो करून पुलिसांची बदनामी करपाचो यत्न केलो.
घडणुकेची म्हायती मेळटाच पुलीस घडणुकेचे सुवातेर पावले. पुलिसांक पळोवन दुबावितांनी थंयच्यान मोटार आनी हेर गाडयो घेवन पळ काडलो. म्हापशें पुलिसांनी दुबावितांचे मोटारीचो फाटलाव केलो. दुबावितांनी हळदोणें वाठारांत मोटार धोफरायली. म्हापशें पुलिशेच्यो दोन आनी दिवचल पुलिशेच्यो तीन अश्यो पांच गाडयो दुबावितां फाटल्लयान लागल्यो. अखेर सुमार 80 किलोमिटर मेरेन फाटलाव करून भोंवताडे मारपाक लावपी दुबावितांची मोटार उसकय आडावपाक पुलिशेक येस मेळ्ळें. ते मेरेन फांतोडची 3.30 वरां जाल्लीं. मोटारींतले दुबावीत जोवीत कुतिन्हो आनी एलरीच फर्नांडीस हांकां पुलिसांनी अटक केली.
दोग दुबावीत जामिनाचेर
दुबावीत जोवीत कुतिन्हो एका खून प्रकरणांतलो दुबावीत आरोपी आसा. सध्या तो जामिनाचेर आसा. तशेंच एलरीच फर्नांडीस हाचेर लेगीत गुन्यांव आसात आनी तोवूय जामिनाचेरूच बंदखणी भायर आसा. ह्या प्रकरणांतले फिर्यादी दशरथ दळवी (रा. दाबोळी) हो मुरगांव पुलीस स्टेशनार आसता. जखमी मल्लेश जोडी (रा. कुचेली) हो मांद्रें पुलीस स्टेशनार सेवा दिता जाल्यार शरद भातकांडे हो लेगीत पुलीस आसा.
दुबाविताचें नाटक
ह्या अपघाता उपरांत दुबावितान नाटक करून सोशल मिडियाचेर व्हिडियो व्हायरल केलो आनी पुलिसांनी सोऱ्याचे घुंवळेंत आपल्याक मारपेट केल्ल्याचें तशेंच दादागिरीची भास वापरतात, अशें चित्र उबें करपाचो यत्न केलो. ते भायर दुबावितान पिडीत पुलिसाचे मोटारींत सोऱ्याच्या रित्या बाटल्यांची रास दवरली आनी उपरांत ताचोय व्हिडियो काड़ून सोशल मिडियाचेर व्हायरल केलो.
वाडदिसाच प्रकरण
दुबावीत एलरीच फर्नांडीस हाची घडणुके वेळार नास्नोळ्यां वाडदिसाची पार्टी आशिल्ली. दुबावीत आरोपी तेच पार्टेंत आशिल्ले आनी म्हापश्यां आयिल्ले. परतून वतना हो अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
