नव्या गांवकारांचें गोंयां मुखार आव्हान

भांगरभूंय | प्रतिनिधी

गोंयांतल्या कितल्याशाच गांवांनी अशे पंकज कुमार घुसल्यात आनी तांणी धर्मीक, संस्कृतीक कार्यांक अर्थीक हातभार लावन त्या- त्या गांवच्या गांवकारांचेर आनी हेर लोकांचेर आपलो प्रभाव घाला. ह्या लोकां खातीर हे मनीस आधार जाल्यात आनी मागीर…..

पेडणें म्हालांतल्या कासारवर्ण्यां गावांत फाटल्या सप्तकांत ग्रामसभेंत बरोच बोवाळ जालो. ह्याच गांवांत रावपी पयलींचो भायलो, पूण आतां रेशनकार्ड, वोटरकार्ड घेवन पुरायपणान ‘गोंयकार’ जाल्लो पंकज कुमार ह्या वेवसायिकान ग्रामसभेंत थळाव्या लोकांक आव्हान दिवपाचें केल्लें धाडस सगळे कडेन बरेंच व्हायरल जालां. भायलो म्हूण आपल्याक पंचायतीन ‘ना हरकत’ दाखलो कसो न्हयकारलो, अशी ताची सादी तक्रार. आपूण जर ‘भायलो’ जाल्यार गेली धा वर्सा आपूण ह्या गांवा खातीर आनी गांवांतल्या लोकां खातीर कितें- कितें केलें हाची वळेरीच तांणी ग्रामसभे मुखार सादर केली. हें सगळे करतना, आपूण भायलो नासलो काय कितें, असो प्रस्न तांणी उपस्थित केलो. पंचायतीन सांगलें, लोकांक हरकत आसा म्हूण ना हरकत दाखलो होल्डार दवरला. मागीर कोणांक हरकत आसा तांणी आपल्या फुड्यांत हाजीर जांवचें असो प्रस्न करून तांणी पुराय ग्रामसभा आनी गांवच्या लोकांकूच आव्हान दिलें. ह्या वेळार एकूय थळावो मनीस वा गांवकार उबो रावून ताच्या ह्या आव्हानाक तोंड दिवूंक शकूंक ना, ही ह्या प्रकरणांतली सगल्यांत हुस्क्याची गजाल थारली.
भायले- भितरले वाद
भायले आनी भितरले वा थळावे हो वाद इतिहास काळा सावन गोंयांत चालू आसा. पूण जेन्ना गोंयचे स्वतंत्र अस्तित्व सांबाळपाचो वेळ आयिल्लो तेन्ना मात ही दुफळी वाडली. ओपीनियन पोला वेळार ह्याच नीज गोंयकारपणांक उलो मारून तेन्नाच्या कांय गोंयकारांनी गोंय महाराश्ट्रांत विलिन करपा पासून वाचयलें आनी ते खातीर आमची आयज स्वतंत्र अस्मिताय शाबूत उरल्या म्हणपाची. ते उप्रांत सदांच भायले आनी थळावे हो वाद कमी, अदीक पणान चालूच आसा. सद्याचे घडयेक आतां मेरेनच्या सरकारांच्या चुकीच्या धोरणांक लागून स्थलांतरितांचो आंकडो नेटान वाडत चल्ला. एकी कडेन शेतां पडिक पडल्यांत. पर्यटनाच्या मळार गोंय चुकीचे दिशेन फरफटत चल्लां. शिक्षण घेतिल्ल्यांक फावो तशो नोकऱ्यो मेळनात म्हूण सुशिक्षित पिळगी गोंयां भायर वचपाक लागल्या. खाजगी मळार फावो तसो पगार ना आनी फावो तशें काम ना म्हणटकूच कितलेशेच तरणाटे विदेशांत चल्ल्यात. गोंयचे पर्यटन, उद्देग हाचे वांगडा हांगा सरल्या बारीक सारीक दिसपट्ट्या गजालींक आमी गोंयकार भायल्या मनीसबळाचेर चडांत चड निबूंन आसात. अशें जाल्ल्यान गोंया भायल्या कांय व्हड राज्यांतल्या लोकां खातीर गोंय हे रोजगार आनी वेवसाय संद आसपी एक म्हत्वाचें केंद्र थारलां आनी तांतूतल्यान गोंयकार आपलेच भुंयेंत शेणपाची वेळ येवन दारार उबी आसा.
अस्मितायेचो हुस्को थोड्यांकूच
