भांगरभूंय | प्रतिनिधी
पणजीः सोरो घोटाळो प्रकरणांत ईडीन दिल्लीचे मुख्यमंत्री अरविंद केजरीवाल हांकां अटक केल्या. तांचे अटके उपरांत गोंयांतले आम आदमी पक्षाचे फुडारी लेगीत भियेल्यात, असो दावो मुख्यमंत्री डॉ. प्रमोद सावंत हांणी केलो. वेळ्ळी मतदारसंघांत जाल्ले प्रचार सभेंत ते उलयताले. ह्या वेळार आमदार दिगंबर कामत, दक्षीण गोंयची उमेदवार पल्लवी धेंपे आनी भाजपाचे हेर पदाधिकारी हाजीर आशिल्ले.
मुख्यमंत्री डॉ. सावंत हांणी सागंलें, सोरो घोटाल्यांत दिल्लीच्या मुख्यमंत्र्यांक अटक जाली. ते उपरांत गोंयांतले फुडारी भियेनात, असो दावो करतात, मात मनांतल्यान ते भियेल्यात. हेच खातीर आमी खंय खंय प्रचार करतात, ते पळोवपा खातीर ते फाटल्यान फाटल्यान भोंवतात. ह्या सोऱ्याच्या घोटाळ्यांत आप फुडाऱ्यांक खूब पयशे मेळ्ळे. तांकां इतल्या पयशांचें कितें करचें तें कळना. तातूंतले इल्ले पयशे गोंयांत घातले, हेच खातीर तांकां ह्या मतदारसंघांत मटको लागलो. भाजपाक वेंचून दिवपाचो होच योग्य वेळ आसा. काँग्रेस पक्ष हांगाच्या गायबूच जाला. आपचें भायर- भितर चालू आसा. ह्या मतदारसंघांतले लोक आरजी वा हेर पक्षाक दाद दिनात. तेच खातीर एकमेव भाजप हो बरो पर्याय आसा. 2022 विधानसभा वेंचणुकेंत आमी नावेलींत कमळ फुलयिल्लें, तातूंत महिला मोर्चाची व्हड भुमिका आशिल्ली. अशें जैत वेळ्ळींत लेगीत शक्य आसा. ते खातीर ह्या मतदारसंघांतल्या महिला मोर्चान हें काम हातांत घेवचें, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
