भांगरभूंय | प्रतिनिधी
युरी आलेमांवः विरियातोन घेतली जनार्दन भंडारीची भेट
भांगरभूंय । प्रतिनिधी
काणकोणः गोंयचें नांव दिसान दीस पेड्डेर जायत आसा. बलात्कार, खून आनी अपघाताचे माळेन दिसाची सुरवात जाता. सरकाराच्या बेजापलदारपणाक आनी घाळपणाक लागून हें जाता. गोंयकारां खातीर गोंय सांबाळून दवरपाक काँग्रेसीच्या उमेदवाराक वेंचात, अशें विरोधी पक्ष फुडारी युरी आलेमांव हांणी सांगलें.
दक्षीण गोंय मतदारसंघाचे काँग्रेसीचे लोकसभा उमेदवार कॅप्टन विरियातो फर्नांडीस हांची बिरेस्तारा श्रीस्थळ पंचायत सभाघरांत कार्यकर्त्यांक मार्गदर्शन करपा खातीर बसका जाली. ते बसकेंत आलेमांव उलयताले. ह्या वेळार उमेदवार विरियातो फर्नांडीस, केपेंचे आमदार एल्टन डिकॉस्टा, दक्षीण गोंय जिल्हो अध्यक्ष सावियो डिसिल्वा, ओरवील दोरान्तो, उर्सिला कॉस्टा, जयेश शेटगांवकार, वेलेंसियो सिमोयश, सिद्धार्थ गायक आनी हेर मानेस्त हाजीर आशिल्ले.
सुशिक्षीत तरणाट्यांक आयज नोकऱ्यो मेळोवचे खातीर 30 ते 40 लाख रुपया दिवचे पडटात. घुंवळे वखदां आनी हेर वायट गजालींक लागून भाजप सरकार गोंयांत गाजता. सिद्धी नायक खून प्रकरणांत एका मंत्र्याच्या भुरग्याचो हात आशिल्ल्यान तें प्रकरण चेपलें. सिद्धीचो आवय- बापूय न्याय मागता, अशें कॅ. विरियातो फर्नांडीस हांणी सांगलें.
भाजपान दिल्लो उमेदवार आनी आपल्याक पळयात. आपणे देशा खातीर सैनीक म्हूण सेवा दिल्या. आपल्याक वेंचून हाडात, असो उलो विरियातो हांणी मारलो. लोकांचो सैनीक ह्या नात्यान फुडलीं पांच वर्सां आपूण समर्पण भावनेन गोंयकारां खातीर वावर करतलों, अशेंय तांणी सांगलें. आबेल बोर्जीस हांणी सुत्रसंचालन केलें. गास्पार कुतिन्हो हांणी उपकार मानले. ते आदीं विरियातो आनी हेरांनी श्रीस्थळच्या श्री मल्लिकार्जून देवाचें दर्शन घेतलें. बसका सोंपले उपरांत तांणी फाटले विधानसभा वेंचणुकेचे काँग्रेस उमेदवार जनार्दन भंडारी हांचीय भेट घेवन तांकां समजावपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.