भांगरभूंय | प्रतिनिधी
पणजीः आम आदमी पक्ष खंडणी घेवन न्हय, प्रामाणीकपणान काम करून व्हड जाला. ते खातीर आमकां गरजे भायर लक्ष्य करतात. अशें आसलें तरीय आमी कोणाक भियेनात, अशें प्रत्युत्तर पक्षाचे गोंय निमंत्रीक अमीत पालेकार हांणी दिलें. बुधवारा पणजे घेतिल्ले पत्रकार परिशदेंत ते उलयताले. ह्या वेळार आमदार व्हेन्झी व्हिएगस आनी वाल्मिकी नायक हाजीर आशिल्ले.
पालेकार हांणी सांगलें, खरें म्हणल्यार खंयचेय गजालीचें म्हत्व वाडपाक लागतकच विरोधकांक ताचो भंय दिसपाक लागता. तांच्या मनांत, सपनांत लेगीत सेगीत ती गजाल येता. ताका लागून घडये मुख्यमंत्र्यांक भोंवतना तांच्या फाटल्यान आमची गाडी दिसली आसुयेता. मुख्यमंत्र्याचें काम राज्यांतलो कायदो आनी सुवेवस्ता राखपाचें. अशें आसतनाय ते जे पद्दतीन मटक्या विशीं उलययलें ते पळयत जाल्यार तांकां हातूंतली चड म्हायती आसा, अशेंच दिसता. आमदार व्हेन्झी व्हिएगश हांणी सांगलें, लोकशाय पद्दतीन वेंचून आयिल्ल्या लोकप्रतिनिधींक मटको लागलो म्हूण आयलें अशें म्हणप योग्य. हो मतदान केल्ल्या सगळ्यांचो अपमान आसा. आमी कोणाक भियेनात. आमी कोणाचोच फाटलाव करूंक ना. मात देशांतले लोक इलेक्ट्रोल बॉण्डांतले पयशे गेले हाचो सोद घेतात. जाहीर सभेंत मटक्या विशीं उलोवपी मुख्यमंत्र्याक मटक्याचो प्रचार बी करपाचो आसा काय कितें तें स्पश्ट करचें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
