भांगरभूंय | प्रतिनिधी
-़ डॉ. प्रमोद सावंत: पुराय देशांत नरेंद्र मोदी हांचें ल्हार
म्हापशें: काँग्रेस फुडलीं 40 वर्सां सत्तेर येवंक शकना. आयकर खात्याची 1700 कोटी रुपयांची नोटीस आयिल्ल्यान काँग्रेसीन तांचें दुकान बंद केलां. पुराय देशांत नरेंद्र मोदी हांचें ल्हार आसा. हाका लागून आमी संख्येचो आंकडो 400 हुपतले असो आत्मविस्वास मुख्यमंत्री डॉ. प्रमोद सावंत हांणी उक्तायलो.
शिवोले आदले मंत्री दयानंद मांद्रेंकार हांच्या घराच्या प्राकारांत मंगळारा सांजवेळा आयोजीत कोनसो बसकेंत कार्यकर्त्यांक संबोदीत करतना मुख्यमंत्री उलयताले. ह्या वेळार आदले मंत्री दयानंद मांद्रेंकार, शिवोली मंडळाध्यक्ष मोहन दाभाळे, दत्तप्रसाद खोलकार आनी हेर मानेस्त हाजीर आशिल्ले.
ही वेंचणूक देशाचे प्रधानमंत्री थारावपाची आसा. कार्यकर्त्यांनी आपले भितरले मतभेद पयस करून मत फक्त श्रीपाद नायक हांकां न्हय जाल्यार नरेंद्र मोदी हांकां दिवचें. नवोभारत, विकसीत भारत, परतून डबल इंजीन सरकार, गोंयचो विकास दुपेटीन जावंक जाय. हे खातीर तिसरे फावटी नरेंद्र मोदी हांकां प्रधानमंत्री जावपा खातीर तुमचे मत जाय अशें समजून लोकांच्या दारांनी वचात. सत्ता आसप म्हत्वाचें आसा आनी सत्ता आसल्यार कार्यकर्त्यांकूय म्हत्व आसा असो सल्लो मुख्यमंत्र्यांनी ह्या वेळार कार्यकर्त्यांक दिलो.
विरोधी उमेदवार रमाकांत खलप हांणी तांच्या काँग्रेस सरकाराच्या 2004 ते 2014 ह्या 10 वर्सांच्या कार्यकाळांत कितें केलें हें जाहीर करचें. काँग्रेसीची 50 वर्सा आनी मोदी हांची 10 वर्सा हाची तुळा करात. मोदी हांच्या काळांत गोंयांत 35 हजार कोटी रुपयांचीं विकासकामां जालीं. फुडल्या तीन वर्साच्या कार्यकाळांत राज्यांत परतून डबल इंजीन सरकार येवंक जाय. शिवोलेतले लोक भाजप, मोदी आनी प्रमोद सावंत हांचे फाटल्यान आसात. हे खातीर शिवोले परतून श्रीपाद नायक हांकां आघाडी दिवंक जाय. हाचे स्रय आमदारांक न्हय जाल्यार पोरण्या आनी नव्या कार्यकर्त्यांक मेळटलें म्हणून तळमळीन काम करूंक जाय.
काँग्रेसीन फक्त जाती भेद आनी धर्म भेद करून मतां मेळयलीं. आमी जाती भेद न्हय जाल्यार विकासाच्या आदाराचेर मतां मागतात. आमी नारी, युवा, किसान आनी गरीब कल्या, ह्यो चारच जाती मानतात. विदेशांत शिक्षणा खातीर 70 लाख रुपया तरणाट्यांक दितात. गोंयांत 1 लाख रेशन कार्डाचेर फुकट तांदूळ दितात. आमी लोकांच्या विकासा खातीर यत्न करीत आसात. काँग्रेसीन फक्त आपली आनी गांधी कुटुंबाची पोटां भरलीं अशें मुख्यमंत्र्यांनी म्हणलें.
ह्या वेळार पक्षाचे उपाध्यक्ष दयानंद मांद्रेंकार आनी शिवोली मंडळ अध्यक्ष मोहन दाभाळे हांणी मनोगत उक्तायलें. उमेदवार श्रीपाद नायक हांकां व्हड मतांनी वेंचून दिवपाचें आवाहन केलें.
श्रीपाद नायक हांणी 1200 प्रकल्प गोंयांत पुराय केले. आयुष हॉस्पिटल, वॉटर स्पोर्टस् संस्था, वेळगें आनी मडगावां जिल्हो आयुष हॉस्पिटल पुर्णत्वाक येत आसा. दरेक प्राथमीक आनी समाजीक भलायकी केंद्रांत आयुष डॉक्टराची नेमणूक जाल्या. राज्यांत श्रीपाद नायक हांच्या कार्यकाळांतच वेलनेस सुरू जालां, हें जर दिसत नासलें तरी आमदार अॅड. कार्लुस फेरेरा हांणी आयुष हॉस्पिटलाक भेट दिवची, उपरांत बरे दिसतलें असो थोमणो मुख्यमंत्री डॉ. प्रमोद सावंत हांणी आमदार फेरेराक मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
