भांगरभूंय | प्रतिनिधी
सात जखमी, एक गंभीर; माशें- दापट, नागव्यां, पर्वरे, नंद्रण- मोल्यां अपघात
काणकोण/ म्हापशें/ फोंडें: सोमारा गोंयांत वेगवेगळ्या वाठारांनी जाल्ल्या चार अपघातांनी चौगांक मरण आयलें. जाल्यार स जाण जखमी जाले.
सोमारा सकाळीं 8 वरांच्या सुमाराक माशें दापट वाठारांत मोटार आनी कदंबा बशीचो अपघात जालो. ह्या अपघातांत मोटार चालक राजेश वेर्णेंकार (52) हाका सुवातेचेरूच मरण आयलें. हेर पांच जाणांक काणकोणच्या समाजीक हॉस्पिटलांत मुळावे उपचार करून मडगांवच्या जिल्हो हॉस्पिटलांत फुडल्या उपचारा खातीर धाडले.
नागव्यां जेसीबी आंगा वयल्यान गेल्ल्यान प्रशांत पवार (30, रा. वेगासवाडो हडफडें, मूळ कर्नाटक) हाका मरण आयलें. तो जेसीबीच्या सकयल न्हिदिल्लो.
हो अपघात शेनवारा सांजेच्या सुमार 7.30 वरांचेर जालो. नागवेंचे संदीप गॅरेजी कडेन जेसीबी (जीए 03 एएफ 0966) पार्क केल्लें. प्रशांत दिसवड्याचो कामगार. विसव घेवपा खातीर तो ह्या जेसीबी पोंदा न्हिदिल्लो.
तोर्डा पैठण पर्वरी जाल्ल्या अपघातांत मोटारीन दुचाकींक मोखली. दुचाकी चालक दर्शना गावडे ही गंभीर जखमी जाल्या.
नंद्रण- मोल्यां गोंयांतल्यान हुबळी वचपी मोटारीचो धपको झाडाक बसून जाल्ल्या अपघातांत भारत एम. तगरसी (43. रा. हुबळी) आनी नवीन नागेश रायकार (36. रा. धारवाड) ह्या दोगांक मरण आयलें. हो अपघात सोमारा सांजेच्या स वरांच्या सुमाराक जालो. ह्या अपघातांत मोटारीचो चुरो जालो.
माशें दापट वाठारांत अपघातांत सांपडिल्लें मूळ गदग कर्नाटकांतलें हें कुटुंब कारवारा रावता. देवदर्शना खातीर गोंयांत मोटारींतल्यान येताले, असो मुळावो अदमास आसा. जाल्यार कदंबा बस काणकोणच्यान कारवारचे दिशेन वताली. माशे दापटच्या वोल्तार मोटार चालकाचो गाडये वयलो ताबो सुटलो आनी ताणें उरफाटे दिशेन येवपी कदंबा बशीक धपको मारलो. हे गाडयेंत वट्ट स जाण आसले. ह्या अपघातांत अंजली वेर्णेंकार (49) ही गंभीर जखमी जाल्या. रामदार वेर्णेंकार (29), करिष्मा वेर्णेंकार (55), अनुषा वेर्णेंकार (21) हांकां मडगांवच्या जिल्हो हॉस्पिटलांत फुडल्या उपचारा खातीर धाडल्यात. कदंबा बशीचो चालक रोबिना फकीर (19) हाका किरकोळ मार बशिल्ल्यान उपचार करून घरा धाडलो. काणकोण पुलिसांनी अपघाताच पंचनामो केलो.
मजगतीं, अपघातांतल्या जखमींचेर उपचार करचे खातीर काणकोण समाजीक हॉस्पिटलाच्या दोतोरांनी बरें काम केलें. पूण जी अॅम्ब्युलन्स फाटल्या चार म्हयन्यांच्यान बंद स्थितींत आशिल्ली. तातूंतल्यान जखमींक मडगांवच्या जिल्हो हॉस्पिटलांत व्हरतना मडगांवच्या उड्डाण पुलाचेर तिचे ब्रेक डावन जाले. उपरांत कशी- बशी करून ती एकदां मडगांवां हॉस्पिटलांत पावली. ह खबर कळटाच काँग्रेसीचे पदाधिकारी जनार्दन भंडारी हांणी ह्या प्रकाराची गंभीर दखल घेवन घाळपणान काम करपी अॅम्ब्युलन्सीच्या चालकाचेर खर कारवाय करची, अशी मागणी तांणी भलायकी खात्याच्या वरिश्ठां कडेन केल्या.
