भांगरभूंय | प्रतिनिधी
पणजी : सध्या देशभरांतल्या आयआयटींतल्यान जावपी प्लेसमेंट वा नोकरी मेळपाचें प्रमाण उणें जाला. अशें आसले तरी प्लेसमेंटा विशीं फर्मागुडये वयल्या आयआयटी गोंयची कामगिरी बरी आसा. संस्थेंतल्यान पास जाल्ल्या विद्यार्थ्यांक सरासरी वर्सुकीं 16.30 लाख रुपया वेतनाची नोकरी मेळ्ळ्या. जाल्यार वट्ट विद्यार्थ्यां मदीं 97.6 टक्के जाणांक नोकरी मेळ्ळ्या. संस्थेच्या 2023-24 प्लेसमेंट अहवालांतल्यान ही म्हायती मेळ्ळ्या.
अहवाला प्रमाण, संस्थेंत 2019 ते 2023 ह्या चार वर्सांच्या बी टेकच्या आनी 2021 ते 2023 ह्या एम टेक अभ्यासक्रमां खातीर वट्ट 160 विद्यार्थी आशिल्ले. हातूंतल्या 125 जाणांनी प्लेसमेंटा खातीर नोंदणी केल्ली. जाल्यार 122 जाणांक नोकरी लागली. अभ्यासक्रमा प्रमाण पास जाल्ल्या विद्यार्थ्यांच्या पगाराची आंकडेवारी पळयल्यार बी टेकच्या विद्यार्थ्यांक सरासरी वर्सुकीं 17.19 लाख रुपया पगार मेळ्ळा. जाल्यार एमटेकच्या विद्यार्थ्यांक सरासरी वर्सुकीं 10.68 लाख रुपया पगार मेळ्ळो.
जाल्यार 2019 ते 2023 च्या बी टेक अभ्यासक्रमा खातीर वट्ट 136 विद्यार्थी आशिल्ले. हातूंतल्या 105 जाणांनी प्लेसमेंट खातीर नोंदणी केल्ली. जाल्यार 31 जाणांनी नोकरी बदला हेर पर्यायांची निवड केली.
ह्या 105 जाणांतल्यान 104 जाणांक नोकरी लागली. बी टेकची प्लेसमेंट टक्केवारी 99 अाशिल्ली. 2021 ते 2023 च्या एमटेक अभ्यासक्रमा खातीर वट्ट 24 विद्यार्थी आशिल्ले. हातूंत 20 जाणांनी प्लेसमेंट खातीर नोंदणी केल्ली. जाल्यार 18 जाणांक नोकरी लागली. एममेकची प्लेसमेंट टक्केवारी 90 आशिल्ली.
अभियांत्रीकीच्या विभागा प्रमाण पळयल्यार बी टेकच्या 2019 ते 2023 च्या बॅचींतले कॉम्प्युटर सायन्स विभागांत 45 विद्यार्थी अाशिल्ले. हातूंतल्या 34 जाणांनी प्लेसमेंट खातीर नोंदणी केल्ली. जाल्यार 34 जाणांक नोकरी लागली. ह्या विभागांतल्या विद्यार्थ्यांक सरासरी वर्सुकीं 21.52 लाख रुपया पगाराची नोकरी मेळ्ळी. एमटेकच्या 2021-2023 बॅचींत इलेक्ट्रॉनीक इंजिनियरींग विभागांत 7 विद्यार्थ्यांतल्यान 5 जाणांक नोकरी लागली. ह्या विभागांतल्या विद्यार्थ्यांक सरासरी वर्सुकीं 11.56 लाख रुपया पगाराची नोकरी मेळ्ळी.
सगल्यांत चड पगार वर्सुकीं 60 लाख रुपया
2022-23 ह्या वर्सांत संस्थेच्या प्लेसमेंट प्रक्रियेंत विवीध 126 कंपनीनी वांटो घेतिल्लो. हातूंत अॅमेझॉन, गुगल, जीई, अडोब अशा नामनेच्या कंपनींचो आस्पाव आशिल्लो. एका विद्यार्थ्याक वर्सुकीं 60 लाख रुपया पगाराची नोकरी मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