हें सगळें चित्र बदलपाची संद आमचे कडेन आसा कांय आतां वेळ सोपलो हाचेर चर्चा करची पडटली. गोंयची अस्मिता, गोंयकारपण हाचेर हांगा सरल्या ख्रिस्ती लोकांक जितली चिंता आसा ती हिंदू लोकां भितर दिसून येना. तांतूतय बी फकत साश्ट आनी तिसवाडी ह्या जुन्या काबीजादींतल्या लोकांकूच गोंयचें विशीं चड चिंता आनी मोग दिसता. हेर वाठारांतल्या लोकां भितर गोंयचे बाबतीत ती भावना विशेश करून दिसून येना, ती कित्याक हो प्रस्न हुमाणें, कोड्या सारको सदांच सतयता. गोंयचे राजकारण राश्ट्रीय पक्षां कडेन गेल्ल्यान आनी हांगासरले थळावे प्रादेशिक पक्ष दुबळे जाल्ल्यान हो समाजीक बदल राश्ट्रीय पक्षां खातीर फायद्याचो आसा आनी ते खातीर आमचेच गोंयकार फुडारी जे ह्या राश्ट्रीय पक्षांचें फुडारपण करतात तेच आयज गोंयच्या स्वतंत्र अस्मिते कडेन खेळटात तें आमकां पळोवंक मेळटा. प्रादेशिक पक्षांचेर चेपण घालून तांका ह्या राश्ट्रीय पक्षांनी सोपोवपाचो कट रचला. आतां फकत रिव्होल्यूशनरी गोवन्स पार्टी या नावान गोंयच्या साबार गांवगिऱ्या वाठारातल्या तरणाट्यांनी एकठांय येवूंन गोंय सांबाळपाचो आवाज दिला खरो पूण ह्या तरणाट्यांक गोंयकार कितले तेकों दितलें ह्या बाबतीतूय दुबाव आसा.
तो गांवचोच जालो
राज्य पातळेचेर हें सगळें चित्र बदलत आसतना गांव पातळेचेरूय बी आतां कशे बदल जातात, हे पळोवपा खातीर कासारवर्ण्याचें प्रकरण केस स्टडी म्हूण पळोवं येता. पंकज कुमार हो मुळ बिहारांत नागरीक. बारीक सारीक कामां करपी कंत्राटदार. पयलीं तो ताळगांवांत आसलो अशें कांय थळावे लोक सांगतात. सुरवातेक कामगार पुरवण करप हें ताचें काम. पूण मागीर ताणें बारीक सारीक कामां हातांत घेवन आपलें बस्तान बसयलें. असोच एका कामा निमतान तो कासारवर्ण्या गांवांत पावलो. थळाव्या लोकां कडेन ताचें बरें जुळ्ळें आनी तो ह्या गांवचोच जालो. ताणें आपलें कुटुंबच ह्या गांवांत हाडलें. स्वतःचें एकमजली घर बांदलें. गांवांतल्या लोकांचीं कामां करपाक लागलो. तो म्हटल्यार एक वखदी पाळ कशें. कोणाची कितेंय अडचण आसत जाल्यार ताचे कडेन उपाय आसतात, म्हणटकूच तो केन्ना गांवांतलोच एक जालो हें कोणाकूच कळूंक ना. ताणें गावांत कांय जमनीय विकत घेतल्यो. गांवांतली सगल्यांत व्हडली तीन मजली इमारत बांदून थंय कामगारांक बिराडाक दवरल्यात. कांय कडेन जमनी घेवन ताचे प्लॉट करूनूय विकपाचो वेवसाय तो करता. गांवांतूच रावता म्हण्टकूच गांवांतल्या धर्मीक उत्सवांक ताची सगल्यांत व्हडली देणगी. गांवकऱ्यांनी मनां जिंकिल्ले खातीर ताका देवळांय उकतीं केलीं. धर्मीक विधींत वांटेंकार जावपाची संद गांवातल्या सगल्या लोकांक फावो जायना, तरीय ती ताका फावो जाली. हेर उत्सवांकूय बी ताचो हात मेकळो सुट्टा आनी ते खातीर तो सद्याक गांवचो मुखेलीच जाला, अशें म्हणल्यार चुकीचें थारचें ना. ह्याच पंकज कुमारा बगर गांवांतल्या लोकांचें आयज पान हालना. आतां तोच गांवांतल्या लोकांक वेवसाय करपाक उर्बा दिता. अर्थीक फाटबळगें, आधार दिता. हालींच गांवांत एक हार्डवेअर दुकान आसचें अशें ताचें मत जालें आनी ताणेंच ह्या दुकाना खातीर

