दक्षीण गोंयांत भाजपाचो चड नेट

भांगरभूंय | प्रतिनिधी

उत्तर गोंयांत श्रीपाद नायक हांचो थळाव्या आमदारां सयत प्रचार

पणजी: मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे हांचे सयत भाजपाच्या मंत्र्यांनी, आमदारांनी ह्या वेळार दक्षीण गोंयच्यो उमेदवार पल्लवी धेंपो हांच्या प्रचाराक चड नेट दिला. पूण उत्तर गोंयचे उमेदवार श्रीपाद नायक हांच्या प्रचारा कडेन मात ताचे कडल्यान कांय प्रमाणांत आडनदर जायत आशिल्ल्याचें दिसून येता.

2019 चे लोकसभा वेंचणुकेंत हार खावची पडिल्ल्यान भाजपाच्या थळाव्या आनी केंद्रीय फुडाऱ्यांनी 2024 वर्सा खंयचेय परिस्थितींत दक्षीण गोंय जिखपाचोच असो निश्चेव केला. दक्षीण गोंयांतले उमेदवारी वेल्यान भाजपांत खूबशीं खलबतां रंगले उपरांत निमाणे पल्लवी धेंपो हांच्या रुपान पयलेच फावटी भाजपान दक्षीण गोंयांत बायल उमेदवाराक संद दिल्या. उपरांत प्रचाराचो नाल्ल फोडून भाजपाच्या सगल्या थळाव्या फुडाऱ्यांनी दक्षीण गोंयांत अदीक प्राधान्य दिवन, पल्लची धेंपो हांचो प्रचार सुरू केलाे. मुख्यमंत्री डॉ. प्रमोद सावंत, प्रदेशाध्यक्ष सदानंद तानावडे हांच्या फुडारपणा खाला चडशे फुडारी गोंयांतल्या गांवांगांवांनी वचून पल्लवी धेंपो हांचो प्रचार करीत आसात.

मजगतीं, एके वटेन पल्लवी धेंपो हांचो प्रचार सुरू आसतना उत्तर गोंयांत मात भाजपाच्या व्हडल्या फुडाऱ्यां कडल्यान आडनदर जायत आशिल्ल्याचें चित्र दिसून येता. मुख्यमंत्री, प्रदेशाध्यक्ष आनी हेर फुडारी जे पद्दतीन दक्षीण गोंयांत प्रचार करतात तसो प्रचार तांणी अजून उत्तर गोंयांत सुरू केल्लो ना. श्रीपाद नायक थळाव्या आमदारां सयत गांवांगांवांनी वचून प्रचार करीत आसात. ह्या वेळार भाजपाच्या थळाव्या पांवड्या वेल्या कार्यकर्त्यां कडल्यान तांकां प्रतिसाद मेळटा. पूण भाजपाचे व्हड फुडारी मात उत्तर गोंयांतल्या प्रचारांत पुरायपणान देंविल्ले नात.

केंद्रीय मंत्री श्रीपाद नायक फाटलीं 25 वर्सां उत्तर गोंयचे खासदार आसात. खासदार, केंद्रीय मंत्री ह्या नात्यान तांणी उत्तर गोंयच्या विवीध मळार विकास सादला. ते खातीर ते ह्या वेळार एक लाख मतांनी वेंचून येतले असो पुराय विस्वास थळाव्या फुडाऱ्यांक आशिल्ल्यानूच भाजपाच्या व्हड फुडाऱ्यांनी अजून उत्तरेंत प्रचाराक गती दिवंक नाशिल्ल्याची म्हायती भाजपांतल्या गोपांनी दिली.