भांगरभूंय | प्रतिनिधी
-तीन म्हयन्यां पयलीं दिल्लो अापचो राजिनामो
पणजी: तीन म्हयन्यां पयलीं आम आदमी पक्षाक (आप) रामराम केल्ल्यो आदल्यो मंत्री तशेंच कुठ्ठाळीच्यो अादल्यो आमदार एलिना साल्ढाणा हांणी शेनवारा काँग्रेसींत प्रवेश केलो. लोकसभा वेंचणुकेच्या फाटभुंयेर साल्ढाणा हांणी काँग्रेसीत प्रवेश केल्ल्यान दक्षीण गोंयांत काँग्रेसीक अदीक घटाय मेळिल्ल्याचे मानतात.
आदले मुख्यमंत्री मनोहर पर्रीकार हांच्या मंत्रीमंडळांत एलिना साल्ढाणा मंत्री आशिल्ल्यो. फाटले विधानसभा वेंचणुके पयलीं भाजपाचो राजिनामो दिवन तांणी आप पक्षांत प्रवेश केल्ला. पूण 31 जानेवारी 2024 दिसा पिराय आनी भलायकेचे कारण दिवन तांणी आपाचो राजिनामो दिल्लो. ते उपरांत शेनवारा पणजेंत काँग्रेस भवनांत आयोजीत कार्यावळींत तांणी काँग्रेसींत प्रवेश केलो. काँग्रेस प्रदेशाध्यक्ष अमीत पाटकार, विरोधी पक्ष फुडारी युरी आलेमांव हांचे सयत हेर पदाधिकाऱ्यांनी तांकां पक्षांत येवकार दिलो.
भाजपांत आसतनाय केंद्र सरकारच्या रेल्वे मार्ग दोट्टीकरण, वीज लायन आनी म्हामार्ग रूंदीकरण ह्या केंद्राच्या तीन व्हड प्रकल्पा आड एलिना थळाच्यांच्या वांगडा उब्यो राविल्ल्यो. ह्या प्रकल्पा खातीर जमीन संपादन करपाक आयिल्ल्या अधिकाऱ्यांकूय तांणी कांय खेपे आडायिल्ले. तशेंच विधानसभेच्या दरेक अधिवेशनांत ह्या तिनूय प्रकल्पा वयल्यान स्वताच्याच सरकाराक ‘घरचो आहेर’ दिवन हे तिनूय प्रकल्प बेगोबेग रद्द करपाची मागणी लावन धरिल्ली. पूण सरकारान तांच्या मागण्यां कडेन आडनदर केली. त्याच वेळार मंत्री तशेंच दाबोळीचे आमदार मॉवीन गुदिन्हो हांणीय एलिना हांकां कुठ्ठाळेंतल्या विशयां वयल्यान सातत्यान धारेर धरपाचो यत्न केलो. तेन्ना एलिना हांणी मॉवीन गुदिन्हो हांकां खर जाप दिली. ह्या दोगां मदलो वाद जायते म्हयने सुरूच उरलो. उपरांत विधानसभा वेंचणूक 2021 त भाजपाचो राजिनामो दिवन, दिल्लींत वचून तिणें आपचे राष्ट्रीय निमंत्रक तशेंच दिल्लीचे मुख्यमंत्री अरविंद केजरीवाल हांचे हाजिरेंत आपांत प्रवेश केलो. आपान तांकां कुठ्ठाळेंतल्यान उमेदवारी दिली. पूण, हे वेंचणुकेंत तांकां हार घेवची पडली.
ते उपरांत एलिना राजकारणांत सक्रीय दिसूंक नात. आतां लोकसभा वेंचणुकेच्या तोंडार तांणी काँग्रेसींत प्रवेश केल्ल्यान दक्षीण गोंयांतल्या काँग्रेस कार्यकर्त्यां मदीं उमेद पातळ्ळ्या.
………………………….
काँग्रेस प्रवेशा उपरांत एलिना साल्ढाणा हांणी म्हणलें…
-काँग्रेस हो गोंयांतलो पोरणो पक्ष आसा. काँग्रेसीन सदांच गोंयातलो सर्वधर्मसमभाव, शांतताय तिगोवन दवरपाचो यत्न केलो.
-लोकांचे प्रस्न सोडोवपाचो सदांच यत्न केलो. ताका लागुनूच आपूण काँग्रेसींत प्रवेश करपाचो निर्णय घेतला.
– दक्षीण गोंयांतलो रेल्वे मार्ग दोट्टीकरण, वीज लायन आनी म्हामार्ग रूंदीकरण ह्या तीन प्रकल्पा विरोधांतलो आपलो लढो कायम सुरू उरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.