भांगरभूंय | प्रतिनिधी
-काँग्रेसीन केले उमेदवार जाहीर, संवसार पाडव्याक फोडटले प्रचाराचो नाल्ल
पणजी: लोकसभा वेंचणुकेंतल्या उमेदवारी वयल्यान फाटल्या कांय दिसां पसून काँग्रेसींत आशिल्लो घुस्पागोंदळ शेनवारा सुटलो. काँग्रेसीन उत्तर गोंयांतल्यान आदले केंद्रीय मंत्री अॅड. रमाकांत खलप आनी दक्षीण गोंयांतल्यान कॅ. विरियातो फर्नांडीस हांकां उमेदवारी जाहीर केल्या. वेंचणुकेच्या रिंगणांत आशिल्ल्या तिनूय पक्षांचे उमेदवार जाहीर जाल्ल्यान वेंचणुकेचे चित्र अखेर स्पश्ट जाले.
सत्ताधारी भाजप विरोधी काँग्रेस आनी रिव्हॉल्यूशनरी गोवन्स (आरजीपी) हे तीन पक्ष हे खेपे लोकसभा वेंचणुकेच्या मैदानांत आसात. आरजीपीन सगल्यांत पयलीं उत्तरेंत मनोज परब आनी दक्षिणेंत रुबर्ट पेरेरा हांकां उमेदवारी घोशीत करून वेंचणुकेचो प्रचार सुरू केलो. ते उपरांत भाजपान पयल्या वळेरेंतल्यान केंद्रीय मंत्री श्रीपाद नायक हांकां उमेदवारी जाहीर केल्या. पूण दक्षीण गोंयांतल्या उमेदवारीचो प्रस्न कांय दीस कायम उरिल्लो. निमाणे हे खेपे दक्षीण गोंयांत बायलां उमेदवाराक प्राधान्य दिवपाचे निश्चीत करून भाजपान नामनेचे उद्देजक श्रीनिवास धेंपो हांची घरकान्न पल्लवी धेंपो हांकां उमेदवारी जाहीर केली आनी प्रचारांत आघाडी घेतली.
भाजपा कडल्यान दक्षीण गोंयचो उमेदवार जाहीर जाले उपरांत काँग्रेस दोनूय मतदारसंघांतले उमेदवार जाहीर करतली अशें सगल्यांक दिसताले. पूण उमेदवारी वयल्यान प्रदेश काँग्रेसींत फूट पडली. आदले प्रदेशाध्यक्ष गिरीश चोडणकार हांणी दक्षीण गोंयची उमेदवार आपणाक मेळटली, ही आस्त बाळगून दक्षीण गोंयांत प्रचार सुरू केल्लो. जाल्यार उत्तर गोंयच्या उमेदवारीच्या आस्तेन प्रदेश काँग्रेसचे उपाध्यक्ष सुनील कवठणकारूय कांय दिसां पसून पक्षांत सक्रीय जाल्ले. पूण काँग्रेस प्रभारी माणिकराव ठाकरे, प्रदेदशाध्यक्ष अमीत पाटकार आनी विरोधी पक्ष फुडारी युरी आलेमांव निमाणे मेरेन अॅड. रमाकांत खलप आनी कॅ. विरियातो फर्नांडीस ह्या दोगांयच्या नांवाचेर ठाम रावले. ताका लागूून वेंचणूक समितीन ह्या तिगांयच्या मताक प्राधान्य दिवन अॅड. खलप आनी विरियातो फर्नांडीस हांच्या नांवाचेर म्होर लायली.
