भांगरभूंय | प्रतिनिधी
भारताचे शिक्षण वेवस्थेंत व्हड बदल जावं येतात. ह्या बदलाचो एक वांटो म्हळ्यार ‘ओपन बूक एग्झाम’ (ओबीर्इ)ही संकल्पना. हालींच केंद्रीय माध्यमीक शिक्षण मंडळान (सीबीएसर्इ) सद्याक धावी ते बारावेच्या वर्गा खातीर ‘ओपन बूक एग्झाम’ पद्दतीची प्रायोगीक कार्यावळ सुरू करपाची घोशणा केल्या. फुडारांत लेगीत णववी ते बारावी वर्गाची परिक्षा अशेच तरेन जातली अशे संकेत दिल्यात. ही परिक्षा ‘ट्रायल’ म्हूण घेवपाचो प्रस्ताव मंडळान कांय शाळांक धाडला अशेंय कळटा.
2020 राश्ट्रीय शिक्षण धोरणांत ‘उक्ती परिक्षा पद्द’ आनी मार्गदर्शक हांचे विशीं मार्गदर्शक तत्वां थारायल्यांत. देखून फुडारांत कांय शाळांनी ही परिक्षा घेवपाचे प्रयोग करतले अशी म्हायती शिक्षणीक संचालक जोसेफ इमॅन्युएल हांणी एका माध्यमां लागीं उलयतना सांगलें. ही पद्दत चड करून उच्च शिक्षणांत पाळटात. तशेंच जायत्या शिक्षणीक नदरेन प्रगत देशांनीय ‘ओबीर्इ’ मुल्यांकन सुरू केलां. पूण, भारता सारक्या विषम फाटभूंय आशिल्ल्या विशाल देशांत ‘ओबीर्इ’चें मुल्यांकन सुरू करचे पयलीं खूब तयारी आनी मार्गदर्शन करपाची गरज आसतली. ओबीर्इ मुल्यांकन आपणायल्यार विद्यार्थ्यांक फायदो जातलो काय ना? हाचो सोद सीबीएसर्इन घेवपाची गरज आसा. ताका लागून सद्याक ओबीर्इचो अभ्यास करप गरजेचें आसा.
मजगतीं हालींच पुणे राज्य मंडळाचे अध्यक्ष शरद गोसावी हांणी धावी परिक्षेचे विशीं म्हायती दिवपा खातीर मंडळान आयोजीत केल्ले पत्रकार परिशदेंत म्हणलें,- देशांत कांय सुवातींनी भरती परिक्षेंत ही परिक्षा पद्दत वापरतात. ‘सीबीएसर्इ’ सोडल्यार हेर खंयच्या शिक्षण मंडळान शाळा शिक्षणांत ही पद्दत चालीक लावपाचो ठोस निर्णय जाहीर करूंक ना.
सीबीएसर्इची ओबीई पद्दत म्हळ्यार कितें?
ओबीर्इ वा उक्ती पुस्तक परिक्षा पद्दत म्हळ्यार ‘ओपन बूक एग्झाम’ हातूंत विद्यार्थ्यांक नोट्स, पुस्तकां, गायड, मार्गदर्शक तत्वां, मार्गदर्शिका आदींचो वापर करून प्रस्नांची जाप बरोवंक मेकळीक मेळटली. प्रस्नांच्यो जापो बरोवपाक पुस्तकांचो वापर जाल्ल्यान, तेच परीं प्रस्नांची कठीण पातळी आनी प्रस्न विचारपाचे पद्दतींत बदल करपांत येतलो. ‘सीबीएसर्इन’ प्रयोग तत्वांचेर कांय शाळांनी यत्ता णववी आनी धावेच्या वर्गाचे इंग्लिश, गणीत आनी विज्ञान ह्या विशयांचीं, जाल्यार यत्ता इकरावी आनी बारावेच्या खातीर इंग्लीश, गणीत आनी जिवनशास्त्रा खातीर ह्या विशयांची ही परिक्षा नोव्हेंबर- डिसेंबर म्हयन्यांत घेवपाचो प्रस्ताव मांडला. हे परिक्षे वरवीं प्रस्नावळी, मुल्यमापन, परिक्षेक लागपी वेळ, जाप बरोपाची पद्दत, परिक्षेचो विद्यार्थ्यांचेर पडिल्लो ताण अश्या म्हत्वांच्या मुद्दयांचो अभ्यास फुडारांत जातलो. ह्या अभ्यासा उपरांत फुडारांत ‘ओपन बूक एग्झाम’ घेवप काय ना हें थारतलें.
