भांगरभूंय | प्रतिनिधी
-वेर्णे पुलिशेंत कागाळ नोंद, वेंचणूक आयोगान मागलो सविस्तर अहवाल
पणजी: म्हायती आनी तंत्रज्ञान (आयटी) मॉनिटरींग विभागांत सेवेंत आयकर अधिकारी आशिल्ल्याचे सांगून ज्येश्ठ वेवसायिकां कडल्यान 16 लाख रुपया लुटले. तातूंतले 8 लाख रुपया जप्त केल्यात, जाल्यार 8 लाख रुपया विशीं गूढ कायम आसा. मजगतीं, ह्या प्रकरणांत वेंचणूक आयोगान वेर्णा पुलिसां कडल्यान सविस्तर अहवाल मागयला.
गाझियाबाद-उत्तर प्रदेशांतल्या आनी करंझाळे राबित्याक आशिल्ले ज्येश्ठ वेवसायीक अशोक चौधरी हांणी कागाळ दाखल केल्या. चौधरी हांणी दक्षीण गोंयांत केळशी जमीन घेतल्या. त्या जमनीचे रुपांतर आनी हेर प्रक्रिया करपाक 31 मार्च दिसा ते पवन कुमार वर्मा हांचे वांगडा गोंयांत आयले. जमीन रुपांतर आनी हेर प्रक्रिया करपाक तांणी दाबोळे रावपी आपलो इश्ट यशवंत कृष्णय्या हाचे कडल्यान 16 लाख रुपया घेतले. उपरांत ते पयशे घेवन करंझाळे येतना आयकर अधिकारी आशिल्ल्याचे सांगून तांकां वाटेत आडायले आनी तांचे कडल्यान 16 लाख रुपया लुटिल्ल्याची कागाळ दाखल केल्या.
ह्या प्रकरणांत वेर्णा पुलिसांनी गुन्यांव दाखल करून दक्षीण गोंय जिल्होधिकाऱ्यांच्या कार्यालयांत म्हायती आनी तंत्रज्ञान (आयटी) मॉनिटरींग विभागांत सेवा दिवपी वीज खात्यांतलो कनिश्ठ लिपीक नितेश नायक हांचे सयत दाबोळे घोळट्या पंगडाचो अधिकारी नगरपालिका अभियंता अनिरूद्ध पवार, केशव खवणेकार आनी चंदन यादव ह्या चौगांक बुधवारा रातीं अटक केल्या. उपरांत न्यायालयान तांकां सशर्त जामीन मंजूर केलो.
मजगतीं, पुलिसांनी नितेश आनी अनिरुद्ध ह्या दोगां कडल्यान दरेकी चार लाख रुपया मेळून 8 लाख रुपया जप्त केल्यात. ह्या प्रकरणांतले 8 लाख रुपया जप्त करूंक नात. हे संदर्भांत वेगळी म्हायती मुखार आयिल्ल्यान हे विशीं गूढ कायम आसा.
मजगतीं, वयल्या प्रकरणाची दखल वेंचणूक अायोगान घेतल्या. तांणी वेर्णा पुलिसां कडल्यान सविस्तर अहवाल मागयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
