भांगरभूंय | प्रतिनिधी
एकल्याक मरण, दोग गंभीर, 4 किरकोळ जखमी
भांगरभूंय । प्रतिनिधी
म्हापशें/ फोंडें: बुधवारा म्हापशें आनी पार- उसगांवां मेळून तीन अपघात जाले. तातूंत एकल्याक मरण आयलें जाल्यार 8 जाण जखमी जाले. जखमींत दोग गंभीर जखमी जाल्यात.
गिरी उड्डाण पुला वयल्यान ट्रक पडून एकल्याक मरण
गिरीच्या ग्रीन पार्क जंक्शन उड्डाण पुला वयल्यान ट्रक सर्वीस रोडार पडून भिरांकूळ अपघात जालो. ह्या अपघातांत सलमोन हेम ब्रोम (21. थिवी, मूळ झारखंड) ह्या कामगाराक ट्रका पोंदां चिड्डून मरण आयलें, जाल्यार चौग जाण जखमी जाले. तातूंतल्या एकल्याक गंभीर दुखापत जाल्या.
जखमी मदीं प्रमेशल मवंदी (21), सोरबेश मवंदी (17), बुद्धीराम मवंदी (17) आनी चालक बहिराम मवंदी (26) हांचो आस्पाव आसा. ते सगळे मूळ झारखंडचे. प्रमेशल मवंदी हो ट्रकाच्या कॅबिनांत आडकल्ल्यान ताचो हात मोडून तो गंभीर जखमी जाला. ताचेर म्हापशें जिल्हो हॉस्पिटलांत उपचार चालू आसात. हेर तिगांनी जीव वाटावपा खातीर ट्रकांतल्यान उडी मारिल्ल्यान ते किरकोळ जखमी जाले.
हो अपघात बुधवारा फांतोडेर 5.30 वरांच्या सुमाराक जालो. जखमी आनी मरण आयिल्लो गावय थिवीचो सेड्रीक डिसोझा हाचे कडेन कामाक आशिल्ले आनी थंयच रावताले. सेड्रीक हो सुको कोयर एकठांय करपाचो वेवसाय करता. जीए 03 के 0837 नंबराचो कोयर व्हरपी आयचर ट्रक थियेच्यान पणजीचे दिशेन कोयर हाडपा खातीर वतालो. ट्रक राष्ट्रीय म्हामार्गा वयल्या गिरीच्या ग्रीन पार्क उड्डाण पुलाचेर पावलो तेन्ना ट्रक चालक बहिराम हाचें गाडये वयलें नियंत्रण गेलें. ट्रक उजवे वटेन वचून दुभाजपाक आपटलो आनी उपरांत चुकीच्या मार्गार वचून हो धोफरायत आयिल्लो ट्रक पुला वयले बॅरिकेड्स मोडून सर्वीस रस्त्यार पडलो.
अपघाता वेळार सलमोन हो हेर दोगां वांगडा ट्रकाच्या फाटल्यान बशिल्लो. दुभाजकाक ट्रक आपट्टाच चालक बहिराम आनी फाटल्यान बशिल्ले मोरबेश आनी बुद्धीराम ह्या तिगांनी जीव वाटावपा खातीर ट्रकांतल्यान भायर उडी मारली. जाल्यार प्रमेशल हाका कॅबिनांतल्यान भायर सरपाक जालें ना. तशेंच फाटल्यान बशिल्लो सलमोन हाकाय भायर उडी मारपाक जाली ना. ट्रक सर्वीस रोडार पडून उमथलो तेन्ना तो ट्रकां पोंदां चिड्डलो.
अपघाताची म्हायती सकाळीं 6 वरांच्या सुमाराक पुलीस आनी उजो पालोवपी दळाक मेळ्ळी. म्हायती मेळटाच उजो पालोवपी दळाचे उपअधिकारी ज्ञानेश्वर सावंत आनी सांगाती जवान घडणुकेचे सुवातेर पावले.
म्हापशें पुलीस उपनिरिक्षक अजय धुरी ऐआनी हवालदार अभिजीत माणगांवकार हांणी पंचनामो केलो. ट्रक चालक बहिरामा आड घाळपणान गाडी चलोवप आनी मनीसवधाचो गुन्यांव नोंद करून पुलिसांनी ताका अटक केली. पुलीस फुडलो तपास करतात.
पार- उसगांवां दुचाकींचो अपघातांत एक गंभीर जखमी
पार- उसगांवां दोन दुचाकी मदीं जाल्ल्या अपघातांत मोहीत महादेव नायक (18. मुरमणे- गुळेली) हो दुचाकी चालक गंभीर जाल्यार विराज शेटकार (भामय- पाळी) हो किरकोळ जखमी जालो. गंभीर जखमी जाल्ल्या मोहीत नायक हाका अदीक उपचार खातीर गोमॅकाँत दाखल केला.
पुलिसांनी दिल्ले म्हायती प्रमाण पार- उसगांवां जीए 04 पी 3566 आनी जीए 05 एच 1005 ह्या दोन दुचाकीं मदीं टक्कर जाली. तातूंत मोहीत नायक गंभीर जखमी जालो. जखमीक 108 अॅम्ब्युलन्सींतल्यान उपजिल्हो हॉस्पिटलांत दाखल केलो. ते उपरांत अदीक उपचारा खातीर गोमॅकाँत व्हेलो.
फोंडें पुलीस स्टेशनाचे निरिक्षक तुषार लोटलीकार हांच्या मार्गदर्शना खाला हवालदार सज्योत सावंत हांणी अपघाताचो पंचनामो केलो.
ब्रेक निकामी जाल्ल्यान मार्ना गणेशपुरी टेम्पोचो अपघात
मार्ना गणेशपुरी देंवतेर ब्रेक निकामी जाल्ल्यान टेम्पोचो राखणे वणटीक आनी झाडाक नेटाचो धपको बसलो. ह्या अपघातांत ट्रक चालक निमीन डिसोझा (जुवारीनगर मुरगांव) हो जखमी जालो.
हो अपघात बुधवारा सकाळीं 11.30 वरांच्या सुमाराक चावडी मार्ना वाठारांत जालो. वास्कोच्यान मोरजी दिशेन वचपी जीए 06 टी 6978 नंबराचो ट्रक उदकाच्यो बाटल्यो घेवन वतालो. म्हापशें मार्गान वतना मार्ना- गणेशपुरी देंवतेर ह्या टेम्पोचो ब्रेक निकामी जालो. गतीन आशिल्लो टेम्पो चावडीच्या मुख्य रस्त्यार पावताच चालकान वेळकाळ वळखून टेम्पो सुरक्षीत अशे सुवातेर रस्त्याचे कुशीक व्हेलो. ह्या वेळार ताचो धपको राखणे वण्टीक आनी झाडाक बसलो. ह्या धपक्यान राखणे वण्टीची मोडतोड जाली आनी झाडाक धपको बशिल्ल्यान टेम्पोची मोडतोड जाली.
जखमी चालकाक रोखड्या रोखडो अॅम्ब्युलन्सींतल्यान शिवोली मुळाव्या भलायकी केंद्रांत दाखल केलो. उपचारा उपरांत ताका घरा धाडलो. ह्या टेम्पोंत लोडर कामगार आशिल्लो. ताका कसलीच दुखापत जावंक ना. राखणे वणत मोडिल्ल्यान रिटा बार्रेटो हांचें लुकसाण जालें. अपघाताचो पंचनामो शिवोली पुलीस हवालदार रुपेश शेटगांवकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