पुणें शारांत प्रायोगीक तत्वांचेर सुरू…
ही परिक्षा पद्दत कांय वाठारांनी नोकरेचीं पदां भरपाचे परिक्षेंत वापरतात. शालेय शिक्षणांत ही पद्दत अंमलांत हाडपा खातीर ‘सीबीएसर्इ’ शिवाय हेर खंयच्याय शिक्षण मंडळान हो धाडसी निर्णय जाहीर केल्लो ना. ‘सीबीएसर्इ’ ही फकत इत्सा व्यक्त केल्ली आसून, ते नदरेन तयारी करपा खातीर प्रायोगीक तत्वांचेर कांय शाळांनी ‘ओपन बूक एग्झाम’ घेवपाची तयारी केल्या. ह्या परिक्षेंतल्यान निश्कर्श मुखार आयल्या उपरांत, निमणो निर्णय घेतले. तशेंच पुणे राज्य मंडळान फुडल्या कांय दिसांनी, कांय शाळांनी प्रायोगीक तत्वांचेर 9 वी ते 12 वी मेरेनच्या विद्यार्थ्यांची परिक्षा ह्या स्वरुपांत घेवंक शकता. ह्या प्रयोगांतल्यान मुखार येवपी म्हायती वा निश्कर्शाचेर आधारान उक्ती परिक्षा पद्दतीच्या अंमलबजावणेचे बाबतींत योग्य निर्णय घेतले. परिक्षांनी जावपी गैरवेव्हार आडावपाक खातीर, आनी अभ्याक्रमांतली संकल्पना सुत्रां समजून घेवपाक पासत ही परिक्षा उपेगी पडूं येता अशेय संकेत दिल्यात.
फायदेशीर काय … ?
म्हज्या मतान ‘ओपन बूक एग्झाम’ ही संकल्पना खरेंच खूब बरी आसा. तरीय फकत सकयल दिल्ले कांय वेंचीक मुद्दे मतींत घेवया.
उक्त्या परिक्षेचो काळावधी अर्द वरान उणो करचो. जांकां परिक्षा पद्दत ना. तांकां पयलीं सारकी परिक्षा दिवप सोयीचें आसपाक जाय. ही पद्दत,प्रमाणपत्र सादरीकरण उक्ती परिक्षा घेनासतना अशे शिक्के मारून दाखलो दिवपाक जाय. दुसरें म्हणल्यार हे परिक्षेक कितलो फायदो जातलो हाचेर देखरेख सकयल दिल्ल्या प्रमाण आसा. कॉपीचें शौर्य खात्रेन नामहीन आसतलें.
1) पेपर फुटी वा परिक्षेचे पेपर मोडून ते अनमोल मोलान विकल्यार तातूंतल्यान पयशे मेळोवपाचे सगळे मार्ग बंद जातले आनी भ्रश्टाचार पुरायपणान निवळटलो.
2) वर्सभर नेमान अभ्यास करपी भुरग्यां मदीं कसलोच फरक दिसना. कारण चडसो वेळ पुस्तकांतलीं उतरां सोदून काडपांत सारतलो.
3) भुरग्यांचो अभ्यास करपाचो ताण घेवपी विद्यार्थ्यां खातीर ही परिक्षा पद्दत वरदान थारतलें. अपेसाचो भंय पयस जातलो.
4) नापास विद्यार्थ्यांचें प्रमाण उणें जावन विद्यार्थ्याचें शिक्षणीक वर्स फुकट वचचें ना.
निमाणें इतलेंच ही पद्दती अंमलांत आयल्यार आनंदांतल्यान फुडें शिकपाची, फुडें वचपाची उर्मी आनी उमेद उर्जा मेळटली. हातूंत दुबाव ना. पूण ‘ओपन बूक एग्झाम सिस्टम ही’ फायदेशीर काय ना? हाची जाप काळूच दितलो. तितले म्हणसर पालक शिक्षकांनी धीर धरपाक जाय न्हय? अशा वेळार झिग झिग्लरचें वाक्यांतल्या विचाराचो उगडास येता. ते म्हणटात,- “If you are not willing to learn, no one can help you. If you are determined to learn, no one can stop you.”
विशाल सिनाय खांडेपारकार
808622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