मजगतीं, उमेदवारी जाहीर जाले उपरांत शेनवारा सांजे पणजेंतल्या काँग्रेस भवनांत आयोजीत कार्यावळींत अॅड. रमाकांत खलप आनी कॅ. विरियातो फर्नांडीस हांचे प्रदेशाध्यक्ष अमीत पाटकार, विरोधी पक्ष फुडारी युरी आलेमांव, आमदार एल्टन डिकॉस्ता, अॅड. कार्लूस फेरेरा, आदले प्रदेशाध्यक्ष गिरीश चोडणकार हांणी अभिनंदन केले. ह्या वेळार काँग्रेस पदाधिकारी, कार्यकर्ते व्हड संख्येन हाजीर आशिल्ले. दोनूय उमेदवारांचो प्रचार संवसार पाडव्या पसून सुरू करतले, अशें अमीत पाटकार हांणी सांगलें.
…………………………….
दोनूय उमेदवारांचो थोडक्यांत परिचय
अॅड. रमाकांत खलप
-1974 पसून राजकारणांत सक्रीय
-सुमार 25 वर्सां आमदार
– राज्यांत विरोधी पक्ष फुडारी, मंत्री, उपमुख्यमंत्री म्हूण पदभार सांबाळ्ळां.
-केंद्रांत कायदो राज्यमंत्रीपदाची जापसालदारकीय सांबाळ्ळ्या.
-आदर्श संसदपटू म्हूण भोवमान
………………………………
कॅ. विरियातो फर्नांडीस
– भारतीय नौदळाचे निवृत्त अधिकारी
– कारगील झुजांत सहभाग
– मेकॅनिकल इंजिनियरिंग पदवी मेळयल्या
– पुण्यांतल्यान एमबीए पदवी
– सामाजीक कार्यकर्ते,पर्यावरण मोगी
-फाटले विधानसभा वेंचणुकेंत दाबोळेंतल्यान मंत्री मॉवीन गुदिन्हो विरोधांत फक्त 1,570 मतांनी हार.
…………………………..
पक्षांच्या उमेदवारांत अशी जातली लडत
उत्तर गोंय – श्रीपाद नायक आड रमाकांत खलप आड मनोज परब
दक्षीण गोंय – पल्लवी धेंपो आड कॅ. विरियातो फर्नांडीस आड रुपर्ट परेरा
…………..कोट …………….
गोंयकार हे खेपे काँग्रेस वांगडा अासा. ताका लागून लोकसभा वेंचणुकेंतल्यो दोनूय सुवातो काँग्रेस जिखतली.
– अमीत पाटकार, प्रदेशाध्यक्ष
…………………………….
उमेदवारी खातीर वेळ लागलो. पूण काँग्रेसीन योग्य उमेदवार दिल्यात. काँग्रेस सयत इंडि आघाडीचे फुडारी, पदाधिकारी आतां प्रचाराक सुरवात करतले.
– युरी आलेमांव, विरोधी पक्ष फुडारी
……………………………..
पक्षान आपणाचेर दाखयिल्लो विस्वास आपूण निश्चीत खरो थारायतलो. गोंयचो आवाज परतून एकदा लोकसभेंत पावोवपाचो आसा.
– अॅड. रमाकांत खलप, उत्तर गोंय उमेदवार
………………………………
दक्षीण गोंयांतले जायते प्रस्न अजुनूय प्रलंबीत आसात. इंडि आघाडीचे सगले फुडारी, पदाधिकारी, कार्यकर्ते पुराय तांकीन यत्न करून दोनूय उमेदवारांक वेंचून हाडटले.
– कॅ. विरियातो फर्नांडीस, दक्षीण गोंय उमेदवार
……………………………….
काँग्रेसी कडल्यान अणभवी आनी दिग्गजांक उमेदवारी. आमी आमचे काम सुरू केलाच, हाचे मुखार अदीक नेटान काम करतले.
– अमीत पालेकार, राज्य निमंत्रक, आप
……………………………….
काँग्रेसीन दोनूय मतदारसंघांत बऱ्या उमेदवारांची निवड केल्या. दोगांकूय भोवमतान वेंचून हाडपाचो अामी यत्न करतले.
– दुर्गादास कामत, सरचिटणीस, गोवा फॉरवर्ड
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
