भांगरभूंय | प्रतिनिधी
कुजिरा शिक्षण संकूल वाठारांत जिवघेणो हल्ल्याचो यत्न; खेळाचें झगड्यांत रुपांतर
भांगरभूंय । प्रतिनिधी
पणजीः बांबोळी कुजिरा शिक्षण संकूल वाठारांत सुरी घेवन दहशत पातळिल्ल्या प्रकरणांत आगशी पुलिसांनी ज्योशुआ झेवियर (करंझाळे), शोहेब बेग (ताळगांव) आनी झायकुल्ला खाजी (करंझाळे) ह्या तीन तरणाट्यांक अटक केल्या. ह्या प्रकरणांत पुलिसांनी तांचेर जिवघेणो हल्लो करपाचे आरोप लायल्यात.
आगशी पुलिसांनी दिल्ले म्हायती प्रमाण, एडन फर्नांडीस ह्या विद्यार्थ्यान ह्या प्रकरणांत कागाळ दाखल केल्ली. ही घडणूक बुधवारा 3 एप्रीलाक सकाळीं 11 वरांच्या सुमाराक बांबोळीच्या कुजिरा शिक्षण संकूल वाठारांत घडिल्ली.
कागाळदार आनी झायकुल्ला हांचो हे आदीं फुटबॉल मॅच खेळटना एकदां वाद जाल्लो. ते उपरांत मंगळारा 2 एप्रीलाक करंझाळेच्या एका सुपर मार्केटा लागसार एडन आनी ज्योशुआ हांचे मदीं परतून एकदां बाचाबाची जाल्ली. हाचो जाब विचारपा खातीर ज्योशुआ आपल्या इश्टांक घेवन कुजिरांत बुधवारा आयिल्लो. ह्या वेळार तिगूय दुबावितांनी एडन आनी ताचे इश्ट जय कोहली, मयंक चव्हाण आनी चंद्रप्रकाश महावर हांकां धक्काबुक्की केली.
ही घडणूक पळोवन एडन हाचो इश्ट शिवेश नायक तांची झगडीं सोडोवपा खातीर गेलो. ह्या वेळार झायकुल्ला हाणें ताकाय मारपेट केलो. झायकुल्लान जय कोहली हाका जिवेशीं मारपाच्या उद्देसान सुरी भायर काडली. हे घडणुकेचो व्हिडीयो सोशल मिडियाचेर व्हायरल जालो.
हे मजगतीं, थंय आशिल्ल्यांनी हाची म्हायती पुलिसांक दिली. पुलीस आयिल्ल्याचें कळटाच दुबावीत थंयच्यान पळून गेले. ते उपरांत कागाळेची दखल घेवन आगशी पुलीस स्टेशनाचे निरिक्षक अनंत गांवकार हांच्या मार्गदर्शना खाला उपनिरिक्षक स्वप्नील नायक हांच्या फुडारपणा खाला हवालदार पुरेश हडकोणकार आनी कॉन्स्टेबल राजू अट्टर हांचो पंगड तयार करून सोद घेतलो. हे मजगतीं सांजे वेळार दुबावितांक फोंडें वाठारांतल्यान ताब्यांत घेतले. त्या तिगांक पुलीस स्टेशनार हाडून अटक केली. अटक केल्ल्या दुबावितांक पुलीस कोठडे खातीर बिरेस्तारा पणजेच्या प्रथमवर्ग न्यायालयांत हाजीर करतले. ह्या प्रकरणांत उपनिरिक्षक स्वप्नील नायक हांणी गुन्यांव दाखल केला आनी फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