नागव्यां घडणुके वेळार जेसीबी चालक दुबावीत राजेंद्र श्रीकांत शिरोडकार (38, रा. डायसवाडो, नागवें) हाणें जेसीबी सुरू करून फुडें व्हेलें तेन्ना प्रशांत पोंदाक चिड्डलो. प्रशांत पोंदा न्हिदला हाचो अदमास जेसीबी चालकाक येवंक ना. उपरांत जखमी प्रशांताक उपचारा खातीर गोमॅकाँत उपचारा खातीर दाखल केलो. उपचार चालू आसतना ताका मरण आयलें.
पोस्टमार्टम अहवालांत पोटा वयल्यान जेसीबीचो टायर गेल्ल्यान गंभीर जखमी जावन मरण आयिल्ल्याचें दोतोरांनी नोंद केलां.
प्रशांताचो भाव अनील पवार हाचे कागाळीच्या आदारार हणजूणें पुलिसांनी दुबावीत जेसीबी चालक राजेंद्र शिरोडकार हाचे आड गुन्यांव नोंद केला. ताका अटक केली. म्हापशें न्यायालयान जामीनाचेर ताका सोडलो. फुडलो तपास पुलीस उपनिरिक्षक रमेश हरिजन करता.
तोर्डा पैठण पर्वरे जाल्ल्या अपघातां मोटारीन वट्ट सात दुचाकींचें लुकसाण केलें. ह्या अपघातांत दर्शना गावडे गंभीर जखमी जाल्या. पुलिसांनी मोटार चालकाक ताब्यांत घेतलो. मोटारींत सोऱ्याच्यो बाटलो सांपडल्यो. दुबावीत सोरो पियेवन गाडी चलयतालो असो दुबाव आसा.
नंद्रण- मोल्यां गोंयांतल्यान हुबळी वचपी मोटारीचो धपको झाडाक बसून जाल्ल्या अपघातांत भारत एम. तगरसी (43. रा. हुबळी) आनी नवीन नागेश रायकार (36. रा. धारवाड) ह्या दोगांक मरण आयलें. हो अपघात सोमारा सांजेच्या स वरांच्या सुमाराक जालो. ह्या अपघातांत मोटारीचो चुरो जालो.
सोमारा सांजेच्या 6 वरांच्या सुमाराक गोंयांतल्यान हुबळी वचपी केए 63 एन 0537 नंबराची मोटार धोफरायत वताली. नंद्रणच्या घातक वोल्तार चालकाचें गाडये वयलें नियंत्रण सुटिल्ल्यान रस्त्याचे कुशीक आशिल्ल्या झाडाक गाडयेचो नेटाचो धपको बसलो.
ह्या अपघातांत मोटार चालकाक सुवातेचेरूच मरण आयलें जाल्यार चालकाचे कुशीक बशिल्ल्या मनशाक हॉस्पिटलांत उपचारा खातीर व्हरतना मरण आयलें. दोनूय कुडी राती वेळार पिळये मुळाव्या भलायकी केंद्रांतल्यान पोस्टमार्टमा खातीर मडगांवां धाडल्यो. अपघाताची म्हायती मेळटाच निरिक्षक सगूण सावंत आनी हेर पुलीस कर्मचाऱ्यांनी अपघाताचे सुवातेर धांव घेतली. अपघाता वेळार मोटारींत दोगूच आशिल्ले. अपघातात मोटारीच्या फुडल्या भागाचो चुरो जाल्लो.
मजगतीं, नंद्रण- मोल्यां घातक वोल्तार आयज मेरेन कितलेशेच भिरांकूळ अपघात जाल्यात. ताका लागून अनमोड ते मोले मेरेनच्या रस्त्याचें रुंदीकरण खुबूच गरजेचें जालां, अशें लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