पंचायती कडेन ना हरकत दाखलो मागलो. ह्या दाखल्याक कांय थळाव्या लोकांनी हरकत घेतली आनी तो सध्या पंचायतीन होल्डार दवरला. हे खातीर तो आपूण स्वता ग्रामसभेक हाजीर रावलो आनी ग्रामसभा माथ्यार घेतली. आपूण आयज मेरेन कशीं कामां केलीं, कितलीं कामां केलीं, कितलो पयसो मोडलो हाचो धडाधड हिशेबूच ताणें दिलो. इतले करूनूय बी आपूण भायलो कसो, असो रोखठोक प्रस्न केलो आनी हाची जाप ना पंचायती कडेन आनी ना गांवांतल्या लोकां कडेन. व्हिडियो पळयल्यार हें स्पश्ट जाणवता.
सगले कडेन अशेंच घडलां
हो प्रकार एकट्या कासारवर्ण्या गांवचोच न्हय, तर पुराय गोंयचो जावन पडला. गोंयांतल्या कितल्याशाच गांवांनी अशे पंकज कुमार घुसल्यात आनी तांणी धर्मीक, संस्कृतीक कार्यांक अर्थीक हातभार लावन त्या- त्या गांवच्या गांवकारांचेर आनी हेर लोकांचेर आपलो प्रभाव घाला. ह्या लोकां खातीर हे मनीस आधार जाल्यात आनी मागीर एकदा कोणाचेर निंबून उरलो कांय मागीर तांतूतल्यान सुटका करून घेवप खूब्ब कठीण आसता. मुस्लीम राजवटींतल्या अन्यायांतल्यान आनी छळांतल्यान सुटका करून घेवपाक तिमय्या नावाच्या सरदारान आल्बुकेर्काक आपयलो. ताका आधार दिलो आनी मागीर आल्बुकेर्काच्या पुर्तुगालान 451 वर्सा टप्प्याटप्प्यान गोंयचेर आपली राजवट चलयली. आयचे घडयेक आमी सादूर जावंक नात जाल्यार अशेच तरेन आमच्यो गरजो, प्रस्न पळोवन नवे- नवे पंकज कुमार गांवांनी येतले आनी गांवगिऱ्या वाठारांतल्या लोकांचे, गांवांचे आधार म्हूण तयार जातले. गावांतल्या लोकांच्या अर्थिक अवलंबित्वाची सुत्रां एकदा हातांत मेळ्ळी कांय मागीर पुराय गांव हातांत येवपाक वेळ लागना… आनी उपरांत आमचे गांव ह्या लोकांच्या हातांत वचपाक वेळ लागचो ना.

आमचे नवे पात्रांव
मनीस म्हूण तांकां वा हेर कोणाकूच गांवांत येवन आपलो वेवसाय आनी धंदो करपाक कोणूंच आडोवपाक शकनात. तांणीय त्या गावांतल्या लोकांक मजत करपाक आनी गावांतल्या धर्मीक, संस्कृतीक, समाजीक कार्यावळींनी वांटेकार जांवपाक कोणाचीच हरकत आसपाची गरज ना, पूण तांतूतल्यान आमचो गांव आनी आमचें गांवपण जर धोक्यांत येता जाल्यार मागीर आमकांय कांय बंधना आनी निर्बंध लादचे पडटले, जे आमकां गांवपण सांबाळपाक तयार करचे पडटले. हांतूत कायदेशीर बंधना परस आमी स्वता, स्वता खातीर केल्ली बंधनां म्हत्वाचीं थारतलीं. गोंयचें बाबतीत दिसपट्टे जावपी बदल पळयत जाल्यार गोंयकारपण आनी आमची अस्मिताय कमी जावपाची प्रक्रिया दोबारात वेगान सुरू आसा. आमी हाचेर गंभीरपणान विचार करतात अशें मात्तूयय दिसना. हें चक्र हेच गतीन फिरत उरलें जाल्यार आमकांच कळचें ना, आमी खंय आसतले ते आनी हे नवे पात्रांव केन्ना आमचे नवे गांवकार जातले ते!!

किशोर नायक गांवकार
7774039242