भांगरभूंय | प्रतिनिधी
-दोगांच्याय घरकान्नीच्या नांवार दुपेटीन संपत्ती, प्रतिज्ञापत्रांतली म्हायती
पणजी: काँग्रसचे उत्तर गोंयचे उमेदवार अॅड. रमाकांत खलप हांचे कडेन 6.22 कोटींची, जाल्यार दक्षीण गोंयचे उमेदवार कॅ. विरियातो फर्नांडीस हांचे कडेन 1.95 कोटींची मालमत्ता आसा. दोनूय उमेदवारांनी बुधवारा उमेदवारी अर्जा वांगडा सादर केल्ल्या प्रतिज्ञापत्रांतल्यान ही म्हायती मुखार आयल्या.
खलप हांची घरकान्न निर्मला खलप हांचे कडेन सुमार 11.53 कोटींची, जाल्यार विरियातो फर्नांडीस हांची घरकान्न अनिता फर्नांडीस हांचे कडेन 3.31 कोटींची मालमत्ता आशिल्ल्याचे प्रतिज्ञापत्रांतल्यान उक्तें जाला.
अॅड. खलप हांच्या बचत खात्यांत 1.07 कोटी रुपया आसात. बाँड्स, म्युच्युअल फंड आदींत तांची 45 लाख रुपयांची गुंतवणूक आसा. तांचे कडेन 3.60 लाखांची वाहनां आसात, जाल्यार 3.47 कोटींची स्थावर मालतत्ता तांचे कडेन आसा. तांची घरकान्न निर्मला सांवत हांचे कडेन गुंतवणूक, बँक खाती, भांगर आनी हेर मेळून 4.92 कोटी जाल्यार 6.61 कोटींच्यो जमनी मेळून 11.53 कोटींची मालमत्ता आसा. मजगतीं, मंगळारा भाजापाच्या दोनूय उमेदवारांनी उमेदवारी अर्ज सादर केले उपरांत काँग्रेस उमेदवारांनी बुधवारा रामनमीच्या म्हुर्तार उमेदवारी अर्ज दाखल केले. काँग्रेस प्रदेशाध्यक्ष अमीत पाटकार, विरोधी पक्षफुडारी युरी आलेमांव हांचे सयत इंडी आघाडीच्या घटक पक्षांचे मुखेल दोनूय उमेदवारांचे अर्ज दाखल करतना हाजीर अाशिल्ले.
विरियातो फर्नांडीस हांच्या विवीध बँक खात्यांनी मेळून 1.62 लाख रुपया आसात. तांणी म्युच्युअल फंडांत सुमार 57 लाख रुपया गुंतवणूक केल्या. जाल्यार अनिता हांणी शॅर बाजार आनी म्युच्युअल फंडांत मेळून 2.07 लाख रुपया गुंतवणूक केल्या. तशेंच विरियातो हांणी आपले कडेन 24.50 लाखांची तीन वाहनां, 4.32 लाखांचें भाभंगर आशिल्ल्याचे नमूद केला.
मजगतीं, लोकसभा वेंचणुकेंत देंविल्ल्या रिव्हॉल्युशनरी गोवन्स (आरजीपी) ह्या तिसऱ्या पक्षाचे उत्तर गोंयचे उमेदवार मनोज परब आनी दक्षीण गोंयचे उमेदवार रुबर्ट परेरा बिरेस्तारा उमेदवारी अर्ज दाखल करतले.
………………………
विरियातो हांचे आड एक एफआयआर नोंद
अॅड. रमाकांत खलप हांचे विरोधांत कसल्याच प्रकारचो गुन्यांव नोंद ना. पूण कॅ. विरियातो फर्नांडीस हांचे आड मायणा -कुतरी पुलिशेंत एक एफआयआर नोंद आसा. हे विशीं मडगांवच्या न्यायालयांत खटलो सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
