भांगरभूंय | प्रतिनिधी
धुल्लगाळ जाली भाजप समर्थकांची बसका
काणकोण, प्रतिनिधी ः ह्या 10 वर्सांत पेडणें सावन काणकोण मेरेन व्हड प्रमाणांत उदरगत जाल्या. 50 वर्सांत काँग्रेस सरकाराक जें शक्य जाले ना तें मोदी सरकारान फक्त 10 वर्सां भितर केलां. दक्षीण गोंयची लोकसभेची उमेदवार पल्लवी धेंपोक मतां दिवन तें मत नरेंद्र मोदीक मेळटले आनी नरेंद्र मोदी तिसरे खेपे प्रधानमंत्री जातले. तुमी दिल्ल्या दरेका मताचें श्रेय वेगवेगळ्या फुडाऱ्यांक दिवचे बदला काणकोणच्या लोकांक दितले अशें मुख्यमंत्री डॉ. प्रमोद सावंत हांणी सांगले.
काणकोणचे आदले आमदार आनी फाटल्या विधानसभा वेंचणुकेंत अपक्ष उमेदवारी दाखल करुन 6 हजारा परस चड मतां घेतिल्ल्या इजिदोर फर्नाडीस हांणी धुल्लगाळ हांगा आपयल्ल्या समर्थकांच्या बसकेंत मुख्यमंत्री डॉ. सावंत उलयताले.
ह्या वेळार उमेदवार पल्लवी धेंपो, इजिदोर फर्नाडीस हाजीर आशिल्ले. भाजपा सरकारान सुरू केल्ल्यो सगळ्यो येवजण्यो सगळ्यां खातीर आसात आनी गोंयांतल्या 1 लाख 35 हजार घरकान्नांक गृह आधार येवजणेचो लाव मेळटा. इजिदोर समर्थकांचे प्रस्न सोडोवपा खातीर फुडल्या तीन म्हयन्यांत आनीक एक बसका जातली अशें डॉ. सावंत हांणी सांगले. काँग्रेस जाती धर्माच्या नांवान राजकारण करता आनी भाजपा उदरगतीच्या नांवान राजकारण करता.
ह्या वेळार उलयतना फर्नाडीस हांणी सांगलें की काणकोणांत जायत्यो समस्या आसात, पूण आतां ते समस्यां विशीं उलयना. काणकोणांतल्या लोकांक उण्योच 300 तरी नोकऱ्यो दिवपाची मागणी मुख्यमंत्री डॉ. सावंत हांचे कडेन तांणी केली. आपलो आनी आपल्या समर्थकांचो उमेदवार पल्लवी धेंपोक पुराय तेंको आसा. धेंपोक व्हड प्रमाणांत मतां दिवन वेंचून हाडची असो उलो फर्नाडीस हांणी समर्थकांक मारलो.
हे बसकेंत गावडोंगरी सरपंच धिल्लन देसाय, नगरसेवक शुभम कोमरपंत, श्रीस्थळचे आदले सरपंच देवेंद्र नायक, भाजपाचे आदले मंडळ अध्यक्ष नंदीप भगत आनी हेर कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
