भांगरभूंय | प्रतिनिधी
सुषमा स्वराज, आदल्यो राखणेमंत्री विधानसभा, लोकसभा वेंचणुके वेळार गोंयांत येवपी. आदले मुख्यमंत्री मनोहर पर्रीकार हांची आयज पांचवी पुण्यतीथ. ‘पर्रीकार राम जाल्यार केंद्रीय मंत्री श्रीपाद नाईक लक्ष्मण, गोंयचीं दोन वज्रां’ हीं सुषमाजींची उतरां. 2019 वर्साचे लोकसभा वेंचणुकेत पर्रीकार नाशिल्ले. भाजपाक मात्सो धपको बसलो पूण श्रीपादभाऊ वेंचून आयले. श्रीपादभाऊंक उत्तर गोंय (पणजी) लोकसभा मतदारसंघातल्यान कुशळ पर्याय भाजपाक अजून मेळूंक ना, काँग्रेस घुस्पागोंदळांतल्यान निकती भायर सरता हें सत. रामाची याद श्रीपादभाऊंक येतलीच पूण तांचेबराबर लव, कुश आसतलेच. ते भाजपांतलेय आसत, काँग्रेस, आम आदमीतलेय आसत. एकादरो बराबरीन, दुसरो सोशल मिडियार, लिपचोरयां, फाटल्यान फुडल्यानय.
भारता कडेन आयज दिव्यांस्त्रां आसली तरी 2024 ची लोकसभा वेंचणूक फाटल्या वेंचणुकांपरस वेगळी जातली. दोन आघाड्यो, अपक्ष, दावे, उजवे, प्रदेशिक पावंड्यावेले राजकी पक्ष एकठांय येवप, फोडाफोडी फाटलीं कांय वर्सा देस पावंड्यार लोकसभा वेंचणुकावेळार लोक पळयत आयल्यात. आतां तें राजकारण नेटान चललां, कोण खंय केन्ना वचत ताचे अदमास अचूक बांदप, उक्तावप खर जाता, खिणाखिणाक आंकड्याचे खेळय बदलतात.
पिराय, उच्च शिक्षणाक राजकारणांत म्हत्व आसचें हें गोंयच्या आदल्या मुखेलमंत्र्यांचें मत. म्हज्या स्तंभलेखनातल्यान हांव ह्या दोन विशयांचेर विचार परगटायत रावलां. ते एकाच न्हय सगल्या राष्ट्रीय पक्षांनी आपणायले (सवकासायेन आपणावप वावर सुरु जालां ) तर राजकारणांत बदल येतले. २१ व्या शेंकड्याच्या पंचवीसाव्या वर्सां कडेन वतना, उपरांतच्यो कांय व्हडा राज्यांतल्यो वेंचणुको राजकारण ढवळावन उडोवपी आसतल्यो.
खासदार, आमदारांचो पगार वाडटा, भत्तेय बरे मेळटा म्हणून समेस्तांक राजकारणांत येवचें अशें दिसल्यार अजाप जावचें न्हय. उच्च शिक्षण नाशिल्ले कामदार, शेतकामती, सान्न मारपीय गॉडफादराच्या आधारान व्हडय आदीं जाल्यात, थोडें भोव समाजकारण आशिल्ल्यान. राजकारणाची व्याख्या बदलता, मतदार हुषार, सुवार्थी जाता, राजकारण्याच्या जैतांतलो वांटेकार समजून तो आपलोय वांटो मागता, सोदता. धा- पंधरा वर्सांत राजकारणांत तें वारें व्हावंपाक लागलां हें सत ज्येश्ठ राजकारणी न्हयकारचे ना.
हिंदुत्वाच्या राजकारणा परसय गोंयां सारक्या राज्यांत कॅथोलिक धर्मीय भाजपाक लागीं येतात, आपल्या धर्माकय जागपी. हे विचार आदल्या मुख्यमंत्र्यांचे पर्रीकार हांचें, ‘एक मनोहर कथा’ ह्या पुस्तकांतले. तांकां भाजपाचो परजळीत फुडार दिशिल्लो व्हय? २०१४ वर्साचे लोकसभा वेंचणुकेखातीर प्रधानमंत्री नरेंद्र मोदी हांकां गोंयांत हाडून तांच्या हातांत भाजपा विधिमंडळाचें नेतृत्व दिवपा वेळार तांकां टेन्शन आशिल्लें. काळाचीं पावलां मोदीजींचे वटेन आसात हें तांकां होल्मल्लें? राजकारणाचें तर्कशास्त्र, नितीशास्त्र वेगळें आसता हेय तांचे विचारय मातयेभरवण जायत पूण सिमेंट काँक्रीटांतल्यान तें जोडूंक येता होय ताचो अर्थ आसूंये.
लक्ष्मणा वांगडा लव कुश जेन्ना प्रचाराक भोंवतले तेन्ना जें दिसता तें भांगर न्हय हें समजुपाची तांक तांचे भितर आसची पडटली. कालच्या प्रचाराचे तंत्र आयज ना, तेरां दिसां भितर वेंचणुकेचे निमाणें चित्र एका सेकंदांत बदलपाक येता. वेंचणूक लागीं पावल्या, मतां मेजपा खातीर नवी यंत्रणा येतना मतदारां खातीर गोंयांत सैमाचीं नवीं रुपां, मतदानकेंद्रांय जाल्यांत. स्त्रीशक्ती खातीर खासा मतदानकेंद्रार बोमाडे, गुलाबापरस पुस्तकां, नव्यो सुविधा कित्याक नाका? कांय मतदान केंद्रां पांचवीताल्ल करपाची येवजण बरी, फुडार घरा बशिल्लेकडेन मतदान करुंक मेळपाचो, ते दीस पयस ना.
देशाचें राजकारण दोन मुखेल पक्षाच्या हातांत वचपाचीं चिन्नां दिसतात. कालचे इश्ट फाल्यांचे दुस्मान, फाल्याचें दुस्मान परवाचें इश्ट आनी दुस्मानय जावंक शकतात. तोपयो, बिल्ले, बनेरां, कट आऊटस आयले? कट आऊटस, बनेरां लावपाक नवी मार्गदर्शिका आसा? सैम संतुळां राखून बनेरां, कटआऊटस केल्यांत? उमेदवारी अर्ज घेवपाची वेवस्था उत्तर जिल्लो कार्यालयांत केल्या आसत जाल्यार ती घटमूट आसची. नदर दवरपी कॅमेरा चारय दिकांनी आसात, जोडणी एका मेजार, एकेच कडेन. गोंयचे मुखेल सचिव नव्या कांपाल वॉक वे र वॉकिंग करतना पयस राखणे वेवस्थाय आसता. तांचे अणभव नितळसाणीच्या वावराक चड बळगें दितले? दीस घोटां, आंबे पणसाचे, जांभळांचे. च्या, कोल्ड कॉफी, फालुदा, आयस्क्रिम बिर्याणी बरी म्हणपाचे. वारो, पावस भिरांकुळ नासतलो, अरिश्ट आयल्यार झुजपाची तयारी आसची. लव कुशा खातीर तो अणभव आसतलो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
