आचारसंहितेच्या काळांत 5.5 कोटी रुपया जप्त

भांगरभूंय | प्रतिनिधी

वट्ट 16.65 कोटींचो म्हाल धरलो

भांगरभूंय । प्रतिनिधी

पणजीः गोंयांत 16 मार्चाच्यान लोकसभा वेंचणुकेची आचारसंहिता लागू जाली. 16 मार्च ते 22 एप्रील ह्या काळांत गोंयांत 5.5 कोटींचे रोख रकमे सयत वट्ट 16 कोटी 65 लाख 53 हजार 572 रुपयांचो म्हाल जप्त केलो. तातूंत रोख रकमे सयत घुंवळे वखदां, सोरो, भांगर- रुपें तशेंच फुकट वांटपाच्या वस्तूंचो आस्पाव आसा.

16 मार्च ते 22 एप्रील मेरेन गोंयांतल्या विवीध खात्यांनी ही कारवाय केल्या. रेल्वे पुलीस, एनसीबी, शीम शुल्क, अबकारी खातें, पुलीस खातें, आयकर आनी वेवसायीक कर विभागांचो तातूंत आस्पाव आसा. आयकर विभागान 4.6 कोटींची रोख रकम आनी 3,03 कोटी  रुपयांचे मोलादीक धातू जप्त केल्यात. अबकारी खात्यान 3,43 कोटींचो 62 हजार 949 लिटर सोरो जप्त केला.

पुलीस खात्यानूय कोट्यांनी रुपयांचो म्हाल जप्त केला. 37 दिसांनी 2.46 कोटी रुपयांचीं घुंवळी वखदां, 74 लाखांचो 30 हजार लिटर सोरो, 9.07 लाखांची रोख रकम, 5.57 लाखांचे 78 मोबायल फोन जप्त केल्यात.

वेवसायीक कर विभागान 1.35 कोटींच्यो फुकट वांटपाच्यो तशेंच हेर वस्तू जप्त केल्यात. रेल्वे पुलिसांनी 70 हजार रुपयांचो 293 लिटर सोरो, नारकोटीक्स नियंत्रण ब्युरोन (एनसीबी) 54 लाख 62 हजार रुपयांचीं घुंवळी वखदां, गोंय शीम शुल्क विभागान 32 लाखांचें 549 ग्राम भांगर आनी 76 हजारांचो सॅटलायट फोन जप्त केलो.

पुराय देशाचो विचार केलो जाल्यार 1 मार्च ते 13 एप्रील ह्या काळांत वेंचणूक आयोगान वट्ट 4650 कोटींचो म्हाल जप्त केलो. वेंचणूक आयोगा वतीन केल्ली ही जप्ती 2019 चे वेंचणुकेंतले जप्ती परस चड आसा. 2019 त आयोगान 1175 कोटी रुपयांचो म्हाल जप्त केल्लो.

हे आदीं मुख्य वेंचणूक आयुक्त राजीव कुमार हांणी वेंचणुकेच्यो तारखो जाहीर करतना चार ‘एम’ आव्हान थारतले, अशें सांगिल्लें. तातूंत मनी (पयसो), मसल (ताकद), मीस इन्फॉर्मेशन (चुकीची म्हायती) आनी एमसीसी व्हायोलेशन (आचारसंहितेचो भंग) हांचो आस्पाव आसा, अशें म्हणिल्लें. ते उपरांच आचारसंहिता भंगा आड वेंचणूक आयोगान तशेंच थळाव्या मुख्य वेंचणूक कार्यालयान खर पावलां उखल्ल्यांत.

जप्त केल्लो म्हाल (कोटींनी)

रोख रकम- 5.5, घुंवळी वखदां- 3.01, सोरो- 4.88, मोलादीक धातू- 3.35, फुकट वांटपाच्यो वस्तू- 1,40,70,000