कोरोना दुयेंतींचो शेंकडो

भांगरभूंय | प्रतिनिधी

आनीक 3- 4 दिसांनी कोरोनान आमच्या देशांत पावल दवरून लाॅकडावन जाल्ल्याक तीन वर्सां पुराय जातलीं. ह्या विचित्र दुयेंसाक लागून हजारांनी भारतीयांक मरण आयलें. पोरूं घेतिल्ल्या वासिनांचे दुश्परिणाम आयज दिसतात, असोय कांय जाणांचो दावो. जोडकार गेल्ल्यान घरां बसलीं, तीं अजून नीट उबीं रावंक नात. वेवसायिकांचेरुय परिणाम जाला. सप्टेंबर 2020, मे 2021 ह्या दोन म्हयन्यांनी तर कितलींशींच मरणां जालीं. तें चित्र नदरे मुखार हाडल्यार आजूनय आंगार कांटो येता. गोंयांत कोरोनाक लागून 4013 दुयेंतींक मरण आयलें. आयतार सांजवेळ मेरेन एकूण 2 लाख 59 हजार 280 लोकांक कोरोनाची बाधा जाल्या. सरकारा कडेन नोंद जावंक नाशिल्लीं प्रकरणां वेगळीं. हुस्क्याची गजाल म्हणल्यार फाटल्या कांय दिसांनी कोरोनाचे दुयेंती परत वाडपाक लागल्यात. आयतारा सक्रीय दुयेंतींचो आंकडो 103 चेर पावलो. फाटलें वर्सभर तो शंबरां सकयल आशिल्लो. सध्या देशभरांत एच 3 एन 2 विशाणू सांवार घालपाक लागला. ताकाच लागून हे कोरोनाचे दुयेंती वाडल्यात असो तज्ञांचो अदमास. समाधानाची गजाल म्हणल्यार कोणाकूच अजून हाॅस्पिटलांत व्हरपाचो वेळ येवंक ना. सगले दुयेंतीक घरा कडेनूच उपचार घेतात. तरीय तांणी आनी तांच्या घरच्यांनी स्वताची काळजी घेवपाक जाय. चड दीस जोर, थंडी, खांक येत रावल्यार दोतोरांचो सल्लो घेवपाक जाय. कारण गोंयांत नासलो तरी हो एच 3 एन 2 विशाणू हेर राज्यांनी धोक्याचो थारला.
गोंयांत भौशीक जाग्यांचेर गर्दी जावपाचें, बंद सभाघरांनी सुवाळ्यांक लोक जमपाचें चालूच आसा. कोण सुरक्षीत अंतर पाळिनात, मास्क घालिनात, बशींनीय गर्दी आसता. सरकारान कोरोना आड कसलींच बंधना अजून जाहीर करूंक नात. पूण, सगलें कितें सरकारान करचें, अशें म्हणून आमकां भौशीक भलायकेक बादा हाडपाचो अधिकार ना. आमी हात फाफडून मेकळे जाले आनी कोरोनान परत कुस बदल्ली जाल्यार ताचे वायट परिणाम आमकांक भोगचे पडटले. तेन्ना आमी स्वताच नेम पाळपाक जाय. सुरक्षीत अंतर दवरप, गर्दी आसा थंय वा हेर वेळार मास्क घालप, हात, पांय शाबू लावन सारके धुवप. खोंकली, जोर, थंडी आसल्यार घरा रावन स्वताची जतनाय घेवप… इतलें करप कोणाक कठीण न्हय. एकदां आमकां भोगलां. तें आनीक परत नाका. कारण कोरोना वा हेर नवे विशाणू हवेच्या वेगान पातळटात. हो अदमास न्हय, दोन वर्सां पयलीं सगल्यांकूच ताचो वायट अणभव आयला. उपचारां परस पयलींच खबरदारी घेवप बरें. जांकां पयलींच गंभीर दुयेंस आसा, तांणी तर चड जागृत रावप गरजेचें. प्रत्येक गजाली खातीर सरकाराचे घोशणेची वाट पळोवचे परस आपूणच उपाय घेतल्यार वायट कितें? कांय जाणांच्या मतान पावसाच्या दिसांनी कोरोना वा इतर दुयेंसां नेटान पातळटात, मात गोंयांत भर गिमाच्या दिसांनी तें घडून आयलां. माय तेंकला. सगले सादूर रावया. विखाची परिक्षा नाका.
सध्या वातावरणूय सारकें ना. केन्ना शीं पडत आनी गर्मी जायत तें तज्ञांकूय सांगपाक जावचें ना, इतलें हवामान लहरी जालां. ताचोय भलायकेचेर परिणाम जाला. ताका लागून पुश्टीक आहार घेवपाचो सल्लो भलायकी खातें आनी राज्यांतल्या जाणकारांनी दिला. गोंयकार भलायके विशी जागृत जाल्यात ही गजाल खरी, पूण जायते गोंयकार अशे आसात, जांकां भायलें तेलकट, मसाल्याचें खाल्ले बगर सुशेग मेळना. कांय जाण तर दिसपट्टे हें जंक फूड खातात. पिरायेचे विशी, तिशी मेरेन कांय माल पडना, पूण चाळिशी हुपली काय मागीर गोडेंमूत, ब्लड प्रेशर आनी उरिल्लीं दुयेंसां, रोग एक -एक करून तकली वयर काडटात. तेन्ना पश्चाताप करून कांय फायदो ना. आतांच आहाराचे नियंत्रण दवरप बरें. गर्मी जाता म्हूण मसाल्याचें खालें आनी थंड पेयां पियोवन दुयेंत पडले जाल्यार तें कोरोनाचेर पडपाची भिरांत न्हयकारूं येना. गरज नासतना मेळत थंय हेडप, जागरणां करपूय योग्य न्हय. गोंयकारांची जिणे शैली बदल्ल्याच, पूण ताचेच वांगडा ‘खावपा- जेवपाची’य शैली बदल्ल्या. जिबेचेर नियंत्रण दवरिना जाल्यार आमचें भलायकेचेरुय नियंत्रण उरचें ना. खबर आसा आमकां हें, पूण…..