पल्लवी धेंपे हांकां वेंचून हाडपाचो दक्षिणेंतल्या भाजप आमदारांचो निश्चेव

भांगरभूंय | प्रतिनिधी

पणजीः भाजपाचो दक्षीण गोंयचो उमेदवार जैतिवंत जावचो म्हूण दक्षीण गोंयचे भाजपाचे आमदार आनी मंत्री नेटान कामाक लागल्यात. आपल्या मतदारसंघांत सगल्यांत चड आघाडी मेळोवन दिवपा खातीर तांचे मदीं सर्त चालू जाल्या. भाजपाचे युती घटक मगो पक्ष आनी दोनूय अपक्ष अामदारारूय ते खातीर सज्ज जाल्यात.

दक्षिणेंतल्यान भाजपान उद्देजक पल्लवी धेंपे हांकां उमेदवारी दिवन आपल्याच पांयार फातर घेतला, दक्षिणेंत तांची हार निश्चीत आसा, अशी टिका विरोधक करतात. ते भायर समाज कार्य आनी राजकारणाचो कसलोच अणभव नाशिल्ला उमेदवारी दिल्या, अशी टिका विरोधक करपाक लागल्यात.

पूण दक्षीण गोंयांत लोकसेभेचो उमेदवार जिखून हाडप हो भाजपाच्या प्रतिश्ठेचो विशय. उमेदवारी वयल्यान बरोच तेंप कोफुसांव जावन आयत्या वेळार उमेदवार मेळिल्ल्यान दक्षीण गोंयची सुवात जिखपाक भाजपान आपली प्रतिश्ठापणाक लायल्यात. सध्याचे स्थितींत दक्षिणेंत भाजपाच्या आमदारांची संख्या चड आसा. ताका लागून पल्लवी हांकां व्हड मताधिक्क्यान जिखून हाडून 2014 ची पुनरावृत्ती करपाचे भाजपान थारायला.

दक्षीण गोंयची उमेदवार पल्लवी धेंपे आनी उत्तर गोंयचे उमेदवार श्रीपाद नायक हांणी पणजे महालक्ष्मी देवळांत देवीचो अाशिर्वाद घेवन प्रचाराचो नाल्ल फोडलो. ह्या वेळार भाजपाचेच युती घटक, मगो पक्षाचे आमदार सुदीन ढवळीकार, अपक्ष आमदार आलेक्स रेजिनाल्ड आनी आंतोन वाझ हे पल्लवी हांकां तेंको​ दिवपाक हजर आशिल्ले.

दक्षिणेंत बायलां मतदारांची संख्या चड आसा, देखून पल्लवी धेंपे ही दक्षिणेंतल्यान व्हड मतांची आघाडी घेवन जिखून येतली, अशें नुवेंचे आमदार आलेक्स सिक्वेरा हांणी म्हणलें. दक्षिणेंत आतां वातावरण बदल्लां. भाजप 50 ते 60 हजार मताधिक्क्यान जैत मेळयलो, अशें उदकास्रोत मंत्री सुभाष शिरोडकार हांणी म्हणले. जाल्यार समाज कल्याण मंत्री सुभाष फळदेसाय हांणी म्हणलें, सगळ्यांत व्हडली आघाडी आपल्या मतदारसंघांतल्यान आसतली. तशेंच मडगांवचे आमदार दिगंबर कामत हांणी म्हणलें, कितली आघाडी दिवपाची ती आपूण मडगांवकारांचेर सोडटा.

प्रधानमंत्री नरेंद्र्र मोदी बायलांचे सबळीकरणाचो यत्न करता. ते खातीर तांणी पयलेच खेपे बायलां उमेदवाराक तिकेट दिल्या. दक्षिणेंत बायलां मतदारांची संख्या चड आसा. ते खातीर तांणी पल्लवी धेंपे हांकां उमेदवारी दिल्या. दक्षिणेंत आमकां आमकां बरी आघाडी मेळटलली, अशें नुवेंचे आमदार आलेक्स सिक्वेरा हांणी सांगलें.

33 टक्के राजकी आरक्षण बायलांक दिवपाचे थारायिल्ले आसाच, पूण ताची अंमलबजावणी जावचे पयलींच दक्षिणेंत बायलां उमेदवार पल्लवी धेंपे हांकां उमेदवारी दिल्या. देखून दक्षिणेंत 50 ते 60 हजार मतांच्या आघाडेन आमी जिखतले, अशें उदकास्रोत मंत्री सुभाष फळदेसाय हांणी सांगलें.

2014 ची पुनरावृत्ती दक्षीण गोंयांत हे खेपे जातली आनी 45 हजार मतांची आघाडी घेवन भाजप उमेदवार जिखतलो. म्हजो मगो पक्ष आनी दोनूय अपक्ष आमदार वांगडा मेळून भाजपा खातीर वावुरतले. धेंपे घराणे फामाद आसा आनी पल्लवी धेंपे जैतिवंत जातली हातूंत दुबाव ना, अशें मगोचे आमदार आनी वीज मंत्री सुदिन ढवळीकार हांणी सांगलें.