भांगरभूंय | प्रतिनिधी
-उत्तर आनी दक्षीण गोंयांतल्या दोनूय उमेदवारांच्या प्रचाराक सुरवात
पणजी: लोकसभा वेंचणुकेंतले उत्तर आनी दक्षीण गोंयांतले उमेदवार जाहीर केले उपरांत गुडीपाडव्याच्या शुभ म्हुर्तार मंगळारा काँग्रेसीन दोनूय उमेदवारांच्या प्रचाराक सुरवात केल्या. ते उपरांत पणजे इंडि आघाडीच्या घटक पक्षांची बसका घेवन प्रचाराची रणनितीय आंखली. काँग्रेसची परंपरीक मतां स्वता कडेन दवरपा सयत रिव्हॉल्यूशनरी गोवन्स पक्षाक (आरजीपी) शह दिवपाचे फाटभुंयेर बसकेंत चर्चा जाली.
काँग्रेस प्रदेशाध्यक्ष अमीत पाटकार, अापचे राज्य निमंत्रक अमीत पालेकार, गोवा फॉरवर्डाचे सरचिटणीस दुर्गादास कामत, राष्ट्रवादी काँग्रेसचे जुझे फिलीप डिसोझा, शिवसेनेच्या उद्धव ठाकरे गटाचे राज्य मुखेली जितेश कामत हांचे सयत हेर पक्षांचे पदाधिकारीय हे बसकेक हाजीर आशिल्ले.
……………………..
काँग्रेस प्रदेशाध्यक्ष अमीत पाटकार हांणी म्हणलें…
– इंडि आघाडीच्या दोनूय उमेदवारांक प्रचाराच्या पयलेच दिसा उपाट प्रतिसाद मेळ्ळो. प्रचाराची सुरवात करतना घटक पक्षांचे आमदार, वरिश्ठ फुडारी आनी पदाधिकारीय हजर आशिल्ले.
-आघाडीच्या दोनूय उमेदवारांचो गांवागांवांनी वचून प्रचार करतले. ते संदर्भांतली रणनिती मंगळारा जाल्ले बसकेंत थारली. दोनूय उमेदवारांचे अर्ज 15 वा 16 एप्रील दिसा दाखल करतले.
-इंडि आघाडीच्या गोंयांतल्या उमेदवारांच्या प्रचारा खातीर काँग्रेसच्या राष्ट्रीय फुडाऱ्या सयत आघाडेंतल्या घटक पक्षांचे फुडारीय गोंयांत येतले. स्टार प्रचारकांची वळेरी बेगिनूच जाहीर करतले.
-गोंयांतले सुमार 67 टक्के लोक भाजपाच्या विरोधांत आसाप. हे लोक हे खेपे निश्चीत काँग्रेसचे वटेन उबे रावतले.
-रिव्हॉल्यूशनरी गोवन्स (आरजीपी) हो पक्ष फक्त काँग्रेसचीं मतां फोडपा खातीर लोकसभा वेंचणुकेंत देंवला, आनी भाजपाची ती ‘बी’ टिम आसा. गोंयांतल्या लोकांकूय हे कळून चुकला. ताका लागून लोक हे खेपे आरजीपीचेर विस्वास दवरचे ना.
-आरजीपीचे संस्थापक आशिल्ले मनोज परब हाचे पयलीं आपांत आशिल्ले. उपरांत तांणी आरजीपी स्थापन केली. ताका लागून मनोज परब हांकां अॅड. खलप हांचे विशीं उलोवपाचो कसलोच अधिकार ना.
-आरजीपीक भाजपाक हारोवपाचे आशिल्ले जाल्यार आमी जायते खेपे विनवणी केले उपरांत ते निश्चीत चर्चेक येवपाचे. पूण ते येवंक नात. हातूंतल्यान तांची भुमिका लक्षांत येता. फक्त काँग्रेसचीं मतां फोडपा खातीर भाजपान तांकां वेंचणुकेंत देंवयला.
-गोंयकार भाजपाच्या केंद्र आनी राज्यांतल्या सरकाराक बेजारल्या. ताका लागून अंदूं लोकसभेच्यो दोनूय सुवातो काँग्रेसीच जिखतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
