भांगरभूंय | प्रतिनिधी
आंतरराश्ट्रीय महिला दीस नारीशक्तीची वंदना घेतली? वंदन घेतना एकामेकांक सांबाळून घेतलें, फुडारांतय तेंच करचें. सुरवात वांगडा वचून, भोंवून तिणें केली, फुडार तिणेंच सोदचो पडटलो अशें न्हय, तिचे बराबर तो, ताचे बराबर ती. ताकाय कळ्ळां तिका बराबर घेवन वचपाक जाय, मातृवंचना नाका मातृवंदना जाय. मातृवंदनेतल्यान मातृसत्ताकाचे दीस येतलेच, ताका बराबर घेवन, एकलीय ती मुखार वतलीच.
स्त्रीशक्ती येता, नारीशक्तीक वंदन केलेबगर वाट दिसचीना हें विखुरिल्ल्यां पानांनी हांवें सांगलें.नारीशक्ती वंदनेतल्यान ती लोकसभेर अंदू पावतलीच, दसरो, दिवाळेक घराय येतली. गणपती
जावन आतां तिणें कित्याक बसप? बसल्यार कितें मेळटलें? भोंवल्यारच ती नारी, ही नारी खंय वता तें तिका कळटलें ही ताची उतरां.
बीना नायक, सुलक्षणा सावंत, विद्या गावडे, सविता तवडकार ही सक्षम नारीशक्ती. उच्च शिक्षणान त्यो आयज ना फाल्यां देशाच्या, गोंयच्या राजकारणांत उंचेल्या पावंड्यार पावतल्योच. उत्तराधिकारी म्हणून न्हय आपलें अस्तित्व दाखयल्यार तांकां मान्यताय मेळटाच. तांची वळख करून कित्याक दिवप? राजकारण, समाजकारणाचेर उलयतना त्यो झगडल्यो तरी निमाणे एक जातल्यो. तांचो एकवट मोडून उडोवपाक राजकारण नाका. कोणाक उडोवपाक? कोणाक धुकलपाक? धुकललें, उडयलें तरी दक्षिणेंतली अस्तुरी आतां राजकारणांत धांवतली. लोकसभेक उत्तर, दक्षिण लागना, तिचें कर्तृप, तिची हे भांगरभुयें कडली लागणूक पळोवची, तिका वेंचून दियात असो उलो तिचे बराबरीन ताणेंय मारचो.
उत्तरेंतय कडकलक्ष्मी, स्त्रीशक्ती, शांतादुर्गा, सांतेर आसा. कोण गांवान, कोण जल्मान, कोण लग्नान. कोण घरांनी, कोण शेतांनी, रानांनी, कोण शाळांनी. ती उद्येगिनी, ती कायदेपंडीत, ती दोतोर, ती इंजिनियर, ती बँकर, ती आर्किटेक्ट आनी खूब कितें. डॉ. प्रमोद साळगांवकार, अॅड. शुभलक्ष्मी नायक, अॅड. शुभलक्ष्मी रायकार, रजनी चोडणकार, सोनिया कुंकळ्ळकार, ज्योती पालेकार, पल्लवी साळगांवकार, निहारिका मांद्रेकार, प्रतिमा धोंड, शीतल नायक, वैदेही नायक, स्मिता पार्सेकार, मेधा परुळेकार, श्रद्धा खलप काल अणभव घेवपी चार आयज चारशें जाल्यात, आंतरराष्ट्रीय महिला दिसांतल्यान.
नरेंद्र सावयकार, विश्वास सतरकार, श्रीनिवास खलप, अनिश नार्वेकार, उत्पल पर्रीकार, सिद्धेश नायक, सुनिल कवठणकार, युगांक नायक हांकांय फुडले विधानसभेत मुख्यमंत्री डॉ. प्रमोद सावंत, भलायकी मंत्री विश्वजीत राणे, पर्यटन मंत्री रोहन खवंटे, आमदार विजय सरदेसाय घेवन वतलेच. अॅड. अमीत पालेकार, अॅड. कार्लोस फेरेरा, वाल्मिकी नायक, प्रविण आर्लेकार आनी हेरांनी मतांच्या झुजाक आतां सावन वावराक लागचें.
वेंचणुकेच्या आंगणांत आसपी स्त्रीशक्ती धूव, सून, घरकान्न, भयण, भावजय, ताई, माई आसतलीच. उतरांचो शिंवर जावचो, भासाभासूय जावची पूण कुरुक्षेत्री रणभूमी नाका.
वेंचणूक लागीं आयलीं आश्वासनां मेळोवपा खातीर आंदोलनां, संप जातात देसांत आनी गोंयांतय आश्वासनां पूण
जैत वेंचणुकेच्या उपरांत फाटल्यान लागल्यार.
33 टक्के राखीवते खातीर अस्तुरी झुजली, जिखली. जिखतकीच राजकारणांत वचपाक भुजांबळ, अर्थीक तांक उच्च शिक्षणा बराबरीन लागता. दक्षिण, उत्तर गोंयांतले अस्तुरेंत ती तांक आयज येता. आरक्षण रोखडेंच कशें मेळटलें ? आयज सुरवात केल्यार 2029 चे लोकसभेंत 50 टक्क्यांनी पावल दवरपाक मेळटलें. पावला कणकणी आडमेळीं आसतलीं पूण आडमेळ्यांतल्यान एक एक सोंपण चडत ती पंतप्रधान कित्याक जावची ना?
सोंपणा चडटा, देंवतना खरस मारतना तिका आधारय तिणेंच दिवचो पडटा. पडल्यार उठपाक, बसोवपाक ती आसतलीच, तो बाराबरीन रावल्यार “कुटुंबराज” बोवाळ जायत? ती धिटाय एकल्याचीच आदले मुख्यमंत्री मनोहर पर्रीकार हांचीच. मुख्यमंत्री डॉ. प्रमोद सावंत घरकान्नीक लोकसभेर, धुवेक विधानसभेर धा वर्सां भितर धाडटलेच, गिरीश चोडणकार हांणीय तेच वाटेन वचचें. आदल्यो आमदार व्हिक्टोरीया (मामी) फर्नांडिस हांकां सुलक्षणाबाय मेळ्ळ्यात, त्योय रणरागिणीच जावंक शकतात. नागपूर सावन गोंयकार जाल्ल्यो बीनाताई बेस बऱ्यो कोंकणी उलयतात. त्यो लोकसभेर गेल्यार तांचो पूत 2027 त गोंय विधानसभेंत आसपाक जाय. सुलक्षणा आनी बीनाताई शिक्षक. विद्या, सविता तर गांवागांवानी भोंवपी, संघशक्तींतल्यान. कुटुंबराज,
परीवार वादाच्या राजकारणा आड कितें शिजता तें तांकांय कळटा. शिकिल्ल्यो तरी वाचन जाय. दक्षिण, उत्तरेंतले नारीशक्तीन वाचन करचें, राजकारणांत एकचित्त जावचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
