भांगरभूंय | प्रतिनिधी
-मुख्यमंत्री डॉ. प्रमोद सावंत हांकां ठाम विस्वास
पणजी: काँग्रेसीन कोणाकूय उमेदवार दिली जाल्यार ताचो फरक आमकां पडना. हे खेपे लोकसभेच्यो दोनूय सुवातो भाजपच जिखतलो. श्रीपाद नायक एक लाखांच्या मताधिक्क्यान जाल्यार पल्लवी धेंपो 60 हजारांच्या मनाधिक्क्यान जैतिवंत जातल्यो, असो ठाम विस्वास मुख्यमंत्री डॉ. प्रमोद सावंत हांणी शेनवारा पत्रकारां कडेन उलयतना उक्तायलो.
उमेदवारी अर्ज भरपाक 6 दीस उरिल्लें आसतना शेनवारा काँग्रेसीन दोनूय मतदारसंघांतले उमेदवार घोशीत केल्यात. हे विशीं पत्रकारांनी मुख्यमंत्र्यांक विचारले, तेन्ना तांणी काँग्रेसीन दिल्ल्या उमेदवारांचो कसलोच फरक भाजपाचेर पडचो ना. हे खेपे खंयचेय परिस्थितींत दोनूय सुवातो जिखपाचो आमी निश्चेव केला. ते नदरेन पुराय राज्यांत प्रचाराची पयली फेरी पुराय जाल्या. दुसरी फेरीय सुरू केल्या. गांवागांवांनी वचून भाजप फुडारी, पदाधिकारी, कार्यकर्ते दोनूय उमेदवारांचो प्रचार करतात. ताका लागून हे खेपे उत्तर गोंयची सुवात एक लाखांच्या मताधिक्क्यान जाल्यार दक्षीण गोंयची सुवात 60 हजारांच्या मताधिक्क्यान भाजप उमेदवार जिखतले, हाचेर आपलो ठाम विस्वास आसा, अशेंय तांणी सांगलें.
मजगतीं, दोनूय मतदारसंघांतले उमेदवार घोशीत केले उपरांत मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे हांचे सयत सगले मंत्री, भाजप आमदार, पदाधिकारी आनी कार्यकर्त्यांनी दोनूय उमेदवारा सयत तळागाळांत वचून प्रचार सुरू केला. दक्षीण गोंयच्या उमेदवारी वयल्यान नाराज जाल्ले फुडारीय दीस-रात प्रचार करतात. आपापल्या मतदारसंघांतल्यान चडांत चड मतां भाजप उमेदवाराक मेळोवन दिवपाचो निश्चेव सगल्यांनीच केला. ते खातीर अंदूं भाजप उमेदवार भोवमतान जिखून येतले, असो विस्वास मुख्यमंत्री आनी तानावडे हांकां अासा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
