भांगरभूंय | प्रतिनिधी
पणजी, बातमीदार ः गोंयचे मुख्यमंत्री पदाचेर आशिल्ले कांय फुडाऱ्यांनीच लोकसभेची वेंचणूक लढयली. तातूंतले चर्चिल आलेमांव, फ्रान्सीस सार्दीन आनी रवी नायक हें तिगूय जैतिवंत जावन लोकसभेंत पावले. जाल्यार, लुईझिन फालेरो, स्व. मनोहर पर्रीकार आनी डॉ. विल्फ्रेड डिसोझा हांका हार मेळ्ळी. आदले मुख्यमंत्री स्व. भाऊसाहेब बांदोडकर, स्व. शशिकला काकोडकार, प्रतापसिंह राणे, डॉ. लुईस प्रोत बार्बोजा, दिगंबर कामत, प्रा. लक्ष्मीकांत पार्सेकार आनी सध्याचे मुख्यमंत्री डॉ. प्रमोद सावंत हांणी लोकसभेची वेंचणूक लढोवंक ना.
आदले मुख्यमंत्री रवी नायक (उत्तर गोंय) आनी फ्रान्सिस सार्दिन (दक्षीण गोंय) हे दोगूय 1998 वर्साच जाल्ली लोकसभेची वेंचणूक जिखून खासदार जाले. दोगूय काँग्रेसीचें उमेदवारीचेर जिखिल्लें. हाचे उपरांत रवी नायक हांणी परतून 2014 वर्सा उत्तर गोंयांतल्यान काँग्रेसी खातीर वेंचणूक लढयली. पूण ते वेळार श्रीपाद नायक हांचे कडल्यान तांकां हार मेळ्ळी. पूण 1998 उपरांत 2007 वर्सा (पोटवेंचणूक) 2009 आनी 2019 वर्सा जाल्ले वेंचणुकेंत आदले मुख्यमंत्री सार्दिन जिखले. 1990 वर्सा फकत 18 दीस मुख्यमंत्री म्हणून काम केल्ल्या चर्चिल हांणी 1996 वर्सा दक्षीण गोंयांत युगोडेपाची तिकीट जिखून पयलेच खेपे लोकसभेंत प्रवेश केलो. ते उपरांत फुडले लोकसभा वेंचणुकेंत (1998) दक्षीण गोंयांत तें हारलें. उपरांत कांय काळा उपरांत तांणी काँग्रेसींत प्रवेश केलो. परतून 2004 वर्साचे लोकसभा वेंचणुकेंत (दक्षीण गोंय) काँग्रेसीची उमेदवारी जिखून दुसरे खेपे तें खासदार जाले.
मुख्यमंत्री पदाचेर आशिल्ले मनोहर पर्रीकार हांणी 1991 आनी 1996 वर्सा भाजपा वतीन उत्तर गोंयांतल्यान लोकसभेची वेंचणूक लढयल्ली. 1991 वर्सा काँग्रेसीचे हरीश झांट्ये आनी 1996 वर्सा मगोचे रमाकांत खलप हांणी तांकां हारयले. 1998 वर्सा मुख्यमंत्री जाल्ले लुईझीन फालेरो हांणी 1984 वर्सा दक्षीण गोंयच्यान गोंय काँग्रेसीच्या उमेदवाराचेर लोकसभेची वेंचणूक लढयली. काँग्रेसीचे एदुआर्द फालेरो हांणी तांकां हारयले. पयलेच खेपे 1993 वर्सा आनी उपरांत 1998 वर्सा मुख्यमंत्री जाल्ले डॉ. विल्फ्रेड डिसोझा हांणी 1999 वर्सा दक्षीण गोंयांतल्यान आनी 2004 वर्सा उत्तर गोंयांतल्यान लोकसभेची वेंचणूक लढयली. राष्ट्रवादी काँग्रेस वतीन वेंचणूक लढयतना तांकां दोनूय वेळार हार खावची पडली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
