भांगरभूंय | प्रतिनिधी
नवी दिल्ली, खबरां संस्था ः भारता सयत संवसारभर प्रदुशण ही एक व्हड समस्या. प्रदुशणाक लागून मनशाच्या जिवाक व्हड धोको निर्माण जाता. दमो, ॲलर्जी आदी दुयेंस प्रदुशणाक लागून जातात. आतां तातूंत ‘गोडेंमूत टायप-2’चो आस्पाव जाला, अशीं धक्को दिवपी म्हायती ‘लॅन्सॅट’च्या संशोधनांतल्यान उक्ती जाल्या.
2.5 PM हवेंत चड काळ आयल्यार टायप-2 गोडेंमूत जावपाचो धोको वाडटा. वातावरणांतले धुल्लकण केंसापरस 30 पटींनी पातळ आसतात. ‘लॅन्सेट’ ह्या वैजकी नेमाळ्यान हाचेर चड संशोधन केलां आनी टायप-2 गोडेंमूत आशिल्ले 20 टक्के दुयेंती 2.5 PM प्रदुशणांत रावतात अशें दिसून आयलां.
भारतांत प्रदुशण वाडत आसा आनी देशांतली व्हड लोकसंख्या प्रदुशीत हवेच्या संपर्कात आसा. PM 2.5 प्रदुशक जिणेक हानीकारक आसतात. शारांतल्या प्रदुशणाचो हो एक मुखेल घटक. मनशाक ‘PM 2.5’ हवेचो संपर्क आयल्यार ताचो परिणाम मज्जातंतूचेर जाता. तशेंच इन्सुलिनाचें समतोल इबाडटा आनी काळजाच्या दुयेंसांचोय धोको वाडटा.
PM 2.5 प्रदुशीत हवेंत म्हयनोभर रावल्यार रगतांतली साकर वाडटा. जाल्यार एक वर्स हे हवेंत रावल्यार टायप-2 गोडेंमूत जावपाचो धोको 20 टक्क्यांनी वाडटा. 537 कोटी लोकांक टायप 2 गोडेंमूत आसा. संवसारीक भलायकी संघटनेच्या म्हणण्या प्रमाण 18 वर्सां वयर पिरायेच्या 77 कोटी लोकांक गोडेंमूत (टायप-2) आसा. जाल्यार फुडाराक 25 कोटी लोकांक गोडेंमूत जावपाचो धोको आसा.
भारतीय शारां प्रदुशीत
संवसारीक हवेचो दर्जो ह्या अहवाला प्रमाण बिहारांतलें बेगूसराय हें संवसारांतलें सगळ्यांत चड प्रदुशीत शार जाल्यार दिल्ली ही सगळ्यांत चड प्रदुशीत राजधानी. 2018 वर्सा उपरांत चार फावटीं संवसारांतली सगळ्यांत प्रदुशीत राजधानी म्हणून दिल्लीचो आस्पाव जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
