भांगरभूंय | प्रतिनिधी
सुभाष हळदणकारः बसकेंत विवीध थाराव मंजूर
भांगरभूंय । प्रतिनिधी
दिवचलः रुद्रेश्वर देवस्थाना संबंदांत बुधवारा उपजिल्होधिकारी रमेश गांवकार हांणी दोन गटां मदीं जो लेखी स्वरुपांत उपाय काडला तो भंडारी समाज भावांक तशेंच रुद्रेश्वर देवस्थान म्हाजनांक मान्य ना. हें देवस्थान पुराय तरेन भंडारी समाजाचेंच आसा. तशेंच पालखी उत्सवांत जो प्रकार घडलो ते विशींची पुलीस कागाळ फाटीं घेवचे नात. उरफाटे अदीक पुरावे सादर करपाचो थाराव भंडारी समाज भावांचे बसकेंत घेतिल्ल्याची म्हायती देवस्थान सचीव सुभाष हळदणकार हांणी दिली.
रुद्रेश्वर देवस्थानाच्या प्राकारांत हे विशेश बसकेक समाज भाव व्हड संख्येन हाजीर राविल्ले. बुधवारा उपजिल्होधिकारी रमेश गांवकार हांणी सांतेरी देवस्थान समिती तशेंच रुद्रेश्वर देवस्थान अस्थायी समिती हांची बसका घेवन जो दोन गटांत हक्का वयल्यान वाद आसा तो सामोपचारान सोंपोवपाक येस आयिल्ल्याचें सांगिल्लें. दोनूय समित्यांनी पत्रकार परिशदेंत तशी घोशणा केल्ली. ते उपरांत भंडारी समाज भावांनी ह्या प्रस्तावाक हरकत घेवन बिरेस्तारा विशेश बसका घेतली.
हे बसकेंत शिवरात्र उत्सव तशेंच पालखी उत्सवांत जे प्रकार घडले ताचेर म्हायती दिवन चर्चा जाली. तशेंच समितीन भायले भायर जो उपाय काडिल्ल्याचें जाहीर केल्लें ताका सगळ्यांनी हरकत घेवन तो उपाय मान्य नाशिल्ल्याचें स्पश्ट केलें.
ह्या वेळार खूब जाणांनी बसकेंत विचार मांडले. तातूंत कसलेंच राजकारण हाडिनासतना देवस्थान तशेंच समाज भावांनी एकवटींत रावून उदरगत करपाचो उलो खूबश्या जाणांनी मारलो. पत्रकार परिशदेंत देवस्थान समिती सचीव सुभाष हळदणकार हांणी बसकेंत घेतिल्ले थाराव जाहीर केले.
भंडारी समाज संघटीत आसा. खंयचेय परिस्थितींत आमचे जे अधिकार आसात ते संबंदांत तडजोड करचे नात. परंपरा आशिल्ले काय मान आसात ते त्या त्या मानकऱ्यांक दितले, अशेंय ह्या वेळार सांगलें.
म्हाजनकीचो वाद हो न्यायलयांत आसा. ते विशीं फाटपुरवण करून सगळ्या भंडारी भावांक म्हाजन करचे, अशें बसकेंत थारायलें. तशेंच सगळ्या बाराय म्हालांनी दरेकी पांच जाणांची सल्लागार समितीचेर नेमणूक करची, असो थाराव घेतलो. 16 एप्रीलाक रामनम उत्सवाक सगळ्यांनी हाजीर रावचें, अशें थारलें.
ह्या वेळार अध्यक्ष यशवंत माडकार, संगेश कुंडयकार, अनीष बकाल, काशिनाथ मयेंकार, वासुदेव गांवकार आनी हेर पदाधिकारी तशेंच समाजभाव हाजीर आशिल्ले.
देवस्थान समिती आनी सल्लागार समिती मेळून हे मुखार निर्णय घेतली, मात आमचे जे अधिकार आसात तातूंत तडजोड आसची ना, अशें ह्या वेळार स्पश्ट केलें.
बिरेस्तारा आपयिल्ले बसके संबंदांत गोंयांतल्या समाज भावां मदीं उमळशीक आशिल्ली. राजकारण कुशीक दवरून आमी संघटीत रावून काम करपाचे विचार बसकेंत खूब जाणांनी उक्तायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.