भांगरभूंय | प्रतिनिधी
-मुख्यमंत्री, प्रदशाध्यक्षा सयत दोनूय उमेदवारांनी घेतलो महालक्ष्मीचो आशिर्वाद
पणजी: पणजेंतल्या महालक्ष्मी देवीचें दर्शन घेवन भाजपान मंगळारा लोकसभा वेंचणुकेंतल्या उत्तर आनी दक्षीण गोंयच्या दोनूय उमेदवारांच्या प्रचाराचो नाल्ल फोडलो. मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे हांचे सयत उत्तर गोंयचे उमेदवार श्रीपाद नायक, दक्षीण गोंयची उमेदवार पल्लवी धेंपे अानी हेर भाजप पदाधिकारी ह्या वेळार हाजीर आशिल्ले.
हे खेपे उत्तर गोंयांतल्यान एक लाखां परस चड, जाल्यार दक्षीण गोंयांतल्यान 60 हजारां परस चड मताधिक्क्यान उमेदवारांक वेंचून हाडपाचो निश्चेव मुख्यमंत्री डॉ. प्रमोद सावंत हांचे सयत भाजपाच्या फुडाऱ्यांनी केला. ताका लागून आयतारा दक्षीण गोंयची उमेदवारी पल्लवी धेंपे हांकां जाहीर जाले उपरांत तांणी बुधवारा महालक्ष्मीचे दर्शन घेवन प्रचाराक सुरवात केली. प्रधानमंत्री नरेंद्र मोदी हांचे 2047 तलें विकसीत भारताचें सपन केंद्र सुवातेर दवरून लोकसभा वेंचणुकेचो प्रचार करपाचे भाजपान निश्चीत केला. तेच फाटभुंयेर मुख्यमंत्री डॉ. सावंत, प्रदेशाध्यक्ष तानावडे आनी हेर फुडाऱ्यांनी राज्याच्या विवीध वाठारांत विकसीत भारत संकल्प यात्रा घडोवन हाडल्या. केंद्र सरकारान फाटल्या 10 वर्सांच्या काळांत गोंयची कशें पद्दतीन उदरगत केल्या, केंद्र सरकारच्यो म्हत्वाच्यो येवजण्यो राज्य सरकारान अंत्योदय पांवड्यार व्हरून तळागाळांतल्या लोकांक ताचो कशे पद्दतीन लाव मेळोवन दिला, हाची म्हायती प्रचारा मजगतीं लोकांक परतून एकदा दितले.
……………….
दोनूय उमेदवार जैतिवंत जातलेः मुख्यमंत्री
प्रचाराचो शुभारंभ करतना मुख्यमंत्री डॉ. प्रमोद सावंत हांणी म्हणलें, केंद्रीय मंत्री श्रीपाद नायक हांणी उत्तर गोंयांतल्या दरेक पंचायतींत प्रकल्प उबारल्यात. तांच्या कामांचेर प्रस्नचिन्न उपस्थीत करप्यांनी पयलीं हे प्रकल्प पळोवचे आनी ते उपरांतूच उलोवचे. हे खेपेय श्रीपाद नायक हांचे उत्तर गोंयांतल्यान जैत निश्चीत आसा. जाल्यार दक्षीण गोंयची उमेदवार पल्लवी धेंपे हे खेपे 60 हजारां वयर मताधिक्क्यान जैतिवंत जातली, अशें तांणी सांगलें.
………………..
मगो, अपक्षां कडेन रणनिती विशीं चर्चा
-भाजपान वेंचणुकेच्या प्रचाराक सुरवात केले उपरांत मुख्यमंत्री डॉ. प्रमोद सावंत, प्रदेशाध्यक्ष तानावडे आनी केंद्रीय मंत्री श्रीपाद नायक हांणी युती आशिल्ल्या मगो आनी तिनूय अपक्ष आमदारां कडेन चर्चा केल्या आनी प्रचारांतल्या रणनिती विशीं तांची मतां जाणून घेतली.
-श्रीपाद नायक बुधवारच्यान मयेंतल्यान, जाल्यार पल्लवी धेंपे मुरगांव मतदारसंघांतल्यान प्रचाराक सुरवात करतली. दोनूय उमेदवार 5 एप्रील मेेरेन उत्तर आनी दक्षीण गोंयांतल्या सगल्या मतदारसंघांत वचून प्रचार करतले. ते उपरांत थळावे आनी केंद्रांतले भाजप फुडारी राज्यांतल्या विवीध वाठारांत वचून प्रचार करतले, अशी म्हायती प्रदेशाध्यक्ष तानावडे हांणी पत्रकारां कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
