भांगरभूंय | प्रतिनिधी
हायड्रोपोनीक तंत्रा वरवीं घरांत लायिल्लो गांजो
भांगरभूंय । प्रतिनिधी
पणजीः गोंय पुलिशेच्या घुंवळे वखदां विरोधी पंगडान (एएनसी) बोरये धाड घालून गांजाची लागवड करपी प्रयोगशाळा उजवाडाक हाडली. ती हायड्रोपोनीक तंत्रा वरवीं उच्च दर्जाच्या गांजाची लागवड करताली.
ह्या प्रकरणांत एएनसीन युवराज बोरकार (31. बोरी- फोंडें) ह्या सिव्हील अभियंत्याक अटक केली. ताचे कडल्यान 8.5 लाख रुपया मोलाचो 15 ग्राम एमडीएमए, 1 कील गांजो आनी 150 ग्राम हायड्रोपोनीक तंत्रा वरवीं लागवड केल्लो उच्च दर्जाचो गांजो जप्त केलो.
एएनसीन दिल्ले म्हायती प्रमाण, बोरी- फोंड्यां एक तरणाटो घुंवळी वखदांचे तस्करींत घुस्पल्ल्याची पंगडाक म्हायती मेळिल्ली. ताचे वयल्यान पुलीस अधिक्षक अक्षत कौशल आनी उपअधिक्षक नेर्लोन आल्बुकर्क हांच्या मार्गदर्शना खाला पुलीस निरिक्षक संजीत पिल्ले हांच्या फुडारपणा खाला पुलीस उपनिरिक्षक प्रियंका गारुडी आनी हेर कर्मचाऱ्यांच्या पंगडान गुप्तहेरांनी दिल्ले सुवाचेर शुक्रारा धाड घातली आनी हायड्रोपोनीक तंत्रा वरवीं उच्च दर्जाच्या गांजाची लागवड करपी प्रयोगशाळा उजवाडाक हाडली.
पंगडान युवराज बोरकार हाका ताब्यांत घेवन ताची चवकशी केली. त्या वेळार तो विदेशी संकेतथळा वयल्यान उच्च दर्जाची गांजाची लागवड करचे खातीर बीं मागयतालो, अशी म्हायती मेळ्ळी. तशेंच तो आपल्या घरांत हायड्रोपोनीक तंत्रा वरवीं उच्च दर्जाच्या गांजाची लागवड करतालो, अशेंय मुखार आयलें. पंगडान बोरकारा कडल्यान 8.5 लाख रुपया मोलाचो 15 ग्राम एमडीएमए, 1 कील गांजो आनी 150 ग्राम हायड्रोपोनीक तंत्रा वरवीं लागवड केल्लो उच्च दर्जाचो गांजो जप्त केलो. ते परांत पुलीस उपनिरिक्षक प्रियंका गारुडी हांणी बोरकार हाचे आड घुंवळे वखदां विरोधी कायद्याच्या कलम 20 (बी)(II)(बी) आनी 22 (सी) खाला गुन्यांव दाखल करून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
